Read njo 2 SAMUEL 24 Bible Online

2 SAMUEL 24 - njo bible

2 SAMUEL 24

¹Ano Israel anema KIBUBA ain adoka pai parnok anema Dawid ajungmesoa ashi, “Oang, Israel aser Yihuda züngdangang.”

²Anungji chubai Yoab aser pa den alir temeranger telok tanishirtem dang ashi, “Israel kidong ajak sema, Dan nungi Beersheba tashi oang, aser ni nisung yongzük metettsü asoshi züngdangang.”

³Saka Yoabi chuba dang ashi, “Tang KIBUBA ne Tsüngremi nisungtem züindakjangma, parnok kwika südir saka, noklang bena, aser kü kibur chuba tenük agi aji ngudakjangma; saka kechiba kü kibur chubai iba mapa inyakner?”

⁴Saka Yoab aser temeranger telok tanishirtemi chuba ozüngji angatsüsa aküm. Anungji Yoab aser temeranger telok tanishirtemi chuba tsüngdang nungi Israel nütsüng züngdangtsü ao.

⁵Parnoki Yordan ajanga Aroer nungi tenzük, aser lenten nung aliba nungi, Gad tsütsü aser Yazer leni ao.

⁶Parnoki Gileadi aru, aser yang nungjagi Het nunger lima Kadesi aru; aser parnok Dani aru, aser Dan nungi parnoki meketa Sidoni ao.

⁷Iba sülen Tur mitsa aser Hiv aser Kanan nunger yimtitemi aru; aser tesüba Beersheba nung Yihuda nung Negebi tugu.

⁸Yamaji linük ajak sema parnok ao, ita tuku aser anogo metsü nungang parnok Yirusalemi aru.

⁹Yoabi chuba nem nütsüng yongsük osang agütsü: Israel nung nok amer tasü tait meyi noklang ti liasü, aser Yihuda nungi meyi noklang pungu liasü.

¹⁰Saka Dawidi nisungtemji züngdanger külen pa mulungjangi pa dak atsüng. Aser Dawidi KIBUBA dang ashi, “Ni kechi inyak iba nung ni temenen tulu menaogo; saka tang, Oh KIBUBA, ni ne dang mepishir, ne tenzüker tai temenen bener oadokangma, kechiaser ni kanga tamashi inyakogo.”

¹¹Kodang Dawid anepdang shishi, KIBUBA O Dawider ainkar Gad dangi arua ashi,

¹²“Oang aser Dawid dang shiang, Yamai KIBUBAi ashir, Ni ne nem mapa asem agütsür; item rongnungi ka shimtetang, angji ni ne dang aji inyaktsü.”

¹³Anungji Gad Dawid dangi aru aser pa dang metetdakja ashi, “Ne linük nung ayawara küm asem ne dangi arudaktsütsü asü? Mesüra na ne tsükchirtemi arishidang ita asem jena aotsü? Mesüra ne linük nung anogo asem tashitak wara adokdaktsütsü? Tang nai shisadangang aser ni yoksang dangi kechi telangzüba agütsütsü bilemdangang.”

¹⁴Dawidi Gad dang ashi, “Ni timtem tulu nung lir, tang asenoki KIBUBA ket nung tsükdi; kechiyong pa yimlibilem tulu lir; saka ni nisung ket nung tetsükdaktsü.”

¹⁵Anungji anepdang nungi mapang tatakzük tashiji KIBUBAi tashitak wara yok, aser yangji Dan nungi Beersheba tonga nisung meyi neter asü.

¹⁶Kodang tenyari Yirusalem tsütsü samatsütsü pa teka songtok, KIBUBAi tamajung nungi pa mulung atsüshi, aser nisung rongnung tesamatsüba tenyar dangji ashi, “Ojang sang; tangbo ne teka sotadokang.” Aser KIBUBA tenyarji Yebus nunger Arauna motsüngnem anasa liasü.

¹⁷Idangji Dawidi KIBUBA dang, pai nisungtem samatsüba tenyarji angudang jembi, “Angang, ni temenen benshiogo, ni mejungi inyakogo; saka item santemi kechi inyak? Yimbilema ne teka ni anema aser ozü kibong anema sangma.”

¹⁸Panüji Gad Dawid dangi arua pa dang ashi, “Tuang, Yebus nunger Aruana motsüngnem manung KIBUBA asoshi tekülemdak ka yangluang.”

¹⁹Gadi ashiba ama Dawidia KIBUBAi melaba ama atu.

²⁰Aser Araunai repranga yok, aser chuba aser pa tenzükertem pa tsütsüi aruya angu: aser Arauna tugua pai chuba madang pa tejak alilen shia apudak.

²¹Aser Araunai ashi, “Kü kibur chuba kechi atema aru” Aser Dawidi langzü, “KIBUBA dang tenladak ka yanglutsü atema na nungi motsüngnem alitsü, angji nisungtem nungi temerenshiji anenadoktsü.”

²²Araunai Dawid dang ashi, “Kü kibur chubai pa tsüngdang kechi ajung aji agiang aser tenla-ang: tarongba tenla asoshi nashi, aser tsük netzükba oset aser süng asoshi süngratem yangi lir:

²³ya ajak, Oh chuba, Araunai chuba nem agütsür.” Aser Araunai chuba dang ashi, “KIBUBA ne Tsüngremi na agizükangma.”

²⁴Saka chubai Arauna dang langzü, “Masü, saka ni aji na nungi jenjang ka agi alitsü: ni angati anguba agi kü KIBUBA kü Tsüngrem nem tarongba tenla magütsütsü.” Anungji Dawidi motsüngnem aser nashitemji taribi shekel tenem agi ali.

²⁵Yangji Dawidi KIBUBA nem tenladak ka yanglu, aser tarongba tenla aser yimjung tenlatem agütsü. Anungji linük asoshi temepishiba KIBUBAi langzü aser Israel nungi temerenshiji pila.