Read njo 1 CHUBATEM 14 Bible Online

1 CHUBATEM 14 - njo bible

1 CHUBATEM 14

¹Iba mapang nung Yeroboam jabaso Abija shiranga aküm.

²Aser Yeroboami pei kinungtsü dang ashi, “Aramesoang, aser Yeroboam kinungtsüa ta memetetdaktsütsüsa yimlibilema ne sasa sobuang, aser Shiloi oang. Aser ajiang, idakji ainkar Ahija shibai ni item madak chuba asütsü ta jembi pa dangi oang,

³Aser nai amtsük ter den amsang tera den ninang mojitzü meso ka bener pa dangi oang aser pai ne dang tanurji kechi akümtsü aji ashitsü.”

⁴Yeroboam kinungtsüi yamaji inyak aser aramesoa Shiloi Ahija kidangi aru. Tang Ahija tenük agi mangu, kechiaser pa tambur liasü.

⁵Aser KIBUBAi Ahija dang ashi, “Ajiang, Yeroboam kinungtsü lar jabaso indang asüngdangtsü arur, kechiaser pa shiranga lir; yamai la dang shiang, kechiaser la arudang lai tangar tetsür ama arutsü.”

⁶Kodang Ahijai la kishizüng anasai aruba tsüngken angashia ashi, “Aitang, na Yeroboam kinungtsü, kechiba nai tangar tetsür ama sayur! Kechiaser na asoshi osang tamajung kü dang metetdaktsüogo.

⁷Israel Tsüngrem KIBUBAi yamai ashir ta Yeroboam dangi or shiang, ni na ne nübur rongnung uludaktsü, aser pei nübur Israel madak chuba kümdaktsü,

⁸aser Dawid kidong nungi yimliji rakzüka ne nem agütsü; saka kü tenzüker Dawid shibai kü ozüngtem ayu, aser shibai pei mulung ajak agi ni ashiba sülen anidak aser kü nükdang ajungba dang inyak, pa ama na masü;

⁹saka nai ne jakdang alir ajak dak alia tamajung inyak, aser ni nungi pila-a or tangar süngyanglu tsüngremtem yanglu, aser ni jashidakja ne sülen ni toktsü.

¹⁰ Anungji ajiang, ni Yeroboam kidong anema tamajung bener arutsü, aser Yeroboam nungi tebur chanu ajak leptoktsü; shiba shibanga ali aser Israel nung ali ajak yamaji ki aokertemi scü ama Yeroboam kidong nungi meshimeshia ajak mesama tashi okdoktsü.

¹¹Yeroboam kinunger shiba yimti nung südir azütemi achitsü aser shiba moapu nung südir, anüng ozütemi achitsü, kechiaser KIBUBAi yamaji jembiogo.

¹²“Anungji na aramesoang aser ner kidangi oang, aser kodang na ner yimti-i idir, ne chir asütsü.

¹³Israel nunger ajaki pa asoshi mang ayimtsü, aser aremtsü, kechiaser Yeroboam kidong dak KIBUBA Israel Tsüngremi pa tsütsü tajung tera angu anungji pa dang leperi aotsü.

¹⁴Ano KIBUBAi Yeroboam kidong iba anogo nungji leptoktsü asoshi Israel madak chuba ka adokdaktsütsü. Aser kechi? tanga aji takoktsü.

¹⁵Kechiaser tzü nung kümbok arakzüba ama KIBUBAi Israel anokzüdaktsütsü aser iba ali tajung koba tetsü-teboutem nem agütsüba lima nungi Israel tera den meküpdoktsü aser parnok Eufrata külenji prokshitsü, kechiaser parnoki KIBUBA ain adokdakja tekülemdak yanglu.

¹⁶Pai Yeroboam tai asoshi Israel jentoktsü kechiaser koba tai pai mena, iba taiji Israel nema menadaktsü.”

¹⁷Anungji Yeroboam kinungtsü aramesoa Tirzai aru, aser la ki anasa arudang tanurji süadok.

¹⁸KIBUBA O agi pa tenzüker Ahija ainkar ajanga jembiba ama Israel nunger ajaki pa arem, aser pa asoshi mang ayim.

¹⁹Yeroboam mapa tanüngba, koda pai rara aser chuba, aji Israel nunger chubatem putipuyang kaket nung zülua lir.

²⁰Yeroboami chubaba küm metsürana liasü, aser pa tebutem den mejang, aser pa chir Nadabi pa melen chuba.

²¹Solomon chir Rehoboami Yihuda nung chuba. Rehoboam chuba akümdang, pa küm lirka liasü, aser pai küm tertenet KIBUBAi Israel kin ajak asoshi shimtetba Yirusalem nung pei tenüng ayutsü asoshi chuba, aser tetsü tenüng Ammontsür Naama liasü.

²²KIBUBA tsüngdang kechi tamajung aji Yihudai inyak, aser parnok tebutemi inyakba dak alia pei temenen agi KIBUBA jashidakja tai mena.

²³ Kechiaser parnoki tenem aser süngdongzüng shia nung tokong külemdak aser tongshi aser Ashera tekülemdak yanglu.

²⁴Idakji tebur o tebur na jabujari temenen liasü. KIBUBAi Israel chirtem nungi agienba kintem tesempatsü temenen ajak parnoki benshi.

²⁵Rehoboam chuba küm pungububa nung Ijip chuba Shishaki Yirusalem anema raratsü atu;

²⁶ aser KIBUBA ki rongsen aser chuba kidang aliba rongsen ajak bener ao, aser Solomoni hon agi yangluba jong ajak pai bener ao.

²⁷Anungji Rehoboam chubai item melen yongmenyin agi jong yanglu, aser chuba temeranger kishi nüker tanishirtem ket nung bendanga agütsü.

²⁸Kodangsa chuba KIBUBA kidangi ao temerangertemi itemji aben aser tanükdak ayu.

²⁹Rehoboam mapa tanüngba indang aser pai inyakba ajak, Yihuda chubatem putipuyang kaket nung itemji zülua melika ma?

³⁰Aser maneni Rehoboam o Yeroboam na tsüngda nung rara liasü.

³¹Rehoboam pei tetsü-teboutem den mejang aser Dawid yimti nung pei tebutem den arem. Pa tetsü tenüng Ammontsür Naama liasü, aser pa melen par chir Abijami chuba.