Read njo 2 SAMUEL 4 Bible Online

2 SAMUEL 4 - njo bible

2 SAMUEL 4

¹Kodang Saul jabaso Ish-bosheti Hebron nung Abner süogo ta angashi pa tasü meiti aküm, aser Israel nunger ajak tetsübu agi asüng.

²Tang Saul jabaso Ish-boshet telok madak arkotong ana liasü; ka tenüng Baana, aser kaji tenüngji Rekab, Beeroth nunger Rimmon chir, Benjamin chirtem nungi liasü; kechiyong Beerota Benjamin nung züngsema liasü.

³Kechiyong Beeroth nunger Gittaimi jena ao, aser tanü tashi yangji bendanger senso süa alir.

⁴ Saul chir Yonathan jabaso tenüng agi Mefiboshet liasü. Kodang Saul aser Yonathan asüba indang Yezreel nungi osang aru idangji pa küm pungu tain liasü, anungji pa yarilai paji bener ajen. Saka lai aritepa ajen dang pa tsükdaktsü aser tsüngtsüker aküm.

⁵Beeroth nunger Rimmon jabasotem, Rekab aser Baana, ao aser anü tatsük dang Ish-boshet, pa anjongmeshi anisüngzüka lia, par kidangi aru.

⁶Tetsü shibai kikümbang nüka liasü, laji wheat shimdang anünüa amua oadoker liasü, anungji Rekab o tenu Baana nati laji ajanga ai.

⁷Kodang tenati kilung jagi ai pa pei yipten nung mejanga lia tenati pa tepok nung atsüng aser pa tekolak tangzüka bener aonung tepiyong Araba lenmangi ao.

⁸Aser parnoki Ishboshet kolak Dawid dangi Hebroni bener arua chuba dang ashi, “Ne taküm bushisang aser tsükchir Saul jabaso Ish-boshet kolak ajiang; aser tanü kü kibur chuba Saul aser pa metsü dak KIBUBAi mang yangogo.”

⁹Dawidi Rekab aser tenu Baana Beeroth nunger Timmon chirtem dang langzü, KIBUBA taküm ali nungji, shibai kü nela anemer ajak nungi kümzük,

¹⁰ kodang kati, “Ajiang, Saul süogo,” ta osang tajung bener aru ta bilema ashi, ni pa dak sot, aser Ziklag nung pa tepset, aji pa osang asoshi tajangzük liasü.

¹¹Nisung tamajungeri temeshi nisung pei kidang pei yipten nung lia tepset nung koda taliang asütsü, ni tang ne ket nungi pa zü makangtsü asü, aser na alima nungi bener moli ma?

¹²Aser Dawidi par asangurtem dang mela-a parnok tepset, aser parnok teka aser tetsüng alangtoktsü, aser parnok Hebron awatsüng anasa itaka toktsü. Saka parnoki Ish-boshet kolak agia aji Hebron nung Abner leper nung arem.