Read njo 1 CHUBATEM 10 Bible Online

1 CHUBATEM 10 - njo bible

1 CHUBATEM 10

¹ Kodang Sheba chubatsür KIBUBA tenüng nung Solomon nüngtugu indang angashi, tasüngdangba tasak agi lai pa tendangtsü aru.

²Lai nisung telok tulu den, ut, teronem menemba oset, hon aser senti lung aika bener Yirusalemi aru. Kodang lai Solomon dangi aru, lai la mulung nung aliba ajak Solomon den jembi.

³Chubatsüri asüngdangba ajak kecha memetetba mali, Solomoni langzü.

⁴Kodang Sheba chubatsüri Solomon shisatsü akaba ajak aser pai yangluba ki,

⁵pa chiyungba langbang, kilirtem timi ayuba, pa dang tongtipurtemi tenzükba, parnok sentsüprang süoshi aser pa marok amertem, pai tarongba tenla agütsüdang koda KIBUBA kidangi atu item ajak angudang, joko lai kechianga meshi-i kümadok.

⁶Lai chuba dang ashi, “Kü nübur nungi ne mapatem aser ne shisatsü indang osang angashiba ya atangji shitak lir.

⁷Aji saka ni maru tashi aser aji kü tenük agi mangu tashi, ni mamangi liasü, aser ajiang, tesadanga kü dang mashi; ne shisatsü aser terenlokba ni angashiba dang nungi taoba.

⁸Ne nübur aser ne kilir shirnok ne tsüngdang maneni noktaker aser ne shisatsü angashir, parnok tepelatsü.

⁹Ne Tsüngrem shibai ne dang pelar, aser na Israel madak chuba kümdaktsü, pa temoatsüba, kechiaser KIBUBAi Israel teti meimer, anungji obendangtsü aser ochi inyaktsü na chuba kümdaktsü.”

¹⁰Lai chuba nem hon touzük mori noklang ka ser metsü, teronem menemba jenti aser senti lung aika agütsü. Sheba Chubatsüri Solomon chuba nem teronem menemba agütsüba ama tangar nungi kodanga pai mangu.

¹¹Ofir nungi hon bener aruba Hiram rongi almug süng aser senti lung aika bener aru.

¹²Chubai almug süng agi KIBUBA ki aser chuba ki asoshi nüktang, aser kentenertem asoshi kongki aser jemji yanglu. Aser tanü tashi nung almug süng yamaji kodanga maru aser mangu.

¹³Solomon chubai pei chuba ki oset nungi la nem sempet aika angadi agütsüba dak alema, Sheba Chubatsür nem lai aginüba aser kechisa lai meshi ajak agütsü, aser pei limai apusoa la pei kilir ajak den ao.

¹⁴Küm ka nung Solomon dangi aruba hon touzük mori noklang trok ser roker trok liasü,

¹⁵itemji talirtem aser shishirtemi bener aruba aser kin tapu tapu nungi chubatemi agütsüba, medeni liasü.

¹⁶Solomon chubai hon agi atsüngba jong tulu noklang ana yanglu; jong shia nung hon shekel noklang trokrok liasü.

¹⁷Pai jong tila noklang asem hon agi yanglu, jong ka hon mina asem agi yanglu, aser chubai itemji Lebanon Arem chuba Ki nung ayu.

¹⁸Talisa ano chubai hon tajungtiba enoka shitipu agi chuba menden tulu ka yanglu.

¹⁹Aser chuba mendeni atutsübaji jenjang trok liasü, aser chuba menden temaji telonglong liasü, aser menden tip anatsülen tepen atalokdak liasü, aser tepen atalokdakji molusongzü ka ka liasü.

²⁰Molusongzü terana tip külen aser tanga jenjang trok manungji noktak; ibaji mesüka tangar yimli kecha nunga maliasü.

²¹Solomon chuba marok ajak hon agi yanglua liasü, aser Lebanon ki nung amshiba marokji hon temeja agisa yanglua liasü, taribi oset kecha mali, kechiaser Solomon chuba mapang nung aji kecha mezüngshi.

²²Kechiyong Hiram rong anishir telok den Tarshis rong anishirtem chubai yua liasü aser parnokji küm asem nung khen hon, taribi, shitipu, shingo aser toti ozütem ta bener aru.

²³Anungji Solomon chuba alima nung chuba ajak dang nungi rongsen aser shisatsü nung taoba liasü,

²⁴aser alima ajongai Solomon nem Tsüngremi pa mulung nung kechi shisatsü agütsü aji angatsü asoshi aru.

²⁵Parnok nisung shiai pa tsüngdangi, küm shia taribi aser hon marok, süoshi, temeranger sobutsü, teronem menemba oset, kor aser gado bener aru.

²⁶Solomoni kor temerangertem aser kor talungtsü külemi aniten, kor talungtsü meyi ka ser noklang pezü, kor temerangertem meyi terana pai ayu, itemji pai yimti balala aser Yirusalem nung ayu.

²⁷Chubai Yirusalem nung lungsang ama taribi ayu, aser monguzünudong ama cedar süngdong aika pai atem.

²⁸Solomoner kortemji Ijip aser Kue nungi bener arubatem liasü. Chubar shishirtemi itemji jenjang balala agüja alizük.

²⁹Aser kor talungtsü ka Ijip nungi taribi shekel noklang trok agi bener aru, aser kor ka noklang ka ser tenem agi aser yamaji Het chuba ajaki aser Siria chuba ajaki pei indang bener aru.