Read njo 1 CHUBATEM 12 Bible Online

1 CHUBATEM 12 - njo bible

1 CHUBATEM 12

¹Rehoboam Shekemi ao, kechiaser Israel ajak Shekem nung pa chuba kümdaktsütsü atema arua liasü.

²Kodang Nebat chir Yeroboami aji angashi, idangji pa Solomon nungi jena oa Ijip nung aliba, pai Ijip nungi meyipa shilang.

³Anungji parnoki Yeroboam tajai yok, aser pa den Israel ajak Rehoboam dangi oa pa dang ashi,

⁴“Nebui onok nem süngra taret agütsüogo aser mapa tasak inyakdaktsüogo. Saka nai iba khuret taretji pungbadaktsüdi süra, onoki na tenzükdi.”

⁵Pai parnok dang langzü, “Anogo asem asoshi pila-ang aser tanaben kü dangi arung,” aser nisungtemji meyipa ao.

⁶Rehoboam chubai tamburtem den shisa bushia jembitep, item tamburtemji tebu Solomon taküm alidang tenzükertem liasü; “Item telok dang langzütsü asoshi kechi shisa agütsütsü” ta pai asüngdang.

⁷Parnoki pa dang ashi, “Nai tanü item nisung tenzüker ka ama nai parnok tenzükra, aser parnok dang langzüa o tajung jembira, parnokji teti asoshi ne tenzükertem asütsü.”

⁸Saka tamburtemi pa dang kechi ashi aji pai sendokadoker asangurtem shirnok pa den külemi ain, aser shir pa tsüngdang noktak, parnok nungiang pai tasa agi.

⁹Pai parnok dang ashi, “Shiri kü dang nebui benloktsüba khu pungba-a kümdakjang ta ashi, parnok dang langzütsü asoshi nenokia kechi tasa kü nem agütsütsü?”

¹⁰Asangurtem shir pa den külemi ain parnoki pa dang yamai ashi, “Ne dang shirnoki asüngdang nai parnok dang yamai shiang, Nebui onok khu taret kümdaktsü saka nai pungba-a kümdakjang ta ashirtem dangji, ‘Kü temeyong tilaba ya kübu teperem dang nungia temelemba.

¹¹Tang kübui nenok khu reta kümdaktsü süra idakji ni tali enloktsütsü, aser kübui nenok dak tazüktsü agi merenshia lira ni nenok dak jebja agi merenshitsü.’ ”

¹²Chubai ashiba ama anogo asemnübuba nung Yeroboam aser Israel ajak Rehoboam dangi aru.

¹³Pai tamburtemi pa dang ashiba sendokadok nungji nisungtem dang kanga mejungi langzü,

¹⁴aser asangurtem tasa agütsüba ama pai langzüa ashi, “Kübui nenok khu taret yanglutsü süra, idakji ni ano enloktsütsü, aser kübui nenok dak tazükba agi azük süra, ni nenok dak jebja agi merenshitsü.”

¹⁵Anungji yamaji chubai nisungtem dang manga, kechiyong aji KIBUBAi pa o atalokdaktsütsü asoshi KIBUBAi Shilon nunger Ahija agi Nebat chir Yeroboam den jembir liasü.

¹⁶ Kodang Israel nungeri parnok dang chubai mangar ta meteta aküm, parnoki chuba dang ashi, “Dawid den onok kechi shilem aka! Yesse chir den onok senmang maka; Oh Israel, tang nenok pei ki sükitem bushia meyipang, Oh Dawid nenok sasa pei ki ajiang. Anungji Israel puri pei süki-i meyip.”

¹⁷Saka Yihuda yimtitem nung alir Israel chirtem atemabo, parnok madak Rehoboami chuba.

¹⁸Idangji Rehoboam chubai Adoniram shiba mapa tanishir liasü pa yok nung Israel ajaki pa dak lung agi aon aser pa asü. Aser Rehoboam chuba pei kor talungtsü nung yakta tua mener Yirusalemi jena ao.

¹⁹Anungji Israeli tanü tashi Dawid kidong anema noktaker.

²⁰Kodang Israel nungeri Yeroboam meyipa aruogo ta angashi, parnoki pa dangi telok aja, aser Israel ajak madak pa chuba kümdaktsü aser Dawid kidong tsütsüi meyiper Yihuda kidong dak alema shinga mali asü.

²¹Kodang Rehoboam Yirusalem tonga aru, pai Yihuda aser Benjamin kidong ajak nungi teshimtet pur rarartem meyi noklang ka ser tir Israel kidong anema raratsü aser Solomon chir Rehoboam dangi tanaben yimliji meyipa bener arutsü sentepdaktsü.

²²Saka Tsüngrem nisung Shemia dangi Tsüngrem O arua ashi,

²³“Yihuda chuba, Solomon chir Rehoboam dang, aser Yihuda aser Benjamin kidong ajak dang aser tanüngba nisungtem dang yamai shiang.

²⁴KIBUBAi yamai ashir, nenoki matutsüla mesüra Israel pur ne adianutem anema meraratsüla, aser nisung shia pei kidangi meyipang; kechiaser aji ni nungi lir.” Anungji KIBUBA O ama pa o anga-a nisung shia pei kidangi meyipa ao.

²⁵Ajiser Efraim tenem lima nung Yeroboami Shekem yanglushi aser idakji ali, aser pai idak nungjagi apusoa or, Penuel yanglu.

²⁶Yeroboami pei mulung nung ashi, “Dawid kidong dangi yimliji tang meyipa arudi ma?

²⁷Yirusalem nung KIBUBA kidang iba nüburtemi tenla tenlatsü tura, idangji iba nübur mulungjang parnok kibur, Yihuda chuba Rehoboam dangi meyiptsü, aser ni tepsettsü aser Yihuda chuba Rehoboam dangi meyiptsü.”

²⁸ Idangji chubai shisatsü agir hon agi nashi pungchi ana yanglu, aser pai parnok dang ashi, “Nenok asoshi Yirusalemi atutsüji kanga dang tasak, nenok Ijip lima nungi anir atuba tsüngremtem ajiang, Oh Israel!”

²⁹Pai ka Bethel nung aser kaji Dan nung yutsü.

³⁰Iba mapa ya temenen ka kümadok, kechiaser nisungtemi kajia külemtsü asoshi Dan tonga ao.

³¹Pai tenem tekülemdak yanglu, aser nisungtem rongnungi pai putirtem shimtet, saka parnokji Levi chirtem masü.

³² Yeroboami ita tibuba terpungunübuba nung benjong ka Yihuda nung aliba mesüka adokdaktsü, aser pai Bethel nung inyakba ama tenla sabangi tua, pai yangluba nashi pungchitem nem tenla agütsü, aser pai putirtemji Bethel nung yutsü.

³³Ita tibuba anogo terpungububa pai Bethel nung tenladak koba yanglu ajagi atu, ibaji pai pei mulung nung bilema aliba itaji liasü; aser pai Israel chirtem asoshi benjong ka yanglua tarongba tenla agütsütsü asoshi pai tenladaki atu.