Read njo 2 SAMUEL 21 Bible Online

2 SAMUEL 21 - njo bible

2 SAMUEL 21

¹Dawid tendak küm asem ayawara liasü; aser Dawidi KIBUBA tejak bushi. Aser KIBUBAi ashi, “Ibai Saul asoshi aser azü tokshiba pur kibong asoshi lir, kechiaser pai Gibeon nunger südaktsü.”

²Chubai Gibeon nunger aja, aser parnok den jembi. Tang Gibeon Israel chirtem masü, saka Amor nunger tanüngbatem lir; aser Israel chirtemi parnok dak mekongshitsü azüngashiaka, Sauli Israel aser Yihuda nunger indang tamajung bilema parnok tepsettsü bushi.

³Dawidi Gibeon nunger dang asüngdang, “Nenok asoshi ni kechi inyaktsü? Nenoki KIBUBA senmang moatsütsüsa ni koma teputepdaktsüba adokdaktsütsü?”

⁴Gibeon nungeri pa dang langzü, “Onoki, Saul mesüra par kibong nungi taribi mesüra hon meshitsü asoshi masü; mesüra Israel nung nisung kar danga südaktsütsüji onok asoshi masü” Aser pai ashi, “Nenok asoshi ni kechi inyaktsü”

⁵Chuba dang parnoki mepishi, “Nisung shirnoki onok meyok aser onok samatsütsü tasa asa, aser Israel litsü ajak nung onok talidak makai lidaktsütsü atong,

⁶oda parnok jabaso tenetji onok nem agüjang, angji onoki KIBUBA madang Gibeon nung KIBUBA tenem manung parnok soseta südaktsütsü.” Chubai langzü, “Ni parnokji agütsütsü.”

⁷Saka chubai KIBUBA tenüng nung tezüngzüktepba, Dawid aser Saul jabaso Yonathan tsüngda nung alibayong Mefiboshet taküm kümzük.

⁸ Saka Aia jala Rizpa, lar jabaso anaji, Armoni aser Mefiboshet, shirnok lai Saul nem sotsü; aser Saul jala Merab jabaso pungu, shirnok lai Meholat nunger Barzillai jabaso Afriel nem sotsü, parnok chubai agi;

⁹aser pai parnok Gibeon nunger ket nung agütsü, aser parnoki parnok KIBUBA madang tenem nung soseta südaktsü, aser parnok tenetji külemi sama. Aluruwa mezüng anogotem nung, barley tsük aruba tetenzüklen parnokji südaktsü.

¹⁰Idangji Aia jala Rizpai anemsü bena aru, aji la asoshi lungma nung lema ayu, aser aluruwa tetenzük nungi anüng nungi tzünglu parnok dak metsük tashi ali, aser anüng ozütem iba manung anüngdang arutsü lai memela, mesüra moapu shirurutema aonung marudaktsü.

¹¹Kodang Saul züngatsü Aia jala Rizpai kechi inyak aji Dawid dang metetdaktsü.

¹² Dawidi oa Yabeshgilead nisungtem nungi Saul aser par chir Yonathan teret bena aru. Filistia nungertemi Gilboa nung Saul tepsetba anogo nung, kong Filistia nungertemi parnok tepset, Bethshan lentongbang lenjem nungi parnoki auya bena oa liasü;

¹³aser idak nungjagi pai Saul aser pa chir Yonathan teret bener atu; aser shirnok soseta südaktsü parnok teret parnoki benden.

¹⁴Parnoki Saul aser pa chir Yonathan Zela nung Benjamin linük tebu Kis leper nung arem, aser chubai melaba ajak parnoki inyak, aser iba sülen Tsüngremi linük asoshi mepishiba anga.

¹⁵Filistia nungeri tanaben Israel den rara, aser Dawid pa tenzükertem den külemi lua Filistia nunger anema parnoki rara aser Dawid ania aküm.

¹⁶Ish-bibenob aso tulutem nungi jakzükba ka, shiba nü odangba merang seret semer tesadang liasü, aser shiba nok tasen ka sema liasü, pai Dawid tepsettsü bilem.

¹⁷ Saka Zeruia chir Abishai Dawid yaritsü aru, aser Filistia nungba den rara aser pa tepset. Idangji Dawider nisungtemi pa dang mepishi, “Nai Israel milen remsepdakja lir, na joko onok den tongbangi maotsü.”

¹⁸Iba sülenji ano Gob nung Filistia nunger den tanaben rara liasü, idangji Saf shiba aso tulutem nungi jakzükba liasü, paji Hushat nunger Sibekai tepset.

¹⁹Ano Gob nung Filistia nunger den tanaben rara liasü; aser Bethlehem nunger Yaareoregim jabaso Elhanani Git nunger Goliat tepset, pa nüdongji sütaker alem amai liasü.

²⁰Aser ano Gat nung tanaben rara liasü, yangji soja asoba nisung ka teka shia nung temeyong trokrok, aser temepu shia nung temesüla trokrok, ajak agi metsürpezü keta liasü, aser pa-a aso tulutem nungi jakzükba liasü.

²¹Kodang pai Israel anema ayongzük, Dawid tenu Shimei jabaso Yonathani pa tepset.

²²Par pezüji Gat nung aso tulu kin nungi jakzükba liasü, aser parnok Dawid aser pa tenzükertem ket nung lao.