Read njo 2 SAMUEL 13 Bible Online

2 SAMUEL 13 - njo bible

2 SAMUEL 13

¹Dawid chir Absalom tenu tobur tajung aiür ka liasü shiba tenüng Tamar liasü; aser Amnoni la kanga meim.

²Aser tenu Tamar aginüba agi Amnon kanga jashia shirangadok; kechiyong la tasüngtet aiür ka liasü; aser la dang langka inyaktsü Amnon asoshi tasak ta ajitet.

³Saka Amnon tembar ka liasü, shiba tenüng Yonadab, Dawid tenu Shemea jabaso liasü: aser Yonadab kanga tesangra nisung ka liasü.

⁴Aser pai pa dang ashi, “Oh chuba chir, kechiba na yamai anogo aben tejak mekümer mangadaka alir? Kechi asü, nai mashitsü no” Amnoni pa dang ashi, “Ni küdi Absalom tenu, Tamar meimer.”

⁵Yonadabi pa dang ashi, “Na yipten nung ontaka liang, ne sasa shiranger jilu iang: aser kodang nebu na reprangi arudir, pa dang shiang, yimlibilema künu Tamar arudakjang, aser kü madang chiyungtsü renemdakjang, angji ni aji angutsü, aser la ket nungi aji achitsü akok.”

⁶Yamaji Amnon ontaka ali, aser pa sasa shiranger jilu ai, aser kodang chubaji pa reprangi aru, Amnoni chuba dang ashi, “Yimlibilema künu Tamar arudakjang, aser la ket nungi ni achitsüsa kü madang amtsük ana yangludakjang.”

⁷Dawidi osangbener yoka Tamar dang yamai shiok, “Nedi Amnon kidangi oang, aser pa nem chiyungtsü renemjang.”

⁸Tamari tedi Amnon kidangi ao; aser pa ontaka liasü. Aser lai amzü agia aji ajepsa-a pa tsüngdang amtsükji asang.

⁹Aser lai am asangba poji bena arua pa madang aji agitet, saka pai mechili asü. Aser Amnoni ashi, “Nisung ajak kü madang nungi odakjang.” Yamaji nisung ajak pa nungi pila.

¹⁰Aser Amnoni Tamar dang ashi, “Chiyungtsüji taktangi bener aitjang, aser aji ni ne ket nungi achitsü.” Tamari lai yangluba amtsükji agi, aser tedi Amnon taktangi itemji bener ait.

¹¹Kodang lai itemji pa dang tachitsü anasa bener aru, pai la dak amet, aser la dang ashi, “Kü nu, arung aser kü den mejangang.”

¹²Lai pa dang langzü, “Nung, odi, ni tekangshi, kechiyong Israel nung iba amai meinyaktsüla; nai iba tamachi mapa teinyak.

¹³Aser ni asoshia, kü maksü ni koleni bener otettsü? aser na asoshia, Israel nung tamachi rongnung na ka asütsü. Tang aji asünung, ni ne dang mepishir, chuba dang jembiang; kechiyong pai na nungi ni mesottsü.”

¹⁴Aji saka pai la dang manga aser pa la dang nungi tashi taitba asünung, pai la kangok, aser la den mejang.

¹⁵Ajiser Amnoni la onsara sempa kechiyong tang tesempa koba agi pai la sempa ibaji pai la aginüba dang nungi tuluba liasü. Amnoni ashi, “Aramesoang aser oadokang.”

¹⁶Lai pa dang ashi, “Yamaji masü, kechiaser ni yokadoktsüba iba tai tulu ya nai kü dang inyakba dang nungi tamajungba lir.” Saka pai la dang manga.

¹⁷Idangji pa tenzüker kilirtem pai pa dangi jaa ashi, “Iba tetsür kü dang nungi anir oang, la sülen kishi shia yujang.”

¹⁸La süoshi talang sema liasü, kechiaser ibalaji chubar jalatem tasüngtet aiürtem sobutsü liasü. Idangji pa kiliri la anir adok, aser la sülen kishi shibangtsü.

¹⁹Tamari la kolak nung aut palok, la süoshi shisa aser la teka la kolak nung ataloker ola tulu agi jeba pei lenmangi ao.

²⁰Tedi Absalomi la dang ashi, “Nedi Amnon ne den liasü a-na? Saka tang kü tenur ajemajema liang, pa nedi lir; ibai temulungjang nung shishia tebilem.” Anungji tedi Absalom kidang la ola madoki semloka ali; oda teraksa tetsür ka.

²¹Kodang Dawid chubai item ajak angashi, pa kanga ain adok.

²²Absalomi Amnon dang tajunga tamajunga mejembi; kechiyong Absalomi Amnon sempa, kechiaser pai tenu Tamar dak teka ai.

²³Küm ana abensar Efraim anasa aliba Baa-hazor nung Absalom san züng mejeper den liasü, aser Absalomi chubar jabaso ajak aja.

²⁴Absalom chuba dangi arua ashi, “Tang ajiang, ne kilir san züng mejepertem arua lir; yimlibilema, chuba aser pa kilirtem, ne kilir den aotsü mela-angma.”

²⁵Chubai Absalom dang ashi, “Masü, kü chir, na asoshi khuret ka küma lir asenok ajakbo moli.” Aser pai pa dang kanga mepishi nung temelaba agütsü, saka pa mao,

²⁶Idangji Absalomi ashi, “Aji mesüra ni ne dang mepishir, künu Amnon kü den odakjang.” Chubai pa dang ashi, “Kechiba pa ne den aotsü”

²⁷Saka Absalomi pa dang kanga mepishi nung pai Amnon aser chubar chir ajak pa den odaktsü.

²⁸Absalomi pa kilirtem dang mela-a ashi, “Amnon mulungjang yi agi pelaba ajioka yuang; aser kodang ni nenok dang, Amnon tepsetang ta shidir, idangji pa tepsetang, tetsübu ni nenok dang memela no? Tasü ita liang, aser teburchi sang.”

²⁹Aser Absalom kilirtemi Amnon dang Absalomi melaba ama inyak. Idangji chuba chir ajak arameso, aser nisung shia pei gado nung mener ajen.

³⁰Parnok lenmang nung alidang, Dawid dangi osang arua ashi, “Absalomi chubar chir ajak tepsetogo, aser parnok kata anünga mali.”

³¹Idangji chubai aramesoa pa sü shisa, aser ali nung ontak; aser kilir ajaki parnok süoshi shisa-a anasa noktak.

³²Dawid tenu Shimea chir, Yonadabi langzüa ashi, “Kü kiburi chubar chir asangur ajak tepset ta tebilem; kechiyong Amnon dang süogo, kechiyong pai tenu Tamar menentsüba anogo nungi ibai Absalom bang agi jembiba ama mulungteta inyakba lir.

³³Tang aji asünung kü kibur chubai pei mulungjang nung ia, chubar chir ajak asü ta tebilem; kechiyong Amnon dang asü.”

³⁴Saka Absalom jena ao. Aser mita repranga aliba asangur jagi pa tenük rangketa yoka reprang, aser ajiang, tenem tsütsü lenmang jagi nisung jenti aruba angu.

³⁵Yonadabi chuba dang ashi, “Ajiang, chuba chirtem arua lir, ne kiliri ashiba amato atalokogo.”

³⁶Pai jembizükli ajiang, chuba chirtem aru, aser parnok ola adoka ajeb; yamaji chubai aser pa kilir ajaki kanga ajeb.

³⁷ Saka Absalom jena ao, aser Geshur chuba, Ammihut jabaso Talmai dangi ao. Aser Dawidi par chir asoshi anogoshi mang ayim.

³⁸Anungji Absalomi Geshuri oa yangji küm asem liasü.

³⁹Dawid chuba tanela nung Absalom dangi aotsü yongya-a ali, kechiyong Amnon asüba asoshibo, pa tejashi süngzüker liasü.