Read njo 2 SAMUEL 8 Bible Online

2 SAMUEL 8 - njo bible

2 SAMUEL 8

¹Iba sülen Dawidi Filistia nunger akok, aser parnok agi; aser Dawidi parnok ket nungi Metheg-amma agi.

²Ano pai Moab akok, aser parnok ali nung ontaka toktsür, taren sena parnok asadang; aser pai taren ana shia südaktsütsü asazüktsü, aser taren sünga ka taküm ayutsü asazüktsü. Aser Moab nungerji Dawid tenzükertem aküm, aser putisü bener arutsü.

³Dawidi Zoba chuba, Rehob jabaso Hadadezer, pa pei litsü Eufrata ayong nung meyipa agitsü aodang akok.

⁴Pa nungi Dawidi kor temeranger meyi ka ser noklang tenet, aser tetsüng temeranger meyi metsü agi, aser Dawidi talungtsü kor ajak tepi leptoktsü, saka parnok rongnung talungtsü noklang ka asoshi rizünga ayu.

⁵Kodang Siria nungertemi Zoba chuba Hadadezer yaritsü aru, Dawidi Siria nunger meyi metsürana tepset.

⁶Idangji Dawidi Damaska nung aliba Siria nung temeranger telok ayu aser Siria nungertem Dawid tenzüker aküm, aser parnoki putisü bener arutsü. Aser kolenisa pa ao yangji KIBUBAi Dawid nem takok agütsü.

⁷Aser Hadadezer ket nung hon jongtemji Dawidi agi, aser itemji Yirusalemi bener aru.

⁸Beta aser Berethai nungi, Hadadezer yimtitem nungi Dawid chubai yongmenyin jenti aben.

⁹Kodang Hamat chuba Toi-i Hadadezer temeranger telok ajak kokogo ta angashi,

¹⁰idangji Toi-i par chir Yoram Dawid chuba dangi, pa nem salem agütsütsü, aser pa moatsütsü yok, kechiaser pai Hadadezer anema rara aser pa akok; kechiyong Hadadezeri pa den anemer liasü.Yorami pa nem hon, taribi aser yongmenyin jenti agütsü.

¹¹Ano itemi Dawid chubai KIBUBA nem bendanga agütsü, pai agia aliba kin ajak nungi bendanga agütsüba taribi aser hon dena bendanga agütsü.

¹²Edom nungi, Moab nungi, Ammon chirtem nungi, Filistia aser Amalek nunger nungi, aser Zoba chuba, Rehob chir Hadadezer nungi makzükba osettem.

¹³ Pai meyipa arudang, pai Edom nunger Metsü Lenten nung meyi terti akok.

¹⁴Pai Edom ajak nung temeranger telok ayu; aser Edom nunger ajak Dawid tenzükertem aküm. Yamaji KIBUBAi Dawid aolen ajak takok agütsü.

¹⁵Dawid Israel ajak madak chuba; aser pei nübur ajak madak o bendang aser ochiba inyak.

¹⁶Aser temeranger telok madak Zeruia chir Yoab liasü; aser Ahilud chir Yehosafat otsü zülur liasü;

¹⁷Ahitub chir Zadok, aser Abiathar chir Ahimelek, putirtem liasü; Seraia tezülur liasü;

¹⁸Yehoiada chir Benaia Keret aser Pelet nunger madak liasü; aser Dawid chirtem putir liasü.