Read njo 1 CHUBATEM 2 Bible Online

1 CHUBATEM 2 - njo bible

1 CHUBATEM 2

¹Tang Dawid asütsü anogo tonga aru nung pai pei jabaso Solomon dang ashi,

²“Ni alima ajak yimya lenmangi odagi, anungji na tashi itang, aser ne sasa nisung ka ta sayuang.

³KIBUBA ne Tsüngrem ne den yuang, pa lenmang nung jajaang aser pa tzüzüng ozüng, pa ozüng, pa telatet ozüng aser pa kuli, Mosa ozüng nung züluba amato nai kechisa inyaker, aser ne sasa nai kolenisa odir idakji renloktsü nai yuang.

⁴Kü indang jembiba KIBUBAi pa o atalokdaktsütsü, ne chirtemi pei mulungsentsü ajak agi aser pei tanela ajak agi ochiba nung kü jakdang jajatsü, parnok mapa nung temulung agütsüra, Israel chuba menden nung nisung ka mendaktsütsü na tamakok maludaktsütsü ta KIBUBAi ashir.”

⁵ “Zeruia chir Yoabi kü dang kechi inyak ajia tali nai metet, Israel temeranger tanishir telok ana dang pai kechi inyak aser Yether chir Amasa shiba pai tepset, aser yimjung mapang nung rara-a azü tokshi, aser pa teperem nung naia aliba nangri nung, aser tsüngsem nung iba raraba azü enlok.

⁶Anungji ne shisatsü tangatetba ama inyakang, saka pa ku temesüngji tesünep nung leperi teyuok.

⁷Saka Gilead nunger Barzillai chirtem dang temeim sayuang, aser ne langbang nung chiyungba pur parnok südakjang, kechiyong ni ne adianu Absalom nungi ajen dang parnok kü dangi aru.”

⁸Ano ajiang, Gera chir Shimei, Bahurim nungi Benjamin nunger shibai ni Mahanaimi aoba anogo nung kü dang atakatem, parnok ne den lir, saka pa kü den Yordan nung ajuruteptsü alu, aser ni KIBUBA agi azüngashia ashi,“Ni na nok agi mesüdaktsütsü.

⁹Tang aji asü nung pa tai maka tabo tezüngshi, kechiyong na shisa taka nisung; aser nai pa dang kechi inyaktsü aji metettsü, aser nai pa ku temesüngji azü den leperi abentsü.”

¹⁰Tang Dawid pei tebutem den mejang aser Dawid yimti nung arem.

¹¹ Dawidi Israel madak chubabaji küm lir liasü. Hebron nung pai küm tenet chuba, aser Yirusalem nung pai küm semer-asem chuba.

¹² Aser tebu Dawid menden nung Solomon amen aser pa yimli kanga ulua yanglu.

¹³Idangji Haggith chir Adonija Solomon tetsü Bathsheba dangi aru. Aser lai asüngdang, “Na yimjung nung arur asü?” Pai langzü, “Yimjung nung.”

¹⁴Ano pai ashi, “Ne dang ni ashitsü langka lir.” Lai langzü, “Shiang.”

¹⁵Pai ashi, “Yimliji kü meyong ta nai metet aser kü nem chubadaktsütsü Israel chir ajaki kü dak repranger, saka yimliji meyipogo aser künu meyong kümogo; kechiyong ibaji KIBUBA nungi pa meyong liasü.

¹⁶Tang ni ne dang langka mepishir, Kü dang ma ta teshi,” aser lai pa dang ashi, ‘Shiang.’

¹⁷ Pai ashi, ‘Shunam tsür Abishagji kü kinungtsü asütsü agüjang ta nai Solomon dang ashitsü ni mepishir.’

¹⁸Bathshebai langzü, ‘Hau, ni na asoshi chuba den jembitsüdi.’

¹⁹Anungji Bathshebai Adonija asoshi Solomon den jembitsü ao. Aser chubai aramesoa la den ajuruteptsü noktak aser pa sasa la tsüngdang apudak aser pei chuba menden nung amen, aser pai tetsü amentsü asoshi menden ka agütsü aser lai pa tajichi len amen.

²⁰Idangji lai ashi, “Ni ne dang langka mepishinür, kü dang ma ta teshi.” Chubai la dang ashi, “Oja, asüngdangang, ni ne dang ma ta mashitsü.”

²¹Lai ashi, “Shunamtsür Abishagji nedi Adonija kinungtsü asütsü agüjang.”

²²Solomon chubai langzüa tetsü dang ashi, “Adonija asoshi Shunamtsür Abishag kechiba nai asüngdanger? Pa asoshi yimlijia asüngdangang, kechiyong pa küdi, pa asoshi aser putir Abiathar asoshi, aser Zeruia chir Yoab asoshia asüngdangang.”

²³Anungji Solomon chubai KIBUBA agi azüngashia ashi, “Item tasüngdangba agi Adonija taküm magira Tsüngremi iba dang tali kü dang inyakang!

²⁴Anungji tang KIBUBA shibai ni noktakdaktsü, aser kübu Dawid chuba menden nung ni mendaktsü aser shibai pei nangzükba ama kibong yanglutsü, pa ali tashi tanüsa Adonija südaktsütsü.”

²⁵Anungji Solomon chubai Yehoiada chir Benaia nem ozüng agütsü, aser pai Adonija dak lepoktsü aser pa asü.

²⁶ Putir Abiathar dang chubai ashi, “Na ner lu Anathoti jenang, kechiyong na asütsü tetemsü, saka ni na tangbo mesüdaktsütsü, kechiyong kübu Dawid jakdang KIBUBA Tsüngrem temeshi süngden nai apu aser kübu timtemba ajak nung na-a timtema liasü.”

²⁷ Anungji Shilo nung Eli kibong asoshi kechi jembi, KIBUBA o ataloktsü asoshi KIBUBA putir nungi Solomoni pa aridok.

²⁸Iba osangji Yoab dangi aru, kechiyong Yoabi Absalom tsütsü memeyipaka, pai Adonija tsütsü meyip. Aser Yoabi KIBUBA süki nung jenok, aser tenladak tezü nung amet.

²⁹Yoabi KIBUBA süki nung jenokogo aser ajiang, pa tenladak sabang nung lir ta Solomon chuba dang ashi. Idangji Solomoni Yehoiada chir Benaia yoka ashi, “Oang aser pa tepsetang.”

³⁰Benaia KIBUBA süki-i arua pa dang ashi, “Chubai yamai ashir, ‘Arung’ saka pai langzü, ‘Masü, ni yangi asütsü.’ ‘Benaiai tanaben chuba dangi osang bener arua Yoabi yamaji ashir aser pai kü dang yamaji langzü ta ashi.’

³¹Chubai pa dang ashi, “Pai ashiba ama inyakang, aser kübu ki nungi aser ni nungi kecha kuli makai Yoabi pi zü tokshiba, tai bener aotsü asoshi pa tepsetang aser remang.

³²KIBUBAi pa züji pa tekolak manung yutsütsü, kechiaser pai pa dang nungi tajungba aser temeshiba nisung ana pei nok agi tepset. Aser kübu Dawidi memeteti pai Ner chir Abner, Israel temeranger telok arkotong, aser Yether chir Amasa, Yihuda temeranger telok arkotong tepset.

³³Anungji parnok zü Yoab kolak nung alitsü aser pa semchisemnur kolak nung teti alitsü saka Dawid aser pa semchisemnur dang aser pa kidong aser pa chuba menden nung KIBUBA nungi teti tatem makai yimjung alitsü.”

³⁴Anungji Yehoiada chir Benaia atu aser pa dak pungloka pa tepset aser arem nung pei kidang paji arem.

³⁵Chubai Yehoiada chir Benaia temeranger telok pa melena arkotong kümdaktsü. Aser chubai putir Abiathar melena putir Zadok pa menden nung mendaktsü.

³⁶Chubai Shimei tajai yoka pa dang ashi, “Nai Yirusalem nung na asoshi ki ka yangluang aser nai iba nungjagi tuo.

³⁷Kechiyong koba anogo nung nai Kidron ayong ajanga odir, nai ya jungjunga metetang, na shitak asütsü aser ne züji ne kolak manung alitsü.”

³⁸Shimei chuba dang langzü, “Chubai Ashibaji junger; kü Kibuba chubai ashiba ama, ne tenzükeri benshitsü.” Aser anogo aika Shimei-i Yirusalem nung liasü.

³⁹Saka küm asem tema arudang, Gath chuba, Maaka chir Akhish dangi Shimei-er alar ana jena ao. Aser parnoki Shimei dang ashi, ‘Ajiang, ne tenzükertem Gath nung lir.’

⁴⁰Shimei aramesoa pa gado renemer Akhish dangi pei tenzüker bushitsü Gathi oa pai alartem Gath nungi anir aru.

⁴¹Shimei Yirusalem nungi Gathi or tanaben meyipa aruogo ta Solomon dang ashi.

⁴²Chubai nisung yoka Shimei jar ashi, “KIBUBA agi ni ne dang azüngashidakja aser na nungtema meshika ma, koba anogo nung nai Yirusalem nungi odir aser senzüdir na shitak asütsü ta meshika ma?” Aser nai kü dang ashi, “Ni angashiba oji kanga junger, ni angatsü.”

⁴³Süra kechiba nai KIBUBA madang azüngashiba aser ne dang melaba o shitak mayu?

⁴⁴Chubai ano Shimei dang ashi, “Nai kübu Dawid tsüngdang inyakba, ne mulungjang nung miima yua aliba tamajung ajak ni metet, anungji chubai ne temenen mapatemji ne kolak nungsa enloktsütsü.”

⁴⁵Saka Solomon chuba moatsütsü, aser Dawid chuba menden KIBUBA tsüngdang teti tatem makai tashi ita alitsü.

⁴⁶Anungji chubai Yehoiada chir Benaia dang ozüng agüja pai oa pa dak lepoktsü aser pa asü. Aser Solomon teka nung yimliji tashi ita yanglu.