Read njo 2 SAMUEL 7 Bible Online

2 SAMUEL 7 - njo bible

2 SAMUEL 7

¹Kodang chuba pei kidang ali, aser tsükchirtem meketa aliba ajak nungi KIBUBAi pa nem anisüngzük agütsü.

²Chubai Nathan ainkar dang ashi, “Tang ajiang, ni cedar agi yangluba ki ka nung alir, saka Tsüngrem süngdenbo süki teyindangba kübok alir.”

³Nathani chuba dang ashi, “Oang, ne mulungjang nung aliba ajak inyakang; kechiyong KIBUBA ne den lir.”

⁴Saka paonungjisa KIBUBA o Nathan dangi arua ashi,

⁵“Oang, aser kü tenzüker Dawid dang shiang, Yamai KIBUBAi ashir, Nai kü nem talitsü ki yanglutsütsü asü?

⁶Kechiyong Israel chirtem Ijip nungi ni anir adokba anogo nungi, oda tanü tashi, ni ki ka nung melidang, saka süki ka nung lia jajaogo.

⁷Ajaklen kechi nungsa ni Israel chirtem den jaja, ni Israel kidong ajak den, shirnok dang ni kü nübur Israel mesütsü melaogo, parnok dang kechiba nenoki kü nem cedar agi ki ka meyanglutsü? ta ni mashi.”

⁸Anungji tang yamai nai kü tenzüker Dawid dang ashitsü, “Yamai Temeranger KIBUBAi ashir, Kü nübur aser Israel madak na tanishir asütsü asoshi, chiyimdak san sülen anitakba nungi ni na agi;

⁹aser na kolenisa ao ni ne den liasü, aser ne madang nungi ne tsükchir ajak leptoktsü; aser alima nung alir tulurtem tenüng ama ni na tenüng tulu ka kümdaktsütsü

¹⁰Aser kü nübur Israel asoshi ni tesem ka shimtettsü, aser parnok tema toktsütsü, angji parnok pei talidak alitsü, aser joko maenshitsü, mesüra mezüng amato, tamajungba chirtemi parnok mekangshitsü,

¹¹oda kü nübur Israel madak obendangertem shimtetba anogo nungi; aser ne tsükchir ajak nungi ni na anisüngzükdaktsütsü. Ano KIBUBAi ne nem ki ka yanglutsütsü ta KIBUBA ashir.

¹² Kodang ne anogotem temdir, aser na ne tsürabur den mejangdir, ni ne sülen metsü adokdaktsütsü, koba ne mang nungi adoktsü, aser ni pa yimli yanglutsü.

¹³Pai kü tenüng asoshi ki ka yanglutsü, aser ni pa yimli chuba menden teti asoshi yanglutsü.

¹⁴ Ni pa tebu asütsü, aser pa kü chir asütsü: kodang pai tai benshidir ni pa nisunger arrtsüng agi azüktsü aser nisung chirtem merenshitsü.

¹⁵Saka Saul shiba nungi ni kü yimlibilem bener ao, aser ne madang nungi endokadokba ama, kü yimlibilem pa nungibo mepilatsü.

¹⁶Aser ne ki aser ne yimli ne madang teti asoshi akanga alitsü; ne chuba menden teti asoshi yanglutsü.”

¹⁷Item otem aser mangdang ajak, yamaji Nathani Dawid dang ashi.

¹⁸Idangji Dawid chubaji ia KIBUBA madang amen; aser ashi, “Oh, KIBUBA Tsüngrem, nai ni papigati bener arutsüsa ni shiba aser kü kibonga kechi aka?

¹⁹Aser Oh, KIBUBA Tsüngrem, ne nükdangbo ya oda tilaka dang asü? aser ano nai ne tenzüker tarutsü kibong indang mapang talangka lia jembiogo; aser ibai nüburtem asoshi tansütsü ka südakjang, Oh, KIBUBA Tsüngrem!

²⁰Ano Dawidi kechi tali ne dang shitettsü? Kechiyong nai ne tenzüker meteter, Oh, KIBUBA Tsüngrem.

²¹Ne otem atema aser ne mulungjang ama, ne tenzüker nem item mapa tulu metetdaktsütsü, nai ajak inyakogo.

²²Anungji na tulu lir, Oh, KIBUBA Tsüngrem, kechiyong onok narong agi angashiba ajak ama, na ama shinga mali, mesüra ne dak alema Tsüngrem kecha mali.

²³ Aser kechi kin ka alima nung ne nübur mesüka, oda Israel mesüka, shirnok Tsüngremi pei asoshi kin ka asütsü alangzüktsü ao, pa tenüng ka kümdaktsütsü, aser na asoshi mapa tulu inyaktsü, aser ne linük asoshi tetsübutsü mapa inyaktsü, ne nübur madang, koba ne dangi Ijip nungi, kintem nungi aser parnok tsüngremtem nungi alangzük?

²⁴Aser nai ne Israel purtem na asoshi teti atema Tsüngrem nübur kümdaktsü aser na KIBUBA parnok Tsüngrem aküm.

²⁵“Tang, Oh KIBUBA Tsüngrem, ne tenzüker indang nai jembiba o, aser par ki indang aji teti asoshi nai akangshitsür, aser nai jembiba ama inyakangma.

²⁶Aser ne nüng teti asoshi merendakja, shiang, Temeranger KIBUBAji Israel madak Tsüngrem: aser ne tenzüker Dawid kibongji ne madang yanglutsü.

²⁷Kechiyong na, Oh Temeranger KIBUBA, Israel Tsüngrem, ne tenzüker dangi jungkai adoka shiogo, Ni ne nem ki yanglutsütsü: aji asünung ne tenzükeri ne dang pa mulungjang nung iba sarasademtsü tasü aiter.

²⁸“Aser tang, Oh, KIBUBA Tsüngrem, na Tsüngrem lir, aser ne otem atangji lir, aser nai iba mapa tajung ya ne tenzüker dang nangzükogo.

²⁹Aji asünung tang ne tenzüker ki nai tenzükjang aser moajangma, angji ne madang aji maneni alitsü: kechiyong nai Oh, KIBUBA Tsüngrem, aji jembiogo: aser ne temoatsü agi ne tenzüker ki teti asoshi moajangma.”