Read njo 1 CHUBATEM 18 Bible Online

1 CHUBATEM 18 - njo bible

1 CHUBATEM 18

¹Mapang talangka lir külen kümsembuba nung KIBUBA O Elija dangi arua ashi, “Nai Ahab dangi oa ne sasa sayuang, aser ni alimai tzünglu yoktsü.”

²Anungji Elijai Ahab dangi oa pa sasa sayu.Tang Samaria nung ayawaraji kanga sashia liasü.

³Ahabi chuba ki kibur Obadia aja, shiba KIBUBA dak bendanga amanger ka liasü.

⁴Kodang Yezebeli KIBUBAr ainkartem tepseta liasü. Obadiai ainkar noklang ka anir, parnokji tenem lungpok nung miima yur chi aser tzü agi mesü.

⁵Ahabi Obadia dang ashi, “Ali nung tzüpokdak aser ayong ajak ajanga, kor aser gadotem taküm kümzüktsü asenoki rem ngushia, shiruru ajak sama lir bushia oang.”

⁶Anungji parnoki alushiji lemsar apuso, aser Ahab tesem ka leni aser Obadia tesem ka leni ta ao.

⁷Obadia lenmang nung alidang, ajiang, pai Elija ajuru, aser pai pa ajitet aser pei tejak alilen mechia lur asüngdang, “Na kü kibur Elija asü?”

⁸Pai langzü, “Paji ni, oang aser ne kibur dang shiang ajiang, yangi Elija lir.”

⁹Pai ashi, “Ne tenzüker Ahab ket nung bendanga agütsür, ni tepsettsüsa ni kechi tai ali?”

¹⁰KIBUBA ne Tsüngrem ali tashi, kin mesüra yimli kata metoktsüi kü Kibubai na bushi; aser parnoki kodang pa yangi mali ta ashi parnoki na mangu ta pai kin aser yimli agi azüngashi.

¹¹Tang nai ashir, “Oang ne Kibuba dang shiang, ajiang, yangi Elija lir.

¹²Ni na nungi oli-i, ni memeteti KIBUBA tanela agi na bener aotsü, aser kodang ni Ahab dangi or shidir, pai na mangutsü aser ni tepsettsü. Aji saka ne tenzükeri lanuwa nungi KIBUBA tsübur.

¹³Ni kechi inyak aji kü KIBUBA dang mashia ma? Kodang Yezebeli KIBUBA ainkartem tepset, ni KIBUBA ainkar noklang ka parnok lungpok ana nung tenem nem shibanga yur, tzü aser amtsük agi mesü.

¹⁴Aser tang nai ashir, Oang, ne Kibuba dang shiang, Ajiang, Elija yangi lir; aser pai ni tepsettsü.”

¹⁵Elijai ashi, “Temeranger Telok KIBUBA shiba tsüngdang ni noktaker pa ali tashi, ni kü sasa shitak pa dang tanü adoka sayutsü.”

¹⁶Anungji Obadia Ahab den ajurutsü ao.

¹⁷Kodang Ahabi Elija angu, Ahabi pa dang asüngdang, “Israel timtemdaktsübaji na ama?”

¹⁸Pai langzü, “Ni Israel tim metemdaktsü, saka na aser nebu kibongi KIBUBAi melabatem amadok aser nai Baal sülen anidak.

¹⁹Anungji tang yokang aser Israel nunger ajak Karmel tenem nung, aser Yezebel langbang nung chiyungertem Baal ainkertem noklang pezü ser tenem, aser Ashera ainkertem noklang pezü kü dangi sentepdakjang.”

²⁰Anungji Ahabi Israel chir ajak dangi yok, aser ainkar ajak Karmel tenem nung sentepdaktsü.

²¹Elija nisungtem anasai arua ashi, “Nenoki iba tebilemba ana nung kopiga alitsü, KIBUBAji Tsüngrem süra pa sülen anidakang aser Baal süra, pa sülen anidakang.” Saka nisungtemi pa dang o kata melangzü.

²²Idangji Elijai nisungtem dangji ashi, “KIBUBA ainkar ni, oda ni dang anünga lir; saka Baal ainker noklang pezü ser tenem lir.

²³Parnoki nashi pungchi ana asenok nem agütsüdakjang, aser parnoki parnok asoshi nashi pungchi ka shimtetdakjang aser ibaji anüka alangsar süng manung ajonglokang, saka mi tapudaktsü, aser nia nashi pungchi kaji yamaji inyaktsü aser süng manungji ajongloktsü saka mi metsüloktsü.

²⁴Nenoki nenok tsüngrem dang sarasademang, aser nia KIBUBA tenüng nung sarasademtsü, aser Tsüngrem shibai mi agi langzüdir, paji shitakba Tsüngrem lir.” Aser nisung ajaki langzüa ashi, “Aji shitak lir.”

²⁵Elijai Baal ainkertem dang ashi, “Nenoki nenok asoshi nashi pungchi ka shimtetang, aser tamasa aji renemang, kechiaser nenok aika, aser mi tapu saka nenok tsüngrem tenüng nung sarasademang.”

²⁶Parnok nem agütsüba nashi pungchiji parnoki agi, aser parnoki aji renem, aser anepdang nungi teruto tashi parnoki Baal tenüng nung ayimtena sarasadema ashi, “Oh Baal, onok dang angang.” Saka ola kata maliasü aser melangzü. Aser tekülemdakji parnoki pungtena ayimten.

²⁷Anjongmeshi nung Elijai parnok menüja ashi, “Tashi agi ayimtenang, kechiaser pa-a Tsüngrem ka, pa ken tena ali südi, mesüra pa oadok, mesüra aeni ao asü, aser pa mejanga lira mesotsüla.”

²⁸Parnoki tashiba agi ayimten, aser parnok yimya amato azü madok tashi nok aser nü agi temang nung wa-a tsünga ayimten.

²⁹Kodang anjongmeshi süia ao, nikongtsütsü tashia parnoki ayimten, saka ola kata maliasü, kechiaser shingaia melangzü mesüra shingaia parnok mezüngshi.

³⁰Elijai nisungtem dang ashi, “Ni anasai arung;” aser nisung ajak pa anasai aru. Aser pai KIBUBA tekülemdak raksa-a alibaji yanglushi.

³¹Elijai Yakober chirtem kidong yongsük ama lung terana bener aru, shiba dangi Tsüngrem O arua ashi, “Israelji ne tenüng asütsü.”

³²KIBUBA tenüng nung pai lung agi tekülemdak ka yanglu, aser metsüjang tatakzük ana sema pai külentzü tuluka atu.

³³Aser pai süngji timi anang aser nashi pungchiji anüka alangsar süng manungji enok, aser pai ashi, “Tzü mori tulu pezü sünga tenladak manungji shilokjang aser süngdakji enokang.”

³⁴Pai ashi. “Anaben tashi yamaji inyakang;” aser parnoki tanaben inyak. Pai ashi, “Tasembena inyakang;” aser parnoki tasembena inyak.

³⁵Aser tenladak ajakji tzü agi asüng aser külentzüjia tzü agi sünga enok.

³⁶Nikongdang tekülemba mapang nung Elija ainkar anasa arua ashi, “Oh KIBUBA, Abraham, Isak aser Israel Tsüngrem, tanü ne tenzükeri item ajak dang ne O ama ni inyaker, aser Israel nung naji Tsüngrem ta metetdakjang,

³⁷Oh KIBUBA, item nisung yagi naji KIBUBA Tsüngrem ta metettsü aser nai parnok mulung meyipdaktsütsü asoshi nai kü dang angang, kü dang angang.”

³⁸Idangji KIBUBA miji alu, aser tekülemdak lung, süng, ali aser külentzü nung tzü ajakji menakrepa arong.

³⁹Kodang nisungtemi aji angu parnoki ali nung apudaka ashi, “KIBUBAji Tsüngrem, KIBUBAji Tsüngrem.”

⁴⁰Elijai parnok dang ashi, “Baal ainker kata tejendaktsüi sotang.” Aser parnoki parnok apu aser Elijai Kishon ayongi anir lua parnok yangji tepset.

⁴¹Elija Ahab dang ashi, “Aramesoang, chia jemang, kechiaser tzünglu talubu arutsü ola lir.”

⁴²Anungji Ahabi chia ajemtsü asoshi atu, aser Elija Karmel tenem jagi atu aser pai ali nung apudaka pei tejak temokok ana tsüngda nung ayu.

⁴³Pai pei tenzüker dang ashi, “Tang tuang aser tzüyim tzütsüji ajiang.” Aser pai tua repranger ashi, “Kecha mali;” aser pai ashi, “Ano tenet ben tashi tuang.”

⁴⁴Aser tenetbenbuba nung pai ashi, “Nisung teka tila ka ama tzüyim nungi mepet adokdagi.” Aser pai ashi, “Tuang aser Ahab dang shiang, Lua tzünglu agi na majadangtsüsa ne kor talungtsü renemang.”

⁴⁵Aser mapang tatsüka tsüngda nung mepet aser mopung agi anüng manga aküm, aser tzünglu tulu ka aru. Aser Ahabi Yezreeli kor nung sanger ao.

⁴⁶Yamaji KIBUBA teka Elija dak liasü, aser pai pei teperem nung nangri kanger Ahab madang Yezreel tsütsüi asema ao.