Read njo 1 CHUBATEM 13 Bible Online

1 CHUBATEM 13 - njo bible

1 CHUBATEM 13

¹Tang Yeroboam tenladak anasa noktaker tarongba tenla agütsütsü mapang nung Yihuda nungi Tsüngrem nisung ka KIBUBA O ajanga Betheli aru.

² Aser KIBUBA O agi tenladak anema pai ayimtena ashi, “Oh tenladak, tenladak, KIBUBAi yamai ashir, ‘Ajiang, Yosia tenüng agi Dawid kidong nungi tanur ka asotsü, aser tenem tekülemdak putirtem shirnoki ne madak tarongba tenla aronger parnok ne madak tenlatsü aser nisungtem teret ne madak arongtsü.’ ”

³Aser pai iba anogo nungjisa temaitsü ka agüja ashi, “KIBUBAi jembiba temaitsüji ajiang, tenladakji raksatsü, aser iba manung aliba autji endoktsü.”

⁴Kodang chubai Bethel nung tenladak anema Tsüngrem nisungi jembibaji angashi Yeroboami pei teka tenladak nungi songtoka ashi, “Pa puang.” Saka teka koba pai pa anema songtok aji ashirepadok, aser pei tekaji tanaben pei dangi atsüa arutsü mokoki aküm.

⁵Aser KIBUBA O agi Tsüngrem nisungi jembiba ama, tenladak raksa, aser tenladak nungi aut adok.

⁶Idangji chubai Tsüngrem nisung dang ashi, “Kü teka junga anebtsü asoshi ne Tsüngrem dang nai ni asoshi mepishijang.” Yamaji Tsüngrem nisungi KIBUBA dang mepishitsü, aser chuba teka akhi ama tanaben anebadok.

⁷Idangji chubai Tsüngrem nisung dangji ashi, “Kü den kidangi arua anisüngzükang aser ni ne nem sempet ka agütsütsü.”

⁸Saka Tsüngrem nisungi chuba dang ashi, “Nai ne ki tesadang ka kü nem agüjaka, ni ne den maotsü, mesüra ni iba linük nung machitsü aser majemtsü;

⁹kechiaser KIBUBA O agi kü dang yamai ashi, Nai amtsük machitsü mesüra tzü majemtsüla mesüra koba lenmangi na aru iba jagi na meyipa marutsüla.”

¹⁰Anungji pai pa aruba lenmang jagi meyipa moi tanga lenmang kati meyipa ao.

¹¹Tang Bethel nung ainkar tambur ka liasü, aser par chir ka arua Bethel nung iba anogo nung Tsüngrem nisungi kechi inyak ajak ashi, pai kechisa chuba dang ashi, tebu danga item ajakji ashi.

¹²Tebui parnok dang asüngdang, “Pa koleni ao?” Tang pei chirtemi Yihuda nungi aruba Tsüngrem nisungji kongi ao aji ngua liasü.

¹³Pai pei chirtem dang ashi, “Ni asoshi gado ka renemjang” aser parnoki pa asoshi gadoji renemtsü aser pai idakji amen.

¹⁴Pai Tsüngrem nisung sülen anitaka pai pa sülemdong züng ka nung mena angu. “Na Yihuda nungi aruba Tsüngrem nisungji asü” ta asüngdang.

¹⁵Pai “Nia” ta langzü; idangji pai pa dang ashi, “Kü den kidangi arung aser chiyungang.”

¹⁶Pai ashi, “Ni ne den meyipa marutsü mesüra maotsü mesüra ni mechiyungtsü mesüra iba li nungi ni ne den tzüa majemtsü kechiaser KIBUBA O agi aji kü dang shiogo.

¹⁷Nai mechiyungtsü mesüra idakji tzüa majemtsü, mesüra na kolen nungi aru aji agi meyipa maotsüla.”

¹⁸Ainkar tambur jagi pa dang ashi, “Nia na amaji ainkar ka lir, aser kotak tenyar kati KIBUBA O agi pa chiyunga ajemtsü asoshi anir arung ta ashi:” Saka aji pai pa ashiokja jembiba liasü.

¹⁹Anungji pai anidaka oa par kidang chia-ajem.

²⁰Parnok chiyungba langbang nung amendang pa meyipa anir arusang ainkar dangi Tsüngrem O aru.

²¹Aser Yihuda nungi aruba Tsüngrem nisung dang yamai ashi, “KIBUBA bang nungi adoka ashiba nung nai tashi manga nungji, aser nai ne dang melaba KIBUBA ozüng mayu nung,

²²saka meyipa arua chiyunga ajem, koba KIBUBAi techiyung aser tejem ta ashiba manga nungji ne temang ner tsürabur aremdak leperi meyipa maotsü.”

²³Kodang pai chia-ajem pai meyipa anir arusang ainkarji mendaktsütsü asoshi pai gado renemtsü.

²⁴Kodang pa ao, lenmang nung molusongzü ka ajurua pa tepset aser pa temang lenmang nung merepdok aser gadoji pa anasa noktaka liasü, aser molusongzüji tasü mang anasa noktaka liasü.

²⁵Ajiang, nisung kar süia ao aser tasü mang lenmang nung merepdaka angu aser molusongzü idakji noktaka liasü, aser parnoki arua ainkar tambusang dang aji ashi.

²⁶Kodang ainkari aji angashi, pai ashi, “KIBUBAi ashiba tashi mangaba Tsüngrem nisungji pa lir, aji asünung KIBUBAi pa molusongzü nem bendanga agütsü, aser KIBUBA O agi pa dang ashiba ama pa tepseta molusongzüi shisatsüogo.”

²⁷Pai pei chirtem dang ashi, “Ni asoshi gado renemjang;” aser parnoki aji renemtsü.

²⁸Pa aodang lenmang nung tasü mang merepdaka angu, aser gado o molusongzü na tasü mang anasaji noktaka liasü, molusongzüi tasü mangji machi mesüra gadoa meyirutsü.

²⁹Ainkari Tsüngrem nisung tasü mangji bena arua gado nem bendaktsür yimti-i bener arua mang yima pa arem.

³⁰Pai tasü mangji pei leper nung ayu, aser parnoki pa asoshi mang yima ashi, “Aia, kü adianu”

³¹Pa remer külen pai pei chirtem dang ashi, “Kodang ni südir Tsüngrem nisung aremdak leper nungji nia remang, pa teret anasa kü teret yuang.

³²Kechiaser Bethel nung tenladak anema, aser Samaria yimtitem nung kidong ajak anema koba pai KIBUBA O agi ayimten ajak shitak atalokogo.”

³³Iba sülenjia Yeroboami pei temenen lenmang nungi memeyip, saka tanaben ano nisungtem rong nungi putirtem shim, aser shibaisa mulungtet, pai parnok meshitetja putirtem yamaji shim,

³⁴Yeroboam kidong asoshi ibaji temenen aküm, oda par kidongji meshimeshia alima ajak nungi meleptoktsü tashi samatsü.