Read njo 2 SAMUEL 23 Bible Online

2 SAMUEL 23 - njo bible

2 SAMUEL 23

¹Itemi Dawid tatembang otem lir. Yesse chir Dawidi ashir, shiba Tsüngremi ajungket, Yakob Tsüngremi mezüja shimtetba Israel tenüngsang ken tajung atensang.

²KIBUBA tanelai ni ajanga jembir, aser pa o kü meli nung liasü,

³Israel Tsüngremi ashi, Israel Lungi kü den jembi; “Nisung madak ochi shia yimsüsürji Tsüngrem tsübuba nung yimsü asürji,

⁴anü adokdang ama, pa anepdang sangwa ama alitsü, mepet maliba anepdang anü sangwa yaloktsü ama, ali nungi ai adokdaktsüba tzünglu mesüka alitsü.”

⁵Kechiyong Tsüngrem den kü ki yangji mali no? Kechiyong pai tatem maka tezüngzüktepba kü den yanglua lir, kechisarena nung tatongi shia aser kümzüka yanglu; kechiyong pai kü teyari aser kü tejangraba ajak matalokdaktsütsü no?

⁶Kechiyong Tsüngrem metsübur nisung ajak endokadokba mesüka lir; kechiyong parnok teka agi amtsü makok;

⁷Saka parnok dak kongshiba nisung jagi pa sasa merang aser nüdong amer; aser parnok talidak khenyongi parnok mi agi rongtoker.

⁸Itemi Dawider nüngtugu temeranger tanishirtemji lir: Yosheb-basshebet Takemon nunger ashiba parnok asem rongnung ka tongtiba liasü; pai noklang ti anema pa nü mekang aser khenyongi tepset.

⁹Ano temeranger nisung asem rongnung pa den atongbaji Ahohi chir Dodo, par chir Eleazar liasü. Tongbang raratsü Filistia nunger adenshia alidang aser Israel nunger atsünga aodang pa aser Dawidi parnok anema noktang.

¹⁰Pa arameso aser pa teka ania maküm tashi, aser nok nung pa teka menaloka maküm tashi pai Filistia nunger lepzüka yok; aser iba anogo KIBUBAi takok tulu inyak; aser pa sülen nisung tetepsetertem nungi oset alatsü dang aru.

¹¹Pa den atongbaji Harar nunger Agee chir Shamma liasü. Filistia nungeri Lehi nung luli agi sünga aliba linük ka nung külemi sentep, aser Israel purtemji Filistia nunger nungi jena ao.

¹²Saka pai ali tiyong nungji noktak, aser aji noktang, aser Filistia nunger tepset; aser KIBUBAi takok tulu ngudaktsü.

¹³Alu arutsü mapang anasa tongtipur semer rongnungi asem Adullam lungpoki alu, kong Dawid liasü, idangji Filistia nunger telok ka Refaim lenten nung anena liasü.

¹⁴Idangji Dawid mitsa nung liasü; aser Filistia nunger temeranger telokji Bethlehem nung liasü.

¹⁵Dawidi menungraseta ashi, “Oh kari danga Bethlehem tzü süngkhüm anasa alibato kü nem agütsülasang.”

¹⁶Idangji temeranger nisung asem jagi Filistia nunger tanendak nempoka ao, aser süngkhüm anasa aliba Bethlehem tzüji tatet, aser aji Dawid dangi bener aru. Saka pai ibaji majem; pai KIBUBA nem aji shiloktsü.

¹⁷Pai ashi, “Oh, KIBUBA, ni ya meinyaktsüsa kü dang nungi talangka piladakjang. Nisung shirnoki pei taküm bendanga ao parnok zü ni jemdi ma?” Aji asünung iba nung jagi pai majem. Temeranger nisung asemjagi yamaji inyak.

¹⁸Zeruia chir Yoab tenu Abishai semer rongnungji tongtiba liasü. Aser pai pa nü noklang asem anema mekang aser parnokji tepset, aser asem dakji alema khonang ka bener aru.

¹⁹Semer rongnungji pa nüngtugutiba liasü, aser parnok tanishir aküm; saka pai asemjibo matong.

²⁰Yehoiada chir Benaia Kabzeel nungi, tasü tait nisung, mapa tulu inyaker ka liasü, pai Moab nung Ariel chirtem ana tepset. Pai ano alu aser rürjeb tsüka lia molusongzü ka ongken ka nung tepset.

²¹Aser pai Ijip nunger aso tajung ka tepset. Ijip nungbaji pa ket nung nü ka liasü, saka Benaia ajok ka amer alu, aser Ijip nungba ket nungi nüji rakzük, aser pai pei nü agi tsüngset.

²²Itemji Yehoiada chir Benaiai inyak, aser temeranger asem dakji alema khonang bener aru.

²³Semer dang nungi pa nüngtuguba liasü, saka pai asemjibo matong. Aser Dawidi paji pa tanüker kümdaktsü.

²⁴Temeranger semerji itemi liasü: Yoab tenu Asahel, Bethlehem nungi Dodo chir Elhanan;

²⁵Harod nungi Shamma, Harod nungi Elika;

²⁶Palti nunger Helez, Tekoa nungi Ikkesh chir Ira;

²⁷Anathot nungi Abiezer, Hushat nunger Mebunnai;

²⁸Ahoshi nunger Zalmon;

²⁹Netofa nungi Banana chir Heleb, Benjamin nunger Gibea nungi Ribai chir Ittai;

³⁰Pirathon nungi Benaia, Gaash ayong nungi Hiddai;

³¹Arbathi nunger Abialbon, Bahurim nungi Azmavet;

³²Shaalban nungi Eliahba, Yashem, Yonathan chirtem,

³³Harar nunger Shamma, Harar nunger Sharar chir Ahiam;

³⁴Maaka nungi Ahasbai chir Elifelet, Gilo nungi Ahithofel chir Eliam;

³⁵Karmel nungi Herzro, Arbi nunger Paarai;

³⁶Zoba nungi Nathan chir Igal, Gad nunger Bani;

³⁷Ammon nunger Zelek, Zeruia chir Yoab nok o nü abensang Beeroth nung Naharai;

³⁸Ithri nunger Ira, Ithri nunger Gareb;

³⁹Het nunger Uria: ajak agi semer tenet.