Read njo 2 SAMUEL 14 Bible Online

2 SAMUEL 14 - njo bible

2 SAMUEL 14

¹Tang Zeruia chir Yoabi chuba mulungjang Absalom tsütsü shia lir ta ajitet.

²Anungji Yoabi Tekoai yoka idak nungjagi shisa taka tetsür ka anir arua la dang ashi, “Ni ne dang mepishir, ne sasa mangyimer jilu iang, aser mangyim sobutsü sobuang; aser totzü temezü, saka mapang talangka tasür asoshi mang yima alir tetsür ka ama liang:

³aser chuba dangi iang, aser pa dang iba amai jembiang.” Anungji Yoabi la bang nung otemji enoktsü.

⁴Aser kodang Tekoatsür jagi chuba dang jembi, lai la tejak alilen mechioka akhümtsübu sayua ashi, “Yariang, Oh chuba.”

⁵Chubai la dang asüngdang, “Na kechi agi timtemdaktsür?” Lai langzü, “Ni amitsür ka lir, aser kü kinungpu süogo.

⁶Aser ne kilirla jabaso ana liasü, aser tenapronglai moapu nung raratep, parnok bendangtsür shinga maliasü, aser kati ka dak azük, aser pa tepset.

⁷Aser ajiang, kinunger ajongai ne kilirla anema adokogo, aser parnoki ashi, tenu tepsetsangji bendanga agüjang, angji tenu shiba pai tepset pa taküm asoshi onoki pa tepsettsü, aser yamaji senmangera samatsütsü, yamaji anünga aliba kü mijang parnoki remseptsütsü, aser kü kinungpu nem alima nung tenüng mesüra tanüngba metoktsütsü.”

⁸Chubai tetsürla dang ashi, “Ne kidangi oang, aser ni ne indang ozüng agütsütsü.”

⁹Tekoatsür jagi chuba dang ashi, “Kü kibur, Oh chuba, taiji kü madak, aser kübur kibong madak lidakjang; saka chuba aser pa chuba mendenbo tai makai liang.”

¹⁰Chubai langzü, “Kari ne dang langka shira, pa kü dangi anir arung, aser pai ne dak tanaben kodanga mekongshitsü.”

¹¹Idangji lai ashi, Yimlibilema chubai KIBUBA ne Tsüngrem nem, ozü mang ayangeri joko metepsettsü, aser kü jabaso mesamatsütsü bilemtetdakjangma. Aser pai ashi, “KIBUBA taküm ali nungji, ner jabaso kujang kata ali nung metsüktsü.”

¹²Idangji tetsür jagi ashi, “Ne kilitsür nem kü kibur chuba nem o ka shidakjang.” Aser pai ashi, “Shiang.”

¹³Tetsür jagi ashi, “Kechiba ajangla iba amai Tsüngremer nübur asoshi tasa asa? Kechiyong chubai pai aridokadokba jabaso tanaben kidangi anir maru nungji iba ama jembiba jagi chubajia tai aketer ka amai lir.

¹⁴Kechiyong asenok ajak sülanglang, aser ali nung tzü shitokadokba tanaben bendentsü makokba amai lir; saka Tsüngremi taküm bener maor, saka shiba aridoka ali, pa nungi sendokba ka masütsü asoshi tasa asar.

¹⁵Tang aji asünung kü kibur chuba dang iba o jembitsü ni aru, kechiaser nisungtemi ni tsübudaktsü; aser ne kilitsüri bilem, ni chuba dang jembitsü; ashiko chubai pa kiliri mepishiba inyaktsü akok.

¹⁶Kechiyong chubai angashitsü, aser par kilirji, nisung shibai ni aser kü jabaso Tsüngrem senmang nungi samatsütsü ali pa ket nungi kümzüktsü.

¹⁷ Aser ne kilitsüri bilem, kü kibur chuba o agi ni anisüngzük nung toktsütsü; kechiyong kü kibur chubaji, tajung aser tamajung shitetba Tsüngrem tenyarji mesüka lir, KIBUBA ne Tsüngrem ne den liangma.”

¹⁸Idangji chubai tetsürla dang langzü, “Ni ne dang asüngdangba kecha kü dang nungi miima teli.” Aser tetsür jagi ashi, “Tang kü kibur chubai jembiangma.”

¹⁹Chubai ashi, “Ya ajak nung Yoab ket ia alia na?” Aser tetsür jagi langzü, “Na ali tashi, kü kibur chuba, shingaia kü kibur chuba nungi teka tajichi nungi tabeleni meyiptsü makok; kechiyong ne kilir Yoabi kü dang mela-a ashiba lir, atangji item o ajak ne kilitsür bang nung pai enoktsü:

²⁰tia melenshidaktsütsü asoshi ne kilir Yoabi inyak, aser alima nung mapa ajak metettsü Tsüngrem tenyar shisatsü akaba mesüka kü kibur shisa taka lir.”

²¹Chubai Yoab dang ashi, “Tang ajiang, ni ya melar, oang asangur Absalom tanaben anir arung.”

²²Yoabi ali nung apudaka akhümtsübu sayu, aser chubaji moatsü aser Yoabi ashi, “Chubai pa kiliri mepishiba mela nungji, tanü ne kiliri, Oh kü kibur chuba, ne matsüngdang ni taochi nguogo ta meteter.”

²³Anungji Yoab aramesoa Geshuri oa Absalom Yirusalemi anir aru.

²⁴Saka chubai ashi, “Pa par kidangi meyipa odakjang, saka pa nem kü tejak tengudaktsü.” Aser Absalom pei kidangi meyipa ao, aser chuba dangi maru.

²⁵Tang Israel ajak nung Absalom ama tobur ajungba asangtsüsa tangar maliasü, pa tetsüng temepu nungi tekojong tashi tajitettsü kecha maliasü.

²⁶Küm tatembang shia pai pei kolak asü, kechiaser kuji reta akümdang pai südokadokli asü, pai pa tekolak kuji odang, chubar toudangba shekel noklang ana otet.

²⁷Absalom nem jabaso asem, aser jala ka sotsü, la tenüng Tamar, aser la tobur tajung liasü.

²⁸Absalom Yirusalem nung küm ana renteta liaka pai chuba tejak mangu.

²⁹Idangji Absalomi pa chuba dangi otettsü asoshi Yoab tajai yok, saka Yoab pa dangi maru. Ano pai tanabenbuba yok, saka Yoabi maru.

³⁰Anungji pai pa kilirtem dang ashi, “Ajiangjo, Yoaber lu ozü lu anasa lir, yangji pa barley tsüklu lir; oang aser iba nung mi senang.” Yamaji Absalom kilirtemi alu nung mi asen.

³¹Idangji Yoab aramesoa Absalomer kidangi arua pa dang ashi, “Kechiba ne kilirtemi kü lu nung mi senoktsü”

³²Absalomi Yoab dang langzü, “Ajiang, kechiba ni Geshur nungi anir aru? Ni asoshi yangjiang ali tajungba süla ta asüngdangtsü asoshi na chuba dangi yoktsü yagi arung ta ne dangi o yok. Aji asünung tang ni chuba tsüngdangi odakjang, aser kü dak tai lira pai ni tepsetdakjang.”

³³Idangji Yoabi chuba dangi oa pa dang ashi, aser pai Absalom aja. Anungji pa chuba dangi aru, aser chuba madang alilen apudak; aser chubai Absalom tebang mesep.