Read njo 2 SAMUEL 22 Bible Online

2 SAMUEL 22 - njo bible

2 SAMUEL 22

¹KIBUBAi Dawid pa tsükchirtem ket aser Saul ket nungi kümzük, pai KIBUBA dang iba ken ya aten,

²KIBUBA kü lung kü mitsa, aser kü kümzükba lir.

³Kü Tsüngrem, kü lung, shiba dak ni jenoker, kü jong aser kü tekümtet, kü mitsa aser kü jenokdak. Kü kümtetdakba, nai ni tekangshi nungi kümzüker.

⁴Ni KIBUBA dang aja, shiba tenüng asangtsü tetemsü lir. Aser ni tsükchirtem nungi kümzüka lir.

⁵Tasüba tzüsem agi ni meketbanga liasü, tesamatsü tzükeprak agi ni aoksadaktsü.

⁶Sheol lisü agi ni naibanga liasü, tasüba sang agi noktanga liasü.

⁷Kü tejashi nung ni KIBUBA dang aja; kü Tsüngrem dang ni aja. Pa tenla ki nung pai kü ola angashi, aser kü ayimtenba pa narongi aru.

⁸Idangji alima anokshi aser atenten, anüng tamentakdaktem arakzü aser anokshi, kechiaser pa rasa-a liasü.

⁹Pa teni nungi mokozü adok, aser pa tebang nungi temeyokba mi; pa nungi mijang twangwang jangrua adok.

¹⁰Pai anüng mokremdaktsü, aser alu; pa tetsüng kübok ammang temelem liasü.

¹¹Pai cherub nung amen, aser yima ao; pa mopung tashikang manung angu.

¹²Pai pa meketa akhümbanga ammang tzütem adenshia, anüngtem mepet temelem yanglu.

¹³Pa madang sentsüprang agi Mijang jangrudaktsü.

¹⁴KIBUBAi anüng nungi tsüngmok amok, aser tematibai pa ola adok.

¹⁵Pai lijakjang yok, aser tsükchirtemji prokshidaktsü; tsüngi-tsüngpret agi parnok jenshidaktsü.

¹⁶Idangji tzüyim bonglangtem ngua kümdaktsü, alima tamentakdaktem moa kümdaktsü, KIBUBAi parnok arürtsüba agi, pa teni tangu sashiba agi adokdaktsü.

¹⁷Temalen nungi alua pai kü dak sot, tzü jenti nungi pai ni agitet;

¹⁸Kü tashi tait tsükchir nungi pai ni kümzük. Ni sempartem nungi kümzük; kechiyong parnok ni asoshi onsara tashi tulu liasü.

¹⁹Kü lendong anogo nung parnok kü madaki aru; saka KIBUBAi ni kümzüka liasü.

²⁰Tesademdak tesem kati ano pai ni anir adok: pai ni kümzük, kechiaser pai kü dak pela.

²¹Kü temeshiba yari KIBUBAi ni ajangzükdaktsü: kü teka merükba yari pai kü nem meyipa agütsü.

²²Kechiyong ni KIBUBA lenmang nung jaja, aser kü Tsüngrem nungi asükma pila-a mao.

²³Kechiyong pa ozüngtem ajak kü madang liasü: aser pa telatet ozüngtem nungi ni mepila.

²⁴Pa madang ni tai atongtsü makai liasü, aser ni tai nungi pila-a liasü.

²⁵Aji asünung KIBUBAi kü temeshiba yari; pa nükdang ni merükteta aliba yari meyipa agütsü.

²⁶Tamang kateter dang nai ne sasa tamang katetba, tai makaba nisung dang nai ne sasa tai maka sayutsü;

²⁷Temerüker dang nai ne sasa temerük sayutsü, aser tekirak pur dang nai ne sasa togima sayutsü.

²⁸Nai ajemalurtem kümzüktsü; Saka asükümer ludaktsütsü, ne tenük parnok madak lir.

²⁹Kechiyong na kü milen lir, Oh KIBUBA; aser KIBUBAi kü ammang sangwadaktsütsü.

³⁰Hau, na ajanga ni temeranger telok akureptsütsü akok, aser kü Tsüngrem ajanga ni jara manung jokdanga akok.

³¹Tsüngrem asoshibo, pa lenmang tabensa; KIBUBA oji tentangogo; pa dak temulung alemertem asoshi paji jong ka lir.

³²KIBUBA dak alema Tsüngrem shiba lir? Aser asen Tsüngrem dak alema shiba lung lir?

³³Tsüngrem kü tashi tait mitsa lir: aser kü lenmang kümzüka yanglutsü.

³⁴ Pai kü tetsüng mesü tsüng mesüka kümdaktsü; aser temalen talang nung kümzüka yutsür.

³⁵Rara asoshi pai kü teka sayuteter; anungji kü tepen agi yongmenyin lijak azüa arur.

³⁶Ano nai ne tekümtet jong kü nem agütsüogo: aser ne teyari agi ni tulu kümdaktsü.

³⁷Nai kü kübok kü jenjang sadema kümdaktsü, aji asü nung kü tsüng majudok.

³⁸Ni kü tsüchirtem aria ao, aser parnok samatsü; aser parnok mesamatsü tashi ni tanaben memeyip.

³⁹Parnok mesaktettsüsa ni parnok ajensatsü aser parnok laoa lir. Hau, parnok kü tsüng kübok laoa lir.

⁴⁰Kechiyong tongbang asoshi nai kü dak tashi agi nangri kangtsü, nai kü tskchirtem kü tetsüng kübok yutsü.

⁴¹Kü sempartem ni leptoktsütsü asoshi, nai ano kü tsükchirtem kü dangi parnok terongdong tendaktsü.

⁴²Parnoki reprang, saka kümzüktsü shinga maliasü; parnoki KIBUBA dang ayimten, saka parnok dang pai melangzü.

⁴³Ni parnok ali auyi tila küma menüngsa, yimdong lishi ama ni parnok ajensatsü, aser prokshidaktsü.

⁴⁴Nai ano kü nübur raratepba nungi ni kümzük; nai ni kintem tekolak asütsü yutsü; ni memetetba nüburtemi ni tenzüktsü.

⁴⁵Aenertemi parnok sasa kü dang hai-haura ka-a tashi angatsü, parnoki kü indang angashili-i, parnoki kü dang tashi angatsü.

⁴⁶Bendangertem temulung azüla-a aotsü, aser parnok sasa atentena parnok mitsatem nungi adoktsü.

⁴⁷KIBUBA taküm lir; aser kü lung temoatsü sangma, aser kü tekümtet lung, kü Tsüngrem ulua kümdakjang:

⁴⁸Tsüngrem shibai ni asoshi mang yangtsür aser kü küboki nisungtem aitdaktsür,

⁴⁹Shibai kü tsükchirtem nungi ni anitet; nai kü anemertem madak uludaktsür, aser tesashi nisung nungi ni kümzüker.

⁵⁰ Anungji, Oh KIBUBA, kin rongnung ni ne nem tenüngsang agütsütsü. Aser ne tenüng asoshi tenüngsang atentsü.

⁵¹Pa chuba nem takok tulu pai agütsütsü; aser pai mezüja shimtetba Dawid dang, aser pa metsü dang teti asoshi yimlibilem sayur.