Read njo 1 CHUBATEM 1 Bible Online

1 CHUBATEM 1 - njo bible

1 CHUBATEM 1

¹Tang Dawid chuba tambur, aser arishi küm nung tain liasü; aser parnoki pa nem sü abentsü, saka pai talem mangu.

²Anungji par kilirtemi pa dang ashi, “Kü Kibuba chuba asoshi tasüngtet aiür ka bushidakjang aser la chuba tsüngdang noktakdakjang aser pa anebaludakjang; kü Kibuba chubai talem ngutettsüsa ne teku nung la mangalokdakjang.”

³Anungji parnoki aiür tobur tajung ka Israel temeket ajak nung bushi, aser parnoki Shunam-tsür Abishag ngua la chuba dangi anir aru.

⁴Aser aiürlaji tobur kanga tajung liasü; aser lai chuba yaria mesü, saka chubai la memetet.

⁵ Tang Haggit chir Adonijai pei sasa ulua ashi, “Ni chuba asütsü,” aser pai kor talungtsütem, kor temeranger aser nisung tenem pa jakdang asemtsü renem.

⁶Tebui kecha südanga, “nai kechiba yamai inyak?” ta shia pa mejashidaktsü, aser pa aso-ajen kanga tajung liasü, shiba Absalom sülen aso.

⁷Aser pai Zuria chir Yoab aser putir Abiathar den sensak sema parnoki Adonija sülen anitaka pa yari.

⁸Saka putir Zadok, Yehoiada chir Benaia, ainkar Nathan, Shimei, Rei aser tamarenertem shir Dawid den liasü, parnokji Adonija den maliasü.

⁹Adonijai san, nashi aser tejebketba shirurutem Zoheleth lung, tzüpokdak lenmang anasa tetepsetba tenla agütsü. Pai pa adianutem ajak, chuba chirtem, Yihuda nüburtem aser chuba kilirtem ajak chiyungdaki jaok.

¹⁰Saka ainkar Nathan, Benaia aser tamarenertem aser pei adianu Solomonbo maja.

¹¹ Idangji Solomon tetsü Bathsheba dang Nathani asüngdang, “Haggit chir Adonija pa sasa chuba akümba indang nai mangashi na? Ano Dawid chubai iba indang kecha memetet!

¹²Anungji tang ni na aser ne jabaso Solomon taküm kümzüktsü asoshi tasa kar sayudi,

¹³Oang aser Dawid chuba dang shiang, ‘Kü kibur chuba, kü chir Solomon kü melen chubatsü ta nai kü dang azüngashia meshika ma? Ajangla kechiba Adonijai chubar?

¹⁴Ano Nathani ashi, Na pa den jembia alidangjisa nia ajagi arutsü aser nai ashibaji akangshidaktsütsü.’

¹⁵Anungji Bathsheba chuba dangi oa kidangi ai. Pa kanga tambur aser Shunamtsür Abishagi pa anebalua liasü.

¹⁶Bathshebai apudaka chuba dang akhümtsübu sayu, aser chubai asüngdang, “Nai kechi aginür?”

¹⁷Lai pa dang ashi, “Kü Kibuba, nai KIBUBA ne Tsüngrem agi azüngashia ne kilitsür dang ashi, Shitak kü sülen ne chir Solomoni chubatsü, aser pa kü chuba menden nung amentsü.

¹⁸Tang ajiang, Adonijai yimsü asür, aser na kü Kibuba chubai aji memetet;

¹⁹aser pai nashi aser tejebketba shiruru aser san teperi tepseta chuba chir ajak, aser putir Abiathar aser temeranger tanishiba Yoab pai aja, saka pai ne tenzüker Solomonbo maja.

²⁰Tang kü Kibuba chuba, Israel chirtemi kü Kibuba chuba sülen shiba chuba menden nung amentsü aji parnok dang shidaktsütsü ne dak repranga lir.

²¹Mesüra ya ataloktsü, kodang kü Kibuba chuba pei tetsü-teboutem den mejangdir, oda ni aser kü chir Solomon tamajung purtem rongnung züngsemtsü.”

²²Ajiang, kodang lai maneni chuba den jembia alidang, ainkar Nathan ait.

²³Aser parnoki chuba dang, Ainkar Nathan arua lir ta ashi. Kodang pa chuba dangi aru, pa tejak alilen mechioker pai chuba tsüngdang apudak.

²⁴Nathani ashi, “Oh chuba, kü Kibuba, Adonijai kü sülen chubatsü aser pa kü chuba menden nung amentsü ta nai ashi no?

²⁵Kechiyong pa tanü luogo aser nashi aser tejebketba shiruru aser san teperi pai tepseta chubar chirtem, temeranger tanishirtem aser putir Abiathar pai aja; aser ajiang, parnoki pa tsüngdang chia jema ashir, Adonija chuba arishia liang.”

²⁶Saka oda ne tenzüker, ne putir Zadok, aser Yehoiada chir Benaia aser ne jabaso Solomon pai maja.

²⁷Ibai kü Kibuba chubai inyak asü, aser nai ne tenzükertem dang kü Kibuba chuba menden nungji pa sülen shiba amentsü ibaji memetetdaktsü asü?

²⁸Idangji Dawid chubai langzüa ashi, “Kü dangi Bathsheba jaang” aser la chuba alidaki arua pa tsüngdang noktak.

²⁹Chubai azüngashia ashi, Lendong ajak nungi kü tanela kümzükba KIBUBA ali tashi,

³⁰“atangji KIBUBA Israel Tsüngrem agi ni ne dang azüngashiba ama, kü sülen atangji ne chir Solomoni chubatsü aser ni melena pa kü chuba menden nung amentsü; atangji tanü ashiba ama ni inyaktsü.”

³¹Idangji Bathshebai pei tejak alilen mechioka apudak aser chuba dang akhümtsübu sayua ashi, “Kü Kibuba chuba Dawid tatem makai liang.”

³²Dawid chubai ashi, “Putir Zadok, ainkar Nathan aser Yehoiada chir Benaia kü dangi jaang.” Aser parnok chuba tsüngdangi aru.

³³Chubai parnok dang ashi, “Nenok den nenok KIBUBA tenzükertem aniang aser kü chir Solomon kü gado nung mendakjang aser pa Gihoni anir luang.

³⁴Putir Zadok aser ainkar Nathani Israel madak chuba asütsü pa totzü mezüja shimtetang aser nenoki jangzü apua Solomon chuba talangka liang ta shiang.

³⁵Idangji nenok pa sülen atutsü, aser pa arua kü chuba menden nung amentsü; kechiyong pai ni melena chubatsü aser pa Israel aser Yihuda madak tanishir asütsü shimtet.”

³⁶Yehoiada chir Benaiai chuba dang langzüa yamai ashi, “Amen, KIBUBA kü kibur chuba Tsüngremi yamaji shidakjang.

³⁷Koda kü kibur chuba den KIBUBA liasü, aji oda pa Solomon den liang aser kü kibur Dawid chuba menden dang nungi pa chuba menden tuluba süjang.”

³⁸Anungji putir Zadok, ainkar Nathan aser Yehoiada chir Benaia, Kheret aser Pelet nunger alua Dawid chuba meyong gado nung Solomon mendaktsür Gihoni pa anir aru.

³⁹Aser putir Zadoki süki nungi totzü pungdang agitet aser Solomon dak mezütsü aser parnoki jangzü apua nisungtemi ashi, “Solomon chuba talangka liang!”

⁴⁰Aser nisung ajak pa sülen atua jemji apua tepela tulu agi pelatep, anungji parnok ola agi ali atenten.

⁴¹Adonija aser pa den alirtem chia ajemba tema arudang parnoki aji angashi. Kodang Yoabi jangzü ola angashi, pai ashi, “Kechisünung iba nanüng tulu ya yimti nung adoker?”

⁴²Pai tejembidak nung, ajiang, putir Abiathar chir Yonathan aru, aser Adonijai ashi, “Ajiang, kechiyong na tetemsü nisung aser osang tajung abensang.”

⁴³Yonathani Adonija dang ashi, “Atangji asen kibur Dawid chubai Solomon chuba kümdaktsüogo.

⁴⁴Chubai putir Zadok, ainkar Nathan, Yehoiada chir Benaia, Kheret aser Pelet nunger pa den yok, aser parnoki chuba gado nung pa mendaktsü.

⁴⁵Putir Zadok aser ainkar Nathani pa Gihon nung chuba asütsü totzü mezüja shimtet, aser parnok iba nungjagi pelashishia atu, anungji yimti nung tanaben ola adoker. Nenoki angashiba olaji iba nanüng olaji lir.

⁴⁶Solomon chuba menden nung menogo.

⁴⁷Aser talisa chuba tenzükertemi asen kibur Dawid moatsütsü arua ashi, Ne Tsüngremi Solomon ne tenüng dang nungi tajungba kümdakjang, aser ne chuba menden dang nungi pa chuba menden tuluba kümdakjang. Aser chubai pei sasa yipten manung apudak.

⁴⁸Chubaia yamai ashi, Kü tenük agia nguteta tanü kü chuba menden nung amentsü shibai agütsü, iba Israel Tsüngrem KIBUBA temoatsüba.”

⁴⁹Adonija tembar ajaki tsübua arameso aser nisung shia pei lenmangi ao.

⁵⁰Aser Adonijai Solomon tsübu aser pai aramesoa noktaker oa tenladak tezü[1] nung amet.

⁵¹Solomon dang ashi, “Ajiang, Solomon chuba Adonijai tsübur; kechiaser ajiang, pai tenladak tezü nung amer ashir, Solomoni nok agi pei lar melepsettsü ta kü dang tamasa azüngashiang.”

⁵²Solomoni ashi, “Pai pei sasa nisung tetemjen ka ta sayutetra, pa tekolak nungi ku jang kata ali nung metsüktsü; saka pa dak tamajungba ngura, pa asütsü.”

⁵³Anungji Solomon chubai yok aser parnoki pa tenladak nungi anir alu. Aser pa arua Solomon chuba dang akhümtsübu sayu, aser Solomoni pa dang ashi, “Ne kidangi oang.”