Read njo 2 SAMUEL 15 Bible Online

2 SAMUEL 15 - njo bible

2 SAMUEL 15

¹Iba sülenji Absalom pei asoshi talungtsü ka, kortem, aser pa jakdang asemtsü nisung tenem renem.

²Absalomi yakta shishi, aser süngkhüm lenmang tezülenji noktakli asü, aser nisung kar chuba dangi o bendangtsü asoshi oya alidang Absalomi pa aja aser asüngdang, “Na kechi yimti nungi” Kodang pai, “Ne kilir Israel nung iba aser iba yimti nungi”, ta shidir,

³Absalomi pa dang ashi, “Ajiang, nai meshibaji tajung aser shitak dang; saka ne o angatsü chubai nisung shinga yoka mali.”

⁴Ano Absalomi ashi, “Linük nung obendangerji ni ka asübo oda ken-o akar nisung shia kü dangi arua, ni pa dang ochi o bendang agütsüla”

⁵Kodangsa nisung kari pa dang akhümtsübu sayutsü anasa aru, pai pei teka adoka pa dak amet, aser tebang mesep.

⁶Yamaji Absalomi chuba dangi o bendangi arur Israel ajak dang inyak; yamaji Absalomi Israel nunger temulungjang mesüzük.

⁷Küm pezü tatembang nung Absalomi chuba dang ashi, “Ni ne dang mepishir, Hebron nung KIBUBA dang ni koba atemzük, kü tatemzükba agütsütsü ni odakjang.

⁸Kechiyong ne kiliri Geshur nung alidang Siria nung atemzükba ka atemzük aser ashi, “Atangji KIBUBAi ni Yirusalemi bener arura, idangji ni KIBUBA tenzüktsü.”

⁹Chubai pa dang ashi, “Yimjung nung oang.” Anungji pa aramesoa Hebroni ao.

¹⁰Saka Absalomi Israel ajakleni itdangiter yoka ashi, Nenoki jangzü ola angashili, “Hebron nung Absalom chuba lir,” ta nenoki ashitsüla.

¹¹Aser Absalom den Yirusalem nungi pai nisung noklang ana jar ao, aser parnok züzüa dang ao; kechiaser parnoki iba tasaji kecha memeteti liasü.

¹²Aser kodang Absalomi tetepsetba tenla agüja liasü, pai Dawid nem shisa agütsüsang, par yimti Gilo nungi, Gilo nunger Ahithofel tajai yok. Aser anema tasa asabaji tashi ita aküm, aser Absalom den nisung tali züin.

¹³Osang abener ka Dawid dangi arua ashi, “Israel nunger mulungjang Absalom sülen oadokogo.”

¹⁴Idangji Yirusalem nung pa den alir par kilirtem dang Dawidi ashi, “Aramesoang, aser asenoki jendi; aji mesüra asenok asoshi Absalom nungi tejenbulen maka pai asenok yakta menepa lir, aser asen madang tamajung agi tonga lir aser nok agi samaja lir ilunga odi.”

¹⁵Chubar kilirtemi chuba dang langzü, “Ajiang, kü kibur chubai kechi lemteter aji inyaktsü ne kilirtem renema lir.”

¹⁶Anungji chubaji aser pa sülen par kibong ajak ao. Aser chubai ki anüktsü tezüngatsü ter toktsü.

¹⁷Aser chubaji, aser pa sülen par kibong ajak ao, aser ki tatemba nung parnok anen.

¹⁸Aser par kilir ajak pa anasa süia ao; aser Keret nunger, Pelet nunger aser Gat nungi pa sülen anitaker noklang trok ajakji, chuba jakdang ao.

¹⁹Idangji chubai Git nunger Ittai dang ashi, “Na onok den kechiba arur? Meyipa oang aser chuba denji liang; kechiyong nabo bendanger, aser ner lima nungi aridoker ka lir.

²⁰Na yashiang aru, aser nia koleni aor memeteti ali nung tanü ni na onok den nemzüdaktsütsü no? Meyipa oang, aser ne den ne adianutem anir oang; aser KIBUBAi ne dang marakzüba temeim aser temulung alemba sayuangma.”

²¹Saka Ittai chuba dang langzü, “KIBUBA ali nungji, aser kü kibur chuba taküm ali nungji, tasütsü saka mesüra taküm asoshi saka yangji ne kilira alitsü.”

²²Dawidi Ittai dang ashi, “Ajangla süia oang.” Anungji Git nunger Ittai süia ao, pa den alir par nisung ajak den aser tilatem ajak den ao.

²³Aser linük nübur ajaki süia aodang tashi agi ajeb, aser chuba Kidron ayongnu ajanga ao, aser nüburtem ajak arem tsütsüi süia ao.

²⁴Levi nunger den, Abiathar aser Zadok atema Tezüngzüktepba Tsüngrem Ozüng Süngdenji bener aru; aser yimti nungi nisungtem süia mao tashi parnoki Tsüngrem süngdenji yua ata.

²⁵Idangji chubai Zadok dang ashi, “Tsüngrem süngdenji meyipa yimti jagi bener iang. Tsüngrem tsüngdang ni taochi ngura, pai ni meyipa bener arutsü aser pai ibai kü nem ngudaktsütsü;

²⁶saka pai kü dang ni ne dang mepelar ta shira ajiang, yangi ni lir, pa madang kechi ajungar, aji kü dang inyakdakjang.”

²⁷Ano chubai putir Zadok dang ashi, “Ajiang, yimti jagi yimjung nung meyipa oang, na aser Abiathar, ner jabaso ana den, ne chir Ahimaaz, aser Abiathar chir Yonathan.

²⁸Ajiang, ni arem lenten nung na nungi kü nem metetdaktsütsü o maru tashi ata-a alitsü.”

²⁹Anungji Zadok aser Abiathar nati Tsüngrem süngdenji Yirusalemi meyipa bener ao; aser parnok yangji ali.

³⁰Saka Dawid Oliv tenemi tetsüng tesa tekolak nembanger jeba atu aser pa den aliba nüburtem ajaki tekolak nembanger, jeba atu.

³¹Aser Dawid dang Absalom den tasa tamajung asartem den Ahithofel dena lir ta metetdaktsü. Aser Dawidi ashi, “Oh KIBUBA, ni ne dang mepishir, Ahithofel sentongji tamashi kümdakjangma.”

³²Kodang Dawid Tsüngrem külemdak tenem kolak jagi aru, ajiang, Ark nunger Hushai pei süoshi shisar aser tekolak nung ali mezür pa lenji aru.

³³Dawidi pa dang ashi, “Na kü den ora, na ni asoshi khuret ka asütsü.

³⁴Saka na yimti jagi meyipra, aser Absalom dang, ‘Oh chuba ni ne kilir asütsü; akhidang ni nebuer kilir liasü, anungji tang ni ne kilir asütsü’, ta shira idangji nai ni asoshi Ahithofel sentong madak takok angutsü.

³⁵Putir Zadok aser Abiathar ne den mali no? Anungji kechisa nai chuba kidang nungi angashidir, aji putir Zadok aser Abiathar dang shiang.

³⁶Ajiang, parnok jabaso ana parnok den yangji lir, Ahimaaz, Zadok jabaso, aser Yonathan Abiathar jabaso; aser parnok ajanga nai kechisa angashidir kü dang ashitsü.”

³⁷Anungji Dawid tembar Hushai, yimti jagi Absalom Yirusalemi ia alidang aru.