Read njo 2 SAMUEL 5 Bible Online

2 SAMUEL 5 - njo bible

2 SAMUEL 5

¹Idangji Israel kin ajak Dawid dangi Hebroni arua ashi, “Ajiang, onok ne teret aser ne shi.

²Akhidang, kodang onok madak Saul chuba liasü, Israel anir adoksang aser anir aitsangji na liasü; aser KIBUBAi ne dang ashi, ‘Nai kü nübur Israel mesütsü, aser Israel madak ne chuba asütsü.’ ”

³Anungji Israel tebu-tedi ajak chuba dangi Hebroni aru; aser Dawid chubai parnok den Hebron nung KIBUBA madang tezüngzüktepba ka yanglu: aser parnoki Israel madak Dawid chuba asütsü totzü mezütsü.

⁴Dawid chubatsü tenzükdang pa küm semer liasü, aser pai küm lir chuba.

⁵Hebron nung pai Yihuda madak küm tenet aser ita trok chuba; aser Yirusalem nung pai Israel aser Yihuda ajak madak küm semer asem chuba.

⁶ Chuba aser pa nisungtemi Yirusalem nung Yebus nunger anema apuso. Yebus nungertemi Dawidi ajagi maitettsü ta bilema ashi, “Na yagi maitettsü, nükpoker o tsüngtsükertemi na aridoktsü.”

⁷Saka Dawidi Zion mitsaji maktet aser aji “Dawid Yimti” aküm.

⁸Panüji Dawidi ashi, “Shibaisa Yebus nunger tepsetdir, tzümesü lenmang jagi tuang, aser Dawid sempartem nükpoker aser tsüngtsükertemji tepsetang.” Aji asünung “Nükpoker aser tsüngtsükertemi KIBUBA kidangi maitsüla” ta jembir.

⁹Dawid mitsa nung ali, aser iba dangji Dawid yimti ta aja. Dawidi Millo nungi tenzüka telunglen yimti yanglu.

¹⁰Dawid tuluba tuluba aküm, kechiyong KIBUBA, Temeranger Tsüngrem, pa den liasü.

¹¹Tair chuba Hirami Dawid dangi osang benertem den cedar süng, aser mistritem, aser lung mistritem yok: aser parnoki Dawid nem chuba ki ka yanglutsü.

¹²Aser KIBUBAi pa Israel madak chuba kümdaktsü, aser par nübur Israel atema pa yimli uludaktsü ta Dawidi metet.

¹³Hebron nungi arur külen Dawidi Yirusalem nungi tezüngatsü aser kibutsü tali agi; aser ano Dawid nem jabaso aser jala sotsü.

¹⁴Itemi Yirusalem nung pa nem sotsüba tenüngtem lir; Shammua, Shobab, Nathan, Solomon;

¹⁵Ibhar, Elishua, Nefeg, Yafia;

¹⁶Elishama, Eliada, aser Elifelet.

¹⁷Kodang Israel madak chuba asütsü Dawid dak totzü mezüja shimtetogo ta Filistia nungertemi angashi, parnoki pa aputsü atu. Dawidi aji angashia mitsai alu.

¹⁸Tang Filistia nunger arua parnoki Refaim lenten sünga anen.

¹⁹Aser Dawidi KIBUBA dang asüngdanga ashi, “Ni Filistia nunger anema atutsü asü? Nai parnok kü ket nung bendanga agütsütsü asü?” KIBUBAi langzü, “Tuang, kechiyong atangji ni Filistia nunger ne ket nung bendanga agütsütsü.”

²⁰Anungji pai Baal-Perazimi[2] aru, aser pai yangji parnok akok; aser pai ashi, “Tzümetsüng nungpokba mesüka kü tsükchirtem kü madang KIBUBAi nungshitsüogo.” Anungji pai iba linük dang Baal Perazimb ta aja.

²¹Aser parnoki parnok süngyanglu yangji toktsü, aser Dawid aser par nisungtemi itemji bener ao.

²²Ano Filistia nungeri tanaben atua Refaim lenten sünga atur anen.

²³Anungji Dawidi ano KIBUBA dang asüngdang nung pai langzü, “Tejaklen nungi parnok dangi tetu saka tesülen nungi parnokji meketbangang aser balsam süngdong jakdang nungjagi parnokji arimesoang.

²⁴Kodang nai balsam süngdong kolak manung lokti süiba ola angashidir, idangji nai parnok anema apusotsüla, kechiaser ibaji Filistia nunger temerangertem tepsettsü atema, KIBUBA ne jakdang aoba temaitsüji alitsü.”

²⁵KIBUBAi melaba ama Dawidi inyak, aser Filistia nungertemji Geba nungi Gezer lenmang tashi makyonga ao.