Read njo 2 SAMUEL 18 Bible Online

2 SAMUEL 18 - njo bible

2 SAMUEL 18

¹Dawidi pa den alir nisungtem züngdang, aser parnok madak meyirijang arkotong aser noklang arkotong yutsü.

²Dawidi temeranger telokji yok, shilem asem nung ka Yoab kübok, shilem asem nung ka Yoab tenu Zeruia jabaso Abishai kübok, aser shilem asem nung ka Git nunger Ittai kübok yok. Aser chubai nisungtem dang ashi, “Nia kü sasa nenok den aotsü.”

³Saka nisungtemi ashi, “Nabo maotsü, kechiaser onok jena ora parnoki onok indang mebilemtsü. Onok tesadang ka süakasa parnoki onok indang mebilemtsü. Saka nai onok meyi ter langa lir, aji asünung yimti nungi nai onok dangi teyari yok tajungba lir.”

⁴Chubai parnok dang langzü, “Nenok madang kechi tajungtiba lir aji ni inyaktsü.” Anungji temeranger telok noklang noklang aser meyirijang meyirijang aodang chubai süngkhüm anasa noktak.

⁵Aser chubai Yoab, Abishai aser Ittai dang ozüng agütsü, “Kü tenüng nung asangur Absalom dang apayua benshiang.” Aser nisung ajaki Absalom indang chubai tanishirtem dang ozüng agütsübaji angashi.

⁶Anungji temeranger telokji Israel anema moapu jagi ao: aser tongbangji Efraim arem nung rara.

⁷Aser yangji Israel nisungtem Dawid tenzükertemi akok, aser iba anogo nungji meyi metsü tepset.

⁸Tongbangji linük ajak nung prokshi, aser iba anogo nung nok dang nungi aremi nisung tali meyokadok.

⁹Absalom Dawid tenzükertem den ajurushia ata, aser Absalom kor nung sanga liasü, aser korji sülemdong tulu ka süngsang temelem küboki ao, aser pa tekolak sülemdong nungji akang akanga zükokadok, aser pa anüng aser ali tsüngda nung sangzüa toktsür korjibo ojen ao.

¹⁰Aser aji nisung kati ngua Yoab dang ashi, “Ajiang, ni Absalom sülemdong ka nung sangzüa angu.”

¹¹Pa dang ashiba nisung dangji Yoabi ashi, “Kechi, nai pa angu! Kechiba idangjisa nai pa lepzüka meyok? Ni ne nem pelashishia taribi telong ter aser peremsen ka agütsüla.”

¹²Saka nisung jagi Yoab dang ashi, “Kü ket nung taribi telong meyi ka am-a liaka ni chubar chir anema kü teka masangtsü: kechiyong onoki angashia chubai na Abishai aser Ittai dang mela-a ashi, Kü mechi asangur Absalom kümzükang.

¹³Aji oda ni pa taküm anema ashikülaka inyaka lira aser chuba nungi kecha miima mali, idangjibo na ne sasa atsüngena noktakla.”

¹⁴Yoabi ashi, “Ni ne den iba amai mapang meindoktsü.” Aser pai pa ket nung sangja asem am, aser Absalom sülemdong nung taküm alidang pa temulungjang nung tsüloktsü.

¹⁵Aser Yoab nok o nü abener asangur teri Absalom meketbang aser pa tepset.

¹⁶Idangji Yoabi jangzü apu, aser temeranger telok Israel aria aoba nungi meyipa aru, kechiyong Yoabi parnok sot.

¹⁷Parnoki Absalom bena arua arem nung ongken tulu ka nung enoktsü, aser pa manung lungnang tulu ka nanga yutsü; aser Israel ajak nisung shia pei kidangi ajen.

¹⁸Tang Absalomi pa taküm alidang pa asoshi chubar lenten nung tongshi ka azünga ayu, kechiyong pai ashi, “Ni kü tenüng bilemteta ayutsü jabaso mali.” Anungji pai tongshiji pa tenüng agi aja, aser aji tanü tashi Absalom tongshi ta ajar.

¹⁹Idangji Zadok chir Ahimaazi ashi, “Ni tang chuba dangi osang bener oda KIBUBAi pa tsükchirtem tashi nungi pa kümzükogo ta ashitsü asema odi.”

²⁰Yoabi pa dang ashi, “Na tanü osang bener maotsü, nai tanga anogo ka nung osang bener aotsü akok saka tanübo nai osang kecha mabentsü, kechiaser chubar chir süogo.”

²¹Idangji Yoabi Kushi nungba dang ashi, “Oang, chuba dang nai kechi angu shiang.” Kushi nungbai Yoab madang apudak, aser asema ao.

²²Idangji Zadok chir Ahimaazi tanaben Yoab dang ashi, “Kechi arudir arung, nia Kushi nungba sülen asemdi” aser Yoabi ashi, “Osang asoshiji na kecha tajangzük mangutsü ta meteter na kechiba asemtsü, kü chir.”

²³Pai ashi, “Kechi arudir arung, ni asemtsü.” Anungji pai pa dang ashi, “Asemang.” Idangji Ahimaaz lenten lenmang nungji asem, aser Kushi nungbaji ajatet.

²⁴Tang Dawid süngkhüm ana tsüngda nung mena liasü, aser tanükerji süngkhüm kilem jara jagi atu, aser kodang pai tenük rangketa yoka reprang, pai nisung ka kija asemba angu.

²⁵Aser tanüker jagi chuba dang ashi. Aser chubai ashi, “Pa kija süra, pa bang osang bena lir.” Aser paji anasai aru.

²⁶Tanüker jagi tangar nisung ka aruya angu, aser tanüker jagi süngkhümnükerji jar ashi, “Ajiang, tangar kata kija asemdagi! Chubai ashi, paia osang bener arur.”

²⁷Tanüker jagi ashi, “Ni bilem nung tamasa asembajibo Zadok chir Ahimaaz asemba mesüker.” Aser chubai ashi, “Pa nisung tajung, aser osangtajung den arur.”

²⁸Idangji Ahimaazi chuba dang ayimoktsütsü, pa jak alilen shir mechioker ashi, “KIBUBA ne Tsüngrem temoatsüba sang, shibai kü kibur chuba anema teka mekangertem bendanga agütsü.”

²⁹Chubai ashi, “Asangur Absalom junga lir ma?” Ahimaazi langzü, “Yoabi kodang ne tenzüker yok, ni rongrongshishi tulu ka angu, saka kechiar ni memetet.”

³⁰Chubai ashi, “Aenshiang, aser yangi noktakang.” Anungji pai aenshi aser marakzüi noktak.

³¹Idangji Kushi nungba arua ashi, “Kü kibur asoshi osangtajung! Kechiyong KIBUBAi tanü ne ket nung na anema apusor tashi ajak bendanga agütsüogo.”

³²Chubai Kushi nungba dang asüngdang, “Asangur Absalom junga lir ma” Aser Kushi nungbai langzü, “Kü kibur chuba tsükchirtem, aser tamajung asoshi na anema apusor ajak, iba asangurji mesüka sangma.”

³³Idangji chubaji kanga temulung raksa, aser süngkhüm temalen taktang jagi tua ajeb; aser pa aodang, pai ashi, “Oh kü chir Absalom, kü chir, kü chir Absalom! Ne melen niang sülasang. Oh Absalom, kü chir, kü chir”