Read njo 1 CHUBATEM 16 Bible Online

1 CHUBATEM 16 - njo bible

1 CHUBATEM 16

¹KIBUBA O Hannai chir Yehu dangi Baasha anema ashi,

²“Auyi nungi ni na ajungket aser kü nübur Israel madak na chuba kümdaktsü, saka nai Yeroboam lenmang nung jaja aser kü nübur Israel temenen menadaktsü, aser parnok temenen agi ni jashidaktsü.

³Ajiang, ni Baasha aser pa kibong meshimeshia oktoktsü, aser ni ne kibong Nabat chir Yeroboam kibong ama kümdaktsütsü.

⁴Aser shiba Baasha den yimti nung südir, azütemi achitsü aser shiba pa den moapu nung südir, anüng ozütemi achitsü.”

⁵Tang Baashai inyakba mapa aser pa tashi, Israel nunger chubatem putipuyang kaket nung zülua melika ma?

⁶Baasha pei tsürabur den mejang, aser Tirza nung arem aser pa chir Elai pa melena chuba.

⁷Tang talisa Hanani chir Yehu ainkar ajanga KIBUBA O Baasha aser par kibong anema aru, kechiaser pai KIBUBA jakdang kechisa tamajung liasü aji inyak. Yeroboam kibong mesüka aser pai pa tepsetba ama, pai pei teka agi inyakba agi KIBUBA jashidaktsü.

⁸Yihuda chuba Asai küm metsürtrokbuba chubaba küm nung Baasha chir Elai Tirza nung Israel madak chubatsü tenzük, aser küm ana chuba.

⁹Par kor talungtsü tesadang ka madak tanishir, pa tenzüker Zimri-i pa anema apuso, tang pai Arza kibong koba Tirza kibong madak liasü, idakji pa yi jema liasü.

¹⁰Zimri-i oa, pa tepset aser pa melena chuba, koba Yihuda chuba Asai küm metsürtenetbuba chuba dang liasü.

¹¹Kodang pai chubatsü tenzük, pa chuba menden nung menli-i, Baasha kibong ajak lepseta, tebur chanu kata pai metoktsü, mesüra par kimang mesüra par tembar kata meyutsü.

¹²Yamaji KIBUBA O agi ashiba ama Baasha kibong ajak Zimri-i samatsü, koba Yehu ainkar agi Baasha anema jembia liasü;

¹³kechiaser Baasha temenen ajak, aser par chir Ela temenen ajak koba parnoki mena aser Israel Tsüngrem KIBUBA anema parnok süngyanglutem agi KIBUBA jashidakja Israel tai menadaktsü.

¹⁴Tang Ela tanüngba mapa aser pai inyakba ajak Israel chubatem putipuyang kaket nung zülua melika ma?

¹⁵Yihuda chuba Asa küm metsürtenetbuba chubadang, Tirza nung Zimri-i anogo tenet chuba. Tang Israel temerangertem Filistia nunger yimti Gibbeton anema sentepa liasü.

¹⁶Kodang tanendak alir Israel nisungtem Zimri-i tasa tamajung agi chubaji tepsetogo ta angashi parnoki temeranger tanishir Omri Israel madak chuba kümdaktsü.

¹⁷Omri Israel nunger ajak anir Gibbeton nungi atu, aser parnoki Tirza meketbang.

¹⁸Kodang Zimri yimtiji agiogo ta angu, pai chuba kidangi ai, aser mi agi pai chuba kiji rongtoktsü aser pa-a rongseta asü.

¹⁹Kechiaser pai KIBUBA madang kechi tamajung aji benshia Yeroboam lenmang nung jaja aser kechi temenen pai mena iba jagi pai Israel tai menadaktsü.

²⁰Tang Zimri tanüngba mapa aser pai anema apusoba ajakji Israel nunger chubatem putipuyang kaket nung itemji zülua melika ma?

²¹Idangji Israel nunger ana küma sadang, nisung tesadang kati Ginat chir Tibni chuba kümdaktsütsü pa sülen anidak, aser tesadang kati Omri sülen anitak.

²²Saka shiri Omri sülen anitak, parnoki Ginat chir Tibni sülen anitakertemji akok; anungji Tibni asü aser Omri-i chuba.

²³Yihuda chuba Asa küm semerka buba chubadang Omri Israel madak chubatsü tenzük, aser küm terana chuba; pai Tirza nung küm trok chuba.

²⁴Pai Shemer dang nungi Samaria tenemji taribi touzük mori ana agi ali, aser pai tenem nung ki yanglu, iba tenem kibuba Shemer nüngtem, pai yangluba yimti tenüng Samaria ta aja.

²⁵Omri-i KIBUBA Tsüngrem tsüngdang kechi tamajung aji inyak, aser pa dang tama alir ajak dang nungi tamajungba inyak.

²⁶Kechiaser pai Nebat chir Yeroboam lenmang nung jaja, aser pa tai agi Israel nungera tai menadaktsü, aser chuba amajok mapa agi Israel Tsüngrem KIBUBA ain adokdaktsü.

²⁷Tang Omri mapa tanüngba kechi pai inyak, aser pa tashi koba pai sayu, itemji Israel nunger chubatem putipuyang kaket nung zülua melika ma?

²⁸Anungji Omri pei tebutem den mejang, aser pa Samaria nung arem. Iba sülen pa chir Ahabi pa melen chuba.

²⁹Yihuda chuba Asai küm semertibuba chubaba küm nung Omri chir Ahabi Israel madak chubatsü tenzük, aser Omri chir Ahabi Samaria nung Israel madak küm metsür ana chuba.

³⁰Omri chir Ahabi KIBUBA jakdang kechi majung aji pa jakdang alir ajak dang nungi tamajungba tai mena.

³¹Nebat chir Yeroboam temenentem nung jajatsüji mapa temela ka amai, pai Sidon nunger chuba Etbaal jala Yezebeliji pei kinungtsü asütsü agi, aser pai Baal dangi oa tenzüka pa külem.

³²Baal kidang pai Baal asoshi tekülemdak yanglu, koba pai Samaria nunga yanglu.

³³Ahabi Ashera yanglu, aser pai Israel Tsüngrem KIBUBA jashidaktsütsü akhidang chubatem dang nungi tali inyak.

³⁴Pa tendak Bethel nunger Hieli Yeriko yanglu, pai pei mezüng jabaso Abiram tenla-a kimungji tenzük, aser süngkhümtemji pei jabaso tesübuba Segub agi tenla-a yanglu, aser ibaji Nun chir Yihusuai KIBUBA O jembiba ama atalok.