Read njo 2 SAMUEL 3 Bible Online

2 SAMUEL 3 - njo bible

2 SAMUEL 3

¹Saul aser Dawid kinunger tsüngda nung rara talangka liasü, aser Dawid tashi taitba taitba aküm, saka Saul kinunger tashi maitba maitba aküm.

²Hebron nung Dawid nem jabasotem sotsü: aser par tambusangji Amnon, Yezreel tsür Ahinoam chir.

³Tanabubaji Karmel nunger Nabal kibutsü Abigail nungi Kileab; tasembubaji Heshur chuba Talmai jala Maaka chir Absalom;

⁴pezübubaji Haggit chir Adonija; pungububaji Abital chir Shefthia;

⁵aser trokbubaji Dawid kibutsü Egla nungi Ithream. Parnokji Hebron nung Dawid nem sotsü.

⁶Saul kidong aser Dawid kidong tsüngda nung rara aliba mapang nung, Saul kidong Abneri pa sasa tashi ita yanglu.

⁷Tang Saul tezüngatsü ka tenüng agi Rizpa, Aia jala liasü: aser Ish-bosheti Abner dang ashi, “Kübu tezüngatsü dangi kechiba na ao?”

⁸Idangji Ish-boshet o nung Abner kanga ain adoka ashi, “Ni Yihuda meyong azü kolak asü?” Tanü ni Saul kidong, pa adianu nunger aser pa tembartem dang temeim sayuogo, aser Dawid ket nung na bendanga magütsü; aji saka nai tanübo iba tetsür indang kü dak tai agütsür.

⁹Tsüngremi Abner dang yamaji inyakang, aser KIBUBAi kechi Dawid dang azüngashi aji ni pa asoshi meinyaktetrabang, ano talia inyakang;

¹⁰ Saul kidong nungi yimliji meyipteptsü, aser Dawid chuba menden Israel aser Yihuda madak, oda Dan nungi Beersheba tashi yanglutsü.”

¹¹Aser Ish-bosheti Abner dang o kata melangzü, kechiaser pai pa tsübu.

¹²Abneri osang benertem Hebroni Dawid dangi yoka ashi, “Ali ya shir meyong? Kü den ne tezüngzüktepba yangluang, aser ajiang, Israel ajak ne dangi bener arutsü kü teka ne den alitsü.”

¹³Dawidi ashi, “Junger, ni ne den tezüngzüktepba ka yudi: saka na nungi ni langka aginür, aji nai kü tejak angutsü arudang, tamasa nai Saul jala Mikal anir maru tashi, nai kü tejak mangutsü.”

¹⁴Aser Dawidi osang benertem Saul chir Ish-boshet dangi yoka ashi, “Kübutsü Mikal shiba asoshi ni Filistia nunger tajiküp noklang ka agi anisen agütsü la kü nem bendanga agüjang.”

¹⁵Aser Ish-bosheti yoka la kinungpu Laish jabaso Paltiel nungi anir ao.

¹⁶Aser la kinungpu la den jeba ao, aser la sülen Bahurim tonga anitak. Idangji Abneri pa dang ashi, “Meyipa oang” aser pa meyipa ao.

¹⁷Abneri Israel tebu-teditem den jembia ashi, “Taoba mapang nung nenok madak chuba asütsü nenoki Dawid bushi.

¹⁸Tang ajangla aji inyakang; kechiaser KIBUBAi Dawid indang jembia ashi, Kü tenzüker Dawid ket agi Filistia nunger ket nungi aser parnok tsükchir ajak ket nungi ni kü nübur Israel kümzüktsü.”

¹⁹Abneri ano Benjamin kidong dena jembi: ano Abneria Hebron nung Dawid narong nung Israel aser Benjamin kidong ajongai junger ta asüba ajak ashi.

²⁰Anungji Abner Dawid dangi Hebroni pa den nisung metsü den aru. Aser Dawidi Abner aser pa den alir nisung nem benjong ka agütsü.

²¹Aser Abneri Dawid dang ashi, “Ni aramesoa odi, aser Israel ajak kü kibur chuba dangi anitentsü, idangji ne den parnoki tezüngzüktepba yanglutsü, aser ne nelai jangraba ajak madak nai chubatsü akok.” Aser Dawidi Abner yok; aser pa yimjung nung ao.

²²Tang Dawid tenzükertem aser Yoab yimaklen nungi aru, aser parnok den temakzüba oset jenti bener aru: saka Abnerbo Dawid den Hebron nung maliasü; kechiyong pai pa yokadoker liasü, aser pa tesünep nung or liasü.

²³Kodang Yoab aser pa den alirtem temeranger telok arua liasü, parnoki Yoab dang ashi, “Ner chir Abner chuba dangi aru, aser pai pa yokadokogo, aser pa yimjung nung ogo.”

²⁴Idangji Yoabi chuba dangi arua ashi, “Nai kechi inyak? ajiang, Abner ne dangi aru; kechiba nai pa yokadok?

²⁵Ner chir Abnerji nai metet, na külakoktsütsü, aser na oli aruli asüba, aser nai inyakba ajak metettsü pa aru.”

²⁶Kodang Yoab Dawid nungi adok, pai Abner sülen osang benertem yok, aser parnoki pa Sira tzübu nungi meyipa anir aru: saka Dawidi aji memetet.

²⁷Aser kodang Abner Hebroni meyipa aru, Yoabi pa tezüleni pa den tanemi jembitsü amungi anir ait, aser yangji pa dak tepok nung setoktsü, yangji pa, Yoab tenu Asahel zü tokshiba asoshi asü.

²⁸Tesülen aji Dawidi angashidang, pai ashi, “Ni aser kü yimli, Ner chir Abner zü nungi teti asoshi KIBUBA madang tai maket lir;

²⁹aji Yoab kolak manung, aser tebuer kidong ajak madak tsükdakjang; aser Yoab kidong nung temang nungi ayimba, mesüra zütsüra aketer ka, mesüra ajok nung metaloker ka mesüra nok agi asür ka, mesüra chiyungtsü agi anünger ka medeni telidaktsü.

³⁰Anungji Yoab aser tenu Abishai tenati Abner tepset, kechiaser pai tena adianu Asahelji Gibeon tongbang nung tepset.”

³¹Idangji Dawidi Yoab aser pa den alir nisung ajak dang ashi, “Nenok süoshi shisa-ang, aser anemsü agi nenok nangri kangang, aser Abner mang yimang.” Aser Dawid chubai mang apuba sülenji anitak.

³²Aser parnoki Hebron nung Abner arem, aser chubai ola adok aser Abner leper nung jebloktsü; aser nisung ajaki ajeb.

³³Aser chubai Abner asoshi iba mangyim ken tena ashi, “Tamachi nisung asüba amai Abner asütsü no?

³⁴Ne teka maleni liasü, mesüra ne tetsüng merangsen agi mesentak, tamajunger madang nisung ka laoba mesüka na yamaji lao.” Aser tanaben nisung ajaki pa asoshi ajeb.

³⁵Idangji nisung ajaki ano anüngdang alidangsa Dawid mesüzüka chiyungdaktsütsü aru, saka Dawidi azüngashia ashi, “Anü maidang ni chiyungtsü mesüra langka menakdangra, mesüra langka süra, Tsüngremi kü dang yamaji, mesüra talia inyakangma.”

³⁶Nisung ajaki aji meteta-adok, aser aji agi nisungtem peladaktsü aser chubai inyakba ajak nung parnoki pela.

³⁷Anungji nisung ajaki aser Israel ajaki panüji Ner chir Abner tepsettsüji chuba nungi masü ta angatet.

³⁸Idangji chubai pa tenzükertem dang ashi, “Nenoki tanü Israel nung chuba chir ka aser tulur nisung ka laoa lir ta memetet no?

³⁹Ni mezüja shimtetba chuba ka saka tanü ni tashi meiti lir: Zeruia chirtem item nisung ni asoshi onsara tesashi lir. KIBUBAi tamajung inyaker nem pei mapa yari ajangzükdakjang.”