Read njo 2 SAMUEL 16 Bible Online

2 SAMUEL 16 - njo bible

2 SAMUEL 16

¹ Kodang Dawid tenem kolakji tera süia ao, Mefiboshet kilir Ziba, pa lenji gado jura ka nung menden enoker, amtsük telong noklang ana, tsükmenatzü tejep noklang ka, mei süngjang noklang ka, aser yi mori bener aru.

²Aser chubai Ziba dang ashi, “Kechiba nai itemi bener aru” Zibai langzü, “Gadotemji chubar kibong amentsü asoshi, amtsük aser mei süngjangtemji asangurtem achitsü asoshi, aser yiji shirnok arem nung lula-a kümdir parnok asoshi lir.”

³ Chubai asüngdang, “Aser ne kibur jabaso kong ali” Zibai chuba dang langzü, “Ajiang, pa Yirusalem nung alir; kechiyong pai ashi, Tanü Israel kidongi kübu yimli kü nem meyipa agütsütsü.”

⁴Idangji chubai Ziba dang ashi, “Ajiang, Mefiboshet meyong ajak ne meyong lir.” Zibai ashi, “Ni akhümtsübu sayur, ne madang teti ni taochi ngudakjangma, kü kibur chuba.”

⁵Kodang Dawid chuba Bahurimi aru, Sauler kinunger nungi nisung ka adok, shiba tenüng Shimei, Gera jabaso liasü; pai atakatema aru.

⁶Aser Dawider kilir ajak dak lung agi aon. Tang nübur ajak aser temeranger ajak pa teka tajichi aser tabelen liasü.

⁷Shimei atakatema ayimten, “Oadokang, oadokang, na azü tokshiba nisung, tagidak makaba nisung!

⁸Saul shiba menden nung nai chubar, pa kibong azü tokshiba ajak ne madak KIBUBAi mang yangogo; aser KIBUBAi yimliji ne chir Absalom ket nung agütsüogo. Ajiang, ne tesama ne madak lir; kechiyong na azü tokshiba nisung lir.”

⁹Idangji Zeruia chir Abishai chuba dang ashi, “Kechiba iba azü tasü ka ama yagi kü kibur chuba atakatemer? Ni tugudakjang, aser pa tekolak agidi.”

¹⁰Chubai ashi, “Nenok Zeruia chirtem, nenok den ni kechi inyaktsü KIBUBAi pa dang ashiba yong pai atakatemer süra, Dawid atakatemdakjang, ajangla nai kechiba yamai inyak ta shibai ashitsü”

¹¹Dawidi Abishai aser pa kilir ajak dang ashi, “Ajiang, kü jabaso shiba kü zü nungi aru, pai kü taküm bushir; iba Benjamin nunger yagi tang koda tali inyaktsü akok? Pa oda tokjang, aser pa nem atakatemdakjang, kechiyong KIBUBAi pa dang mela.

¹²Ashiko KIBUBAi kü timtem madak reprangtsü, aser tanü ni atakatemba asoshi KIBUBAi tajung agi kü nem shia agütsütsü akok.”

¹³Anungji Dawid aser par nisungtem lenmang nung aodang tenem tezülen tsütsü Shimei ao aser pa aodang atakatem, aser pa dak lung ondaktsü aser anak paloktsü.

¹⁴Aser chuba aser pa den alir nisung ajak aniseter Yordan atong, aser yangji anisüngzük.

¹⁵Absalom aser Israel nisungtem ajak, aser pa den Ahithofel Yirusalemi aru.

¹⁶Kodang Ark nunger Hushai, Dawid tembar, Absalom dangi aru, Hushaii Absalom dang ashi, “Chuba arishia liang! Chuba arishia liang”

¹⁷Absalomi Hushai dang ashi, “Ibai ne tembar dang ne meimji asü? Kechiba nai ne tembar den mao”?

¹⁸Hushai Absalom dang ashi, “Masü, saka KIBUBAi shiba shimtet aser item nüburtem, aser Israel nisung ajak shimtet ni pa meyong asütsü, aser pa den ni alitsü.

¹⁹Ni tanaben shiba dang tenzüktsü? Par jabaso tsüngdang ni metenzüktsü no? Ni nebu tsüngdang tenzükba ama, ni ne den alitsü.”

²⁰Idangji Absalomi Ahithofel dang ashi, “Ne tebilemba shiang, aseni kechi inyaktsü?”

²¹Ahitheofeli Absalom dang ashi, “Nebu züngatsütem shirnok pai kinüktsü toktsü parnok dangi iang; aser Israel ajaki na nebu asoshi tesempatsü kümogo ta angashitsü, aser ne den alir ajak teka tashi ita akümtsü.”

²² Anungji parnoki Absalom asoshi kilem manung süki yanglu; aser Absalomi Israel tsüngdang tebu züngatsürtem dangi ai.

²³Item anogo nungji Ahithofeli agütsüba oji Tsüngrem o nung tongtepa jembiba o ama liasü; yamaji Dawid aser Absalom tenaprongi Ahithofel oji reta agizük.