Read njo 1 CHUBATEM 19 Bible Online

1 CHUBATEM 19 - njo bible

1 CHUBATEM 19

¹Elijai inyakba ajak aser pai ainkertem koda nok agi tepset item ajakji Ahabi Yezebel dang ashi.

²Idangji Yezebeli Elija dangi osang bener ka yoka ashi, “Ni ne takümji asüng iba mapang nung parnok rongnung ka amaji meyanglutsüra, tsüngremtemi kü dang talia inyakang.”

³Kodang Elijai aji angashi, pai aramesoa pei taküm asoshi ajen, aser Yihuda lima Beershebai arua pei kilir idakji yutsü.

⁴Saka pai pei sasa anogo ka lenmang azüngmeyakdaki ao, aser süngtong ka kübok amen, pa pei sasa asütsü asoshi mepishia ashi, “Tang ya joko teperi, Oh, KIBUBA, kü taküm bener oang, kechiaser ni kü tsürabur dang nungi tajungba masü.”

⁵Aser pai süngtong kübokji mejang, aser ajiang, kotak tenyar kati pa dak kongshia ashi, “Aramesoang aser chiang.”

⁶Aser pai reprang, aser ajiang, pa tekolak madang mijang nung awangba amtsük aser tzü bongdang ka liasü; aser pai aji chia jemer tanaben mejang.

⁷Aser KIBUBA kotak tenyar tanaben arua pa dak tanaben kongshia ashi, “Aramesoang aser chiang, kechiaser na asoshi lenmangji kanga talang.”

⁸Aser pai aramesoa chia-ajem aser iba chiyungtsü tashi nungji anogo lir aser lir aonung Tsüngrem tenem Horebi atu.

⁹Pai lungpok kati arua idakji ali, aser ajiang, KIBUBA O pa dangi arua ashi, “Elija, na yangi kechi inyaker?”

¹⁰Pai langzü, “KIBUBA Tsüngrem temerangertem asoshi ni kanga dang nükmir, kechiaser Israel chir ajaki ne tezüngzüktepba raksa-a ne tekülemdak raksa aser nok agi ne ainkartem tepset, aser oda ni kü kija dang anüng aser parnoki taküma agitsü bushir.”

¹¹Pai ashi, “Oang aser KIBUBA tsüngdang tenem nungji noktakang,” aser ajiang, KIBUBA ajanga süi, aser mopung tulu arua tenemtemji shisatsü, aser KIBUBA tsüngdang lungtemji jaksa, saka KIBUBAji mopung nung maliasü; mopung sülen menoknok anok, saka menoknok nungji KIBUBA maliasü;

¹²aser menoknok sülen mi aru, saka mi nungjia KIBUBA maliasü; aser mi sülenji ola tila ka aru.

¹³Kodang Elijai aji angashi, pa sü agi pei tejak meyipanger ao, aser lungpok anasaji noktak aser ajiang, pa dangi ola ka arua ashi, “Elija, na yangi kechi inyaker.”

¹⁴Aser pai ashi, “KIBUBA Tsüngrem temerangertem asoshi ni kanga dang nükmir, kechiaser Israel chir ajaki ne tezüngzüktepba amadoker, ne tekülemdak raksa aser nok agi ne ainkartem tepset aser oda ni kija dang toktsü; aser parnoki kü taküma agitsü bushir.”

¹⁵ KIBUBAi pa dang ashi, “Ne lenmangi meyipa Damaska azüngmeyakdaki oang aser kodang na tonga odir, Siria madak chuba asütsü nai Hazael mezüja shimtetang.

¹⁶Israel madak chuba asütsü nai Nimshir chir Yehu mezüja shimtetang, aser Abel-mehola nunger Shapat chir Elisha na melena ainkar asütsü nai mezüja shimtetang.

¹⁷Hazel nok nungi jenbuba nisungji Yehui tepsettsü, aser Yehu nok nungi jenbuba nisungji Elishai tepsettsü.

¹⁸ Saka ni Israel nung Baal tsüngrem tsüngdang mapudakertem aser pa dak tebang memesepertem meyi tenet ni asoshi yutsütsü.”

¹⁹Anungji pa yang nungjagi pila, aser Shafat chir Elisha shiba nashi pungchi jura terana den alu alaya lia pai angu, aser Elija pa anasa oa pa süji pa dak amloktsü.

²⁰Pai nashi pungchitemji toktsür Elija dangi asema oa ashi, “Ni kübu aser kütsü dak tebang meseptsü ne dang mepishir, aser ajiserang ne sülen anidaktsü.” Pai pa dang ashi, “Meyipa oang, ni ne dang kechi inyak?”

²¹Pai pa sülen manidaki meyipa oa, alu alaba nashi pungchitemji anir arua tepset aser alu alaba oset jagi shiji metar nisungtem nem agütsü aser parnoki aji chi. Idangji pai apusoa Elija sülen oa pa dang tenzük.