Read njo 1 CHUBATEM 15 Bible Online

1 CHUBATEM 15 - njo bible

1 CHUBATEM 15

¹Tang Nebat chir Yeroboam küm tertibuba nung Abijami Yihuda madak chubatsü tenzük.

²Pai Yirusalem nung küm asem chuba, aser pa tetsü tenüng Absalom jala tenüng Makaa liasü.

³Aser tebui akhidang inyakba temenen nung pai jaja, aser tebou Dawid ama mesüi KIBUBA pei Tsüngrem tsüngdang pei mulungjang tetemsü mali asü.

⁴ Saka Dawid tenüng atema KIBUBA pa Tsüngremi pa sülen pei chir noktaktsü atema pa nem Yirusalem yanglutsü asoshi milen ka agütsü.

⁵ Kechiaser Dawidi KIBUBA tsüngdang kechi tim aji inyak, aser pa dang kechisa inyaktsü pa taküm piyong mela, oda Het nunger Uria dang inyakba dak alema pai ajak inyak.

⁶Abijam taküm piyong Rehoboam o Yeroboam na tsüngda rara liasü.

⁷Ahijam mapa ajak aser pai inyakba Yihuda nunger chubatem putipuyang kaket nung zülua melika ma?

⁸Abijam tebutem den mejang aser Dawid yimti nung parnoki pa arem, aser pa melen pa chir Asai chuba.

⁹Israel nunger Yeroboam chuba küm metsübuba nung Yihuda madak Asai chubatsü tenzük.

¹⁰Yirusalem nung pai küm lirka chuba, aser pa tetsü tenüng Absalom jala tenüng Makaa liasü.

¹¹Tebu Dawidi inyakba ama KIBUBA tsüngdang kechi tim aji pai inyak.

¹²Aser pai tebur o teburna jabujari mapa endokdaktsü aser tsüraburtemi yangluba süngyanglu ajak pai endok.

¹³Ano tetsü Maka chubatsür süa aliba nungi pai anendaktsü kechiaser lai Ashera asoshi tesempatsü süngyanglu ka yanglu, aser Asai iba süngyangluji lepsatsü, aser Kidron lenten nung aji arong.

¹⁴Tenem tekülemdakji pai magienaka; aji saka Asa mulungsentsü pa taküm ajak nung KIBUBA den ochishia liasü.

¹⁵Pai KIBUBA kidangi pa tebui meshiteta ayuba oset ajak bener aru, aser pai meshitetba oset yongmenyin, aser hon maroktem KIBUBA ki dangi bener aru.

¹⁶Asa aser Israel nunger chuba Baasha na tsüngda nung parnok taküm piyong rara liasü.

¹⁷Israel chuba Baashai Yihuda anema atu, aser Yihuda chuba Asa dangi shinga oli aruli ta mesüdaktsütsü atema pai Rama yanglu.

¹⁸Asai KIBUBA kidang oset ayudak aliba hon aser taribi ajak agi, aser chuba kidang aliba oset ajak agia itemji pei tenzükertem nem agütsü, aser Asa chubai Damaska nung aliba Siria chuba Hezron chir Tabrimmon, par jabaso Ben-hadad dangi yoka ashi,

¹⁹“Kübu aser nebu na tsüngda nung yimjung aliba ama ana tsüngda nunga yudi. Ni ne dangi hon taribi sempet yokdagi. Israel chuba Baashai ni nungi atsünga aotsüsa: oang, pa den yimjungji raksa-ang.”

²⁰Ben-hadadi Asa chuba dang anga, aser Israel yimtitem anema pa temeranger telok tanishirtem yoka, Ijon, Dan, Abel-beth-Maka aser Khinnerota ajak, aser Naftali ajak amak.

²¹Kodang Baashai aji angashi, pai Rama nung ki yangluba anen, aser Tirza nung ali.

²²Idangji Asa chubai Yihuda lima ajak nung osang prokshi, shinga anünga metoktsü; aser parnoki Rama nung aliba lung, aser süng koba agi Baashai yanglu item ajak bener ao, aser Asa chubai Benjamin nung Geba aser Mizpa yanglu.

²³Tang Asai inyakba mapa ajak, pa tashi ajak aser pai inyakba ajak aser pai yangluba yimti ajak, Yihuda nunger chubatem putipuyang kaket nung zülua melika ma? Saka pa tain akümdang tetsüng nung komo adok.

²⁴Asa tetsü-teboutem den mejang aser pei tsürabur den pa pei tebu chuba yimti nung arem, aser pa melena pei chir Yehoshafati chuba.

²⁵Yihuda chuba Asai kümnabuba chubadang Nadab chir Yeroboami Israel madak chubatsü tenzük, aser pai Israel madak küm ana chuba.

²⁶Pai KIBUBA jakdang kechi tamajung aji inyak, aser tebui jajaba ama jaja-a pei temenen agi Israel nunger temenen menadaktsü.

²⁷Ahija chir Baasha, Issakar kidong anema pai apuso, aser Baashai Gibbeton nung koba Filistia nunger meyong liasü pa idakji tepset, kechiaser Nadab aser Israel nunger ajaki Gibbeton makbangya liasü.

²⁸Yihuda chuba Asai küm asembuba chubaba mapang nung Baashai pa tepset aser pa melena chuba.

²⁹Pa chuba kümli-i, Yeroboam kidong ajak pai tepset, Yeroboam asoshi taküm alir shinga pai metoktsü, aser KIBUBAi ashiba ama kechi pai Shilon nunger pa tenzüker Ahija agi jembi, yamaji pai pa samatsü.

³⁰Kechiyong Yeroboam temenentem koba pai mena aser koba pai Israel nunger nem tai menadaktsü, aser KIBUBA Israel Tsüngrema ain adokdaktsü.

³¹Nabadi inyakba mapa aser pai kechisa inyak, itemji Israel nunger chubatem putipuyang kaket nung zülua melika ma?

³²Aser Asa o Baasha na tsüngda nung parnok arishi piyong rara liasü.

³³Yihuda chuba Asai küm asembuba chubadang Ahija chir Baashai Tirza nung Israel ajak madak chubatsü tenzük, aser küm metsürpezü chuba.

³⁴Pai KIBUBA tsüngdang kechi temenen aji inyaka Yeroboam lenmang nung jaja aser pei temenen agi Israel nungera temenen menadaktsü.