Read njo 1 CHUBATEM 17 Bible Online

1 CHUBATEM 17 - njo bible

1 CHUBATEM 17

¹ Tishbi nunger Elija shiba Gilead nung liasü, pai Ahab dang ashi, “Israel Tsüngrem KIBUBA shiba ni tenzüker, pa taküm alinung, kü oi memelarabangla alima nung küm asem tashi azüngtzü mesüra tzünglu marutsü.”

²KIBUBA Oji pa dangi arua ashi,

³“Yang nungi apusoa anüdokleni oang, aser Yordan jakdang Kherith ayong anasa atsüka liang.

⁴Yangji nai ayong tzüji ajemtsü aser idakji na mesütsü ni warotem dang melatsü.”

⁵KIBUBA O agi ashiba amaji pa oa pai inyak; kechiaser pa oa Yordan jakdang Kherith ayong nung liasü.

⁶Warotemi amtsük aser shi anepdang aser aonung pa nem bener arutsü, aser pai ayong tzüji ajem.

⁷Kenpiga lir ayongji kongadok, kechiaser alima nung tzünglu maru.

⁸KIBUBA O pa dangi arua ashi, “Aramesoang aser Sidon nung aliba Zarefathi na oang aser idakji liang;

⁹ ajiang, ni amitsür ka dang na kümzüktsü melaogo.”

¹⁰Anungji pai aramesoa Zarefathi ao, aser kodang pai yimti süngkhümji atong, ajiang, amitsür ka idakji süng koya liasü, aser pai la jar ashi, “Yimlibilema ni ajemtsü asoshi tzü tera bener arung.”

¹¹Lai aji bener arutsü oya alidang, pai la ja-a ashi, “Chi tekapu ka ni asoshi bener arujang.”

¹²Lai langzü, “KIBUBA ne Tsüngrem taküm alinung ni ashir, kü ket nung amtsük kata mali, saka jangbong nung jang tekapu ka dang lir aser bongdang nung totzü tera ka lir, aser ajiang, kü chir küna aji chir asütsü atema ni süng bendener.”

¹³Elijai la dang ashi, “Tetsübu, oang aser nai ashiba ama inyakang, saka tamasa kü nem amtsük tila ka yanglua aji kü nem bener arujang, aser tesülen na aser ne chir asoshi yangluang.

¹⁴Kechiaser Israel Tsüngrem KIBUBAi yamai ashir, KIBUBAi alima nung tzünglu meyok tashi ne jangbong aser totzü bongdang tazüng makümtsü.”

¹⁵Lai oa Elijai ashiba ama inyak aser Elija aser lar kibong anogo aika chia-ajem.

¹⁶Elijai KIBUBA o agi jembiba ama jangbong aser totzü bongdang kodanga tazüng maküm.

¹⁷Iba sülen tatsüka lir tetsürlar chirji shirangadok. Pa shirangba kanga tamajungba küma süadok.

¹⁸Anungji lai Elija dang ashi, “Tsüngrem nisung nai kechiba kü dang yamai inyaker. Kü temenen bilemtetdaktsütsü aser kü chir südaktsütsü kechiba na yagi aru?”

¹⁹Pai la dang ashi, “Ne chir kü nem kua,” pai pa tetsürla teku nungi ajungzük, aser pa alidak temaba taktangi anir atua pa yipten nung yutsü.

²⁰Pai KIBUBA dang ayimtena ashi, “Oh kü Tsüngrem KIBUBA, ni anena aliba amitsür kidangi nai par chir tepseta lendong bener aru a ma?”

²¹ Pai asemben tashi tanur dakji nemeta KIBUBA dang ayimtena ashi, “Oh kü Tsüngrem, iba tanur tanela pa dangi meyipa arudakjang” ta ni sarasademer.

²²Elija ola KIBUBAi angashi, aser tanur tanelaji tanaben pa dangi meyipa arua pa shia aru.

²³Elijai tanurji ajunga aru, aser pai taktang nungi paji temaba kidangi anir aru, aser pai pa tetsü nem agüja ashi, “Ajiang, ne chir taküm lir.”

²⁴Tetsürlai Elija dang ashi, “Na Tsüngrem nisung ta ni meteter, aser ne bang nung KIBUBA Oji shitak lir.”