Read njo 2 SAMUEL 17 Bible Online

2 SAMUEL 17 - njo bible

2 SAMUEL 17

¹Ano Ahithofeli Absalom dang ashi, “Tang ni nisung meyi terana shimdi, aser ni apusotsü aser taonung Dawid sülen aria odi:

²aser pa aniseta aser teka tashi meiti alidang ni pa madaki arutsü, aser pa tsübudaktsütsü; aser pa den aliba nisung ajak ajentsü, aser ni chubaji dang lepzüka yoktsü.

³Aser nisung ajak ni ne dangi kiyimla pei kinungpu dangi aruba ama anir arutsü. Nai nisung ka taküm dang bushir, aser nübur ajak yimjung nung alitsü.”

⁴Aser sentong jagi Absalom aser Israel tambur ajak peladaktsü.

⁵Idangji Absalomi ashi, “Ark nunger Hushai jaang, aser pa tashitsü kechi ali aji asenoki angadi.”

⁶Kodang Hushai Absalom dangi aru, Absalomi pa dang ashi, “Ahithofeli yamai jembiogo, pai ashiba amaji asenoki inyaktsü asü? Aji mesüra nai shiang.”

⁷Idangji Hushai Absalom dang langzü, “Tanbo Ahithofeli jembibaji majung.

⁸Nai metet nebu aser pa nüburtem tashi tulu nisungtem lir, aser moapu nung shirem pei chanu rakzüka bener oadokba shirem ka amai parnok adoka lir. Iba dakji alema nebu rara nung mongyin lir, anungji nisungtem denji aonung malitsü.

⁹Ajiang, tanga pa pei sasa kangla ka nung, mesüra tesem ka nung atsüka lir. Kodang mezüngbuba raradangji nisung ka laodir, shibaisa aji angashidir ashitsü, Absalom sülen anidaker nisung rongnung tepsetogo.

¹⁰Idangji tasü tait nisung shiba mulungjang molusongzü mesüka lir, tetsübu agi khenyongi yimsa-a aotsü; kechiyong Israel ajaki nebu tashi tulu nisung aser pa den alirtemjia tasü tait nisungtem lir ta metet.

¹¹Saka teloktiji tzüyim anasa lisem ama, Dan nungi oda Beersheba tashi Israel ajak ne dangi sentepdaktsütsü ni tebilemba ashir, aser na dena tongbangi aotsü.

¹²Yamaji tesem ka nung pa kong ajurudir asenok pa madaki arutsü, aser azüngtzü ali nung tsükba memetet ama pa dak tsüktsü; aser pa aser pa den alir ajak asenoki kata metoktsütsü.

¹³Pa yimti kati iadokra, idangji Israel ajaki iba yimti jagi lisü bener arutsü, aser asenoki lenten jagi, oda lungsang kata yangji metoktsü tashi atsür aitsü.”

¹⁴Absalom aser Israel nisung ajaki ashi, “Hushai sentongji Ahithofel sentong dang nungi tajungba, kechiyong KIBUBAi Ahithofel sentong tajungji tamakok kümdaktsütsü mela, angji KIBUBAi Absalom madak tamajung bener arutsü.”

¹⁵Idangji putir Zadok aser Abiathar dang Hushaii ashi, “Yamai Ahithofeli Absalom aser Israel tamburtem nem shisatsü agütsü; aser yamai ni shisatsü agütsüogo.

¹⁶Hushaii ano tanaben ashi, Karaa oang! Dawid dangi osang yokang, pa dang ayongküm nung mena teli ta shiang aser taonungsa Yordan atena oang ta shiang; aji mesüra chuba aser par nisung ajak meyokadoktsü.”

¹⁷Tang Yonathan aser Ahimaaz Enrogel nung ata-a liasü; kilitsür kati oli parnok dang shili ta asü, aser parnoki oa Dawid chuba dang shili asü; kechiyong parnok yimti jagi aibaji shinga nema mungudaktsütsüla.

¹⁸Saka tebur chanu kati parnok ngua Absalom dang ashi; anungji tenaprong yakta oadok, aser Bahurim nung ki kati aru, shiba tzübu ka par kima nung liasü; aser parnok ajagi alu.

¹⁹Nisungba tebutsü jagi sü ka bena arua tzübubangji lembanga yutsü, aser iba manung tsük yashia apu; aser iba indang shingaia kecha memetet.

²⁰Absalom kilirtemji tetsür dangi aru parnoki asüngdang, “Ahimaaz aser Yonathan kong ali” Tetsür jagi parnok dang langzü, “Parnok ayonglen tzü jagi tuogo.” Aser parnoki bushi saka parnok mangu, anungji parnok Yirusalemi meyip.

²¹Parnok or külen, parnok tzübu nungi adoker oa Dawid chuba dang parnoki ashi, “Nenoki apusoang, tzü ajanga yakta oang; kechiyong na anema Ahithofeli yamai tasa agütsüogo.”

²²Idangji Dawid aser pa den alir nisung ajak arameso, aser parnok Yordan ajanga ao: anepdang sangwa dangbo parnok Yordan ajanga maor kata maliasü.

²³Kodang Ahithofeli pai tasa agütsüba mebenshi ta angu, pai pa gado nung menden renem, aser par yimti-i oadok, aser pei ki tiptema ayu, aser pa sasa soseta asü, aser pa tebu leper nung arem.

²⁴Idangji Dawid Mahanaimi arudang Absalom aser Israel nungertem Yordan ajanga ao.

²⁵Yoab melen temeranger telok madak Absalomi Amasa yutsü. Amasaji Ishmael nunger nisung ka tenüng Ithra jabaso liasü, pai Nahas jala Abigal agi, laji Yoab tetsü Zeruia tenu liasü.

²⁶Israel aser Absalom Gilead linük nung anen.

²⁷Kodang Dawid Mahanaimi aru, Ammon nunger Rabba nungi Nathan jabaso Shobi, aser Lodebar nungi Ammiel jabaso Makir, aser Gilead nunger Barzillai Rogelim nungi,

²⁸yiptentem, susatem, aser ali potem, wheat tsük, barley tsük, chiyungtsü, kongnüng, matsüklashi aser luli

²⁹ninang mojitzü aser mamatzü lung, aser kiset shiruru mamatzü nungi, Dawid aser pa den alirtem achitsü asoshi bener aru; kechiyong parnoki ashi, “Nisungtem arem nung yaseta aser aniseta aser tzüraseta lir.”