Read njo 2 SAMUEL 19 Bible Online

2 SAMUEL 19 - njo bible

2 SAMUEL 19

¹“Ajiang chuba jebdagi aser Absalom asoshi mang yimdagi,” ta Yoab dang metetdaktsü.

²Anungji iba anogo nung takokji nisung ajak asoshi mangyimba aküm; kechiyong iba anogo nung nisungtemi ashi, “Chubai pei chir asoshi jashia lir.”

³Aser tongbang nung temerangertemi akseta ajenba mesüka parnoki iba anogoji yimti jagi yaka mesüi ai.

⁴Chubai pei tejak nembang, aser ola tulu agi ayimten, “Kü chir Absalom, Oh Absalom, kü chir, kü chir”

⁵Idangji Yoab chuba kidangi aita ashi, “Tanü nai ne tenzüker ajak maksü agi tejak nembangtsüogo, shirnoki tanü ne taküm, jabaso, jalatem aser ne kibutsütem aser ne züngatsütem taküm kümzük,

⁶kechiaser na sempartem nai meimer aser na meimertem nai sempar. Kechiyong tanishirtem aser tenzükertem ne matsüngdang kecha masü ta tanü nai jangjadaktsüogo; kechiyong tanü ni ya ajiteter oda Absalom taküm lilasang aser onokang ajak sür lilasang, idangjiang na pelala.

⁷Tang aji asünung aramesoang, oagi ne tenzükertem süngzükdakja jembiang, kechiaser KIBUBA agi ni azüngashir, na morabang taonung ne den nisung kata malitsü; aser ibai na asoshi ne asangwa nungi tang tashi ne madak tamajung aruba ajak dang nungi tamajungba asütsü.”

⁸Idangji chubai aramesoa süngkhüm nung amen. Aser nisung ajak dang ashi, “Ajiang, chubaji süngkhüm nung mena lir.” Aser nisung ajak chuba madangi aru. Tang Israel nunger ajak pei kidangi jena or liasü.

⁹Aser Israel kin ajonga bangsentepa ashi, “Chubai asen tsükchirtem ket aser Filistia nunger ket nungi asenok kümzük; aser tang pa Absalom mechi nenok nungi jena ogo.

¹⁰Saka Absalom, shiba asenok madak asenoki mezüja shimtet, tongbang nung süogo. Aji asünung kechiba chuba tanaben bener arutsü indangbo shingaia kecha mejembir?”

¹¹Chubai iba osang putir Zadok aser Abiathar dangi yoka ashi, Yihuda tamburtem dang shiang, Kechiba chuba par kidangi meyipa bener arutsü indang Israel ajaki jembiba chuba dangi arur, nenok ang tesütiba asür?

¹²Nenok kü adianutem, nenok kü teret aser kü shi, ajangla kechiba chuba meyipa bener arutsü nenok tesütiba asür?

¹³Aser nenoki Amasa dang shiang, “Na kü teret aser kü shi masü no? Tang nungi Yoab melen na kü temeranger telok tanishir ka mesüra Tsüngremi kü dang yamaji, aser ano talia inyakangma.”

¹⁴Pai Yihuda pur ajak mulungjang nisung ka ama atsüa aru; aji asünung parnoki chuba dangi o yok, “Meyipang, na aser ne tenzüker ajak.”

¹⁵Anungji chuba Yordani meyipa aru. Aser oagi chuba lenji aser Yordan ajanga chubaji anir arutsü Yihuda Gilgali aru.

¹⁶ Aser Gera chir Shimei, Benjamin nunger, Bahurim nungi, Yihuda nisungtem den Dawid chuba ajurutsü ilunga apuso.

¹⁷Aser pa den Benjamin nisung meyi ka liasü, aser Saul kidang tenzüker Ziba, pa den jabaso terpungu aser pa tenzüker metsü, asema chuba madangi Yordani alu.

¹⁸Aser chubar kinunger anir arutsü, aser pai kechi junger ta bilemer aji inyaktsü parnoki ao. Gera jabaso Shimei, pai Yordan ajanga arudang pai chuba madang apudak.

¹⁹Pai chuba dang ashi, “Kü kiburi kü dak tai tesot ma mesüra kü kibur chubai Yirusalem toktsüba anogo nung ne tenzükeri koda tai inyak aji tebilemtetma; chubai aji temulung nung teyuma.

²⁰Kechiyong ne tenzükeri ni temenen menaogo ta metet; aji asünung, ajiang, kü kibur chuba lenji Yosef kidong ajak nungi mezüngbuba tanü ni arua lir.”

²¹Zeruia chir Abishai langzü, “Iba asoshi Shimei mesüdaktsütsü no, kechiaser pai KIBUBAi mezütsüba atakatemogo”

²²Saka Dawidi langzü, “Nenok Zeruia chirtem, nenok tanü kü anemertem ama asütsüba, ni nenok dang kechi inyaktsü? Tanü Israel nung kar südaktsütsü asü? Kechiyong ni tanü Israel madak chuba ta ni memetet asü.”

²³Aser chubai Shimei dang ashi, “Na masütsü” ta azüngashia ashi.

²⁴ Saul semchir Mefiboshet chuba lenji alu; chuba pila-a aoba anogo nungi pa kümzüka meyipa aruba anogo tashi, pai pa tetsüng anebalu masü, mesüra pa bangsemo memejep, mesüra pa süoshi meshitok.

²⁵Kodang chuba lenji pai Yirusalem nungi aru, chubai pa dang asüngdang, “Mefiboshet, kechiba na kü den mao”

²⁶Pai langzü, “Kü kibur, Oh chuba, kü kilir Zibai ni ashioktsü; kechiyong ne kiliri pa dang ashi, ni chuba den aotsü ni amentsü renemjang. Kechiyong ne kilir tetsüng tatsük lir.

²⁷Pai ne kilir kü kibur chuba dang sensamasatsü. Saka kü kibur chuba Tsüngrem tenyar mesüka lir; aji asünung ne madang ajungba ka inyakangma.”

²⁸Kechiyong kübur kinungerbo ajak kü kibur chuba madang tasütsü purtem dang lir; saka ne kilirbo shirnok ne langbang nung chiyunger parnok rongnung yutsüogo. Aji asünung joko chuba dang ano ayimtentsüba ni kechi tim aka?

²⁹Chubai pa dang asüngdang, “Kechiba ne indang nai ano jembir? Ni ashir, na aser Ziba na tsüngda senmangji lemdangang.”

³⁰Aser Mefiboshiti chuba dang langzü, “Hau, kü kibur chuba kümzüka arua ali nungji, pa nem ajak agidakjang.”

³¹ Gilead nunger Barzillai Rogelim nungi alu; aser pai chuba Yordan ajanga meinoktsütsü ao.

³²Tang Barzillai kanga tambur oda küm tir liasü: aser pai chuba nem pa Mahanaim nung alidang chiyungtsü agütsü; kechiyong pa kanga takar liasü.

³³Aser chubai Barzillai dang ashi, “Na kü den arung, aser ni na asoshi Yirusalem nung anebalutsütsü.”

³⁴Barzillai ashi, “Ni chuba den Yirusalemi atutsüsa, ni ano arishi küm anogo kwika alitsü?

³⁵Ni tanü küm tir lir, tajung-tamajung ni metetdi ma? Ne kilir pai kechi achir mesüra pai kechi ajemer aji chidangtetdi ma? Tebur ken tener ola mesüra tetsür ken tener dang ni ano angatsü kokdi ma? Ajangla kechiba ne kilirji kü kibur chuba atema khuret talila ka kümdaktsütsü?

³⁶Ne kilir chuba den Yordan ajanga tatsüka aotsü akok. Kechiba chubai kü nem iba amai lepa agütsütsü?

³⁷Yimlibilema ne tenzüker meyipa odakjang, angji ni kü yimti nung, kübu aser kütsü leper anasa asütsü akoktsü. Saka yangi ne kilir Kimham lir; pa kü kibur chuba den odakjang; aser pa asoshi ne dang kechisa ajung aji inyakang.”

³⁸Chubai langzü, “Kimham kü den ajanga aotsü, aser ni pa asoshi kechi ne madang ajung aji inyaktsü; aser nai kü nem inyakdaktsünüba ajak ni na asoshi inyaktsü?”

³⁹Aser nisung ajak den chubaji Yordan ajanga ao, aser chubai Barzillai dak tebang mesep, aser pa moatsü; aser pa pei alidaki meyipa ao.

⁴⁰Anungji chuba Gilgali ajanga ao, aser pa den Kimham dena ajanga ao; aser Yihuda nübur ajaki, aser ano Israel pur tesadangi chubaji ajanga anir aru.

⁴¹Aser ajiang, Israel pur ajak chuba dangi arua ashi, “Kechiba asen adianu Yihuda purtemi na auür oadok, aser chuba aser par kinungertem, Yordan ajanga, aser pa den Dawider nisungtem bener aru.”

⁴²Yihuda pur ajaki Israel purtem dang langzü, “Kechiaser chubaji onok sosem ana lir: ajangla kechiba iba atema nenok ain adoka alir? Chubar meyong onoki chitsü asü? Mesüra pai onok nem sempet agütsü asü”

⁴³Idangji Israel purtemi Yihuda pur dang langzü, “Chuba dak onok shilem ter lir, aser ano nenok dang nungi onok tali lir; ajangla kechiba nenoki onok sensatsür? Onok chuba meyipa anir arutsü jembiba onok mezüngbuba masü no?” Saka Yihuda purtem oji Israel pur o dang nungi tesashiba liasü.