Read njo 1 CHUBATEM 20 Bible Online

1 CHUBATEM 20 - njo bible

1 CHUBATEM 20

¹Siria chuba Ben-hadadi pa temeranger telok ajak aniten, aser pa den chuba semer ana, kor aser kor talungtsü liasü; aser pai tua Samaria meketbang aser iba anema rara.

²Israel chuba Ahab dangi yimti-i pai osang abenertem yoka ashi,

³“Ben-hadadi yamai ashir,” “Ne taribi aser ne honji kü meyong, ne kinungtsütem aser ne chirtem aser oda tajungtiba ajakji kü meyong.”

⁴Aser Israel chubai langzüa ashi, “Nai ashiba ama, Oh chuba, kü KIBUBA, ni akaba ajak ne meyong.”

⁵Osang abenertemji tanaben arua ashi, “Ben-hadadi yamai ashir, Ni shitak ne dangi yamai shia yok, nai ne taribi, ne hon, ne kinungtsütem, aser ne chir ajak kü nem bendanga agütsütsü;

⁶saka asüng iba mapang nungi ni kü tenzükertem yoktsü, aser parnoki ne ki aser ne nükdang kechisa tajung ali itemji parnok teka nung agitsü aser parnoki itemji bener aotsü.”

⁷Idangji Israel chubai linük nung tambur ajak jatena ashi, “Iba nisung yagi kechi koda tamajung bushir aji ajioka yuang ta ni mepishir, kechiaser pai kü kinungtsütem, kü chirtem, kü taribi, aser kü hon asoshi yok, aser ni pa dang menangzüki mali.”

⁸Tamburtem aser nisung ajaki pa dang ashi, “Nai pa dang tanga, mesüra tenangzük.”

⁹Anungji pai Ben-hadad osang abenertem dang ashi, “Chuba kü Kibuba dang shiang, nai tamasa ne tenzükertem dangi kechi asoshi yok aji ni inyaktsü, saka ibaibo ni meinyaktsü.” Aser osang abenertemji pila aser pa dangi tanaben osang bener aru.

¹⁰Ben-hadadi pa dangi yoka ashi, “Kü sülen anidaker ajak asoshi Samaria auyi tekapu ka ka peria süra, tsüngremtemi kü dang talia inyangkang.”

¹¹Idangji Israel chubai pa dang ashi, “Temeranger sobutsü sobur pei sasa asüküma tebilem, ta pa dang shiang.”

¹²Kodang Ben-hadad aser chubatem tanendak chia jema liasü, ya angashia pei tenzükertem dang ashi, “Nenoki renemer tareni noktakang.” Aser yimtiji anema renemer tareni parnok noktak.

¹³Ajiang, ainkar ka Israel chuba Ahab dangi arua ashi,“Nai item telok tulu ya ngurma ta KIBUBAi ashir? Ajiang, tanü ni iba telok ne ket nung bendanga agütsütsü, aser nai ni KIBUBA ta metettsü.”

¹⁴Ahabi asüngdang, “Shibai?” Pai ashi, “Linük nung chuba chirtem asangurtemi ta KIBUBAi ashir.” Idangji pai ashi, “Shibai tongbangji apusotsü?” Pai langzü,“Nai tenzüktsü;”

¹⁵aser pai linük nung chuba chirtem asangurtem külemi sentepdaktsü, aser parnok noklang ana ser semer ana liasü, aser parnok sülen pai nisung ajak sentepdaktsü, Israel chir parnok meyi tenet liasü.

¹⁶Aser parnok teruto nung ao. Saka tanendak semtu nung Ben-hadad aser pa den yariteper, pa aser chuba semerana chia jema liasü.

¹⁷Aser linük nung chuba chirtem aser asangurtem tamasa ao, aser Ben-hadadi yokba asangurtemi pa dang ashi, “Samaria nungi aruba nisung tejaklen arudagi.”

¹⁸Aser pai ashi, “Parnokji yimjung asoshi aruaka mesüra raratsü aruaka parnok taküm dang puang.”

¹⁹Anungji itemi yimti nungi oa, linük nung chuba chirtem asangurtem, aser parnok sülen anidaker temeranger telok lir.

²⁰Aser parnok ajaki pei nisung tepset, aser Siria nungerji jena ao, aser Israel nungeri parnok aria ao, aser Siria nunger chuba Ben-hadad kor nung mener pei kor anishirtem den jena oa pa kümzük.

²¹Israel chubai oa kortem aser kor talungtsü ajak tepset, aser Siria nunger aika tepset.

²²Israel chuba anasai ainkar arua pa dang ashi, “Oa ne sasa tashi ita kümang, aser nai kechi inyaker aji meteta yuang, kechiaser taruba küma Siria chubai na anema arutsü.”

²³Siria chuba tenzükertemi pa dang ashi, “Parnok tsüngremji tenemtem tsüngrem lir, anungji parnok asenok dang nungi tashi taitba; saka asenoki parnok anema lenten nungji raradi, aser shitak parnok dang nungi asenok tashi taitba asütsü.

²⁴Aser ya inyakang, nisung shiai pei alidak nungi chuba aoba lenmang jagi oang, aser talidak tanishirtem tokjang.

²⁵Nai samaba temeranger telok melen temeranger telok, kor asoshi kor, kor talungtsü asoshi kor talungtsü, aser na asoshi temeranger telok ta renema yuang aser parnok anema asenoki lenten nungji raratsü aser shitak parnok dang nungi asenok tashi taitba asütsü” aser parnoki ashibaji anga-a yamaji inyak.

²⁶Kümnabuba metsü mapang nung Ben-hadadi Siria nunger ajak aniten, aser Israel anema raratsü Afeki atu.

²⁷Israel chirtem külemi adenshia chiyungtsü renem, aser parnok anema oa Israel chirtem napong chanu telok tila ana ama anena liasü, saka Siria nungeri linükji asüng.

²⁸Tsüngrem nisung ka anasa arua Israel chuba dang ashi, “KIBUBAi yamai ashir, Siria nungeri yamai jembir, KIBUBAji tenem tsüngrem, saka pa lenten tsüngrem masü, anungji ni iba telok tulu ya ne ket nung bendanga agütsütsü aser nenoki niji KIBUBA ta metettsü.”

²⁹Anogo tenet tashi parnoki kati ka anema noktak aser tenetnübuba nung tongbangji ajurutep aser Israel chirtemi Siria nunger anogo ka nung danga tetsüng temeranger meyi noklang ka tepset.

³⁰Saka tanüngbatemji Afek yimti-i jena ao, aser tanüngba meyi metsürtenet madak jaraji tsük, aser Ben-hadad yimti jena oa taktang telung nung jenok.

³¹Pa tenzükertemi pa dang ashi, “Tang ajiang, Israel chubatem yimlibilem akaba chubatem ta onoki angashi, asenoki anemsü abener aser tekolak nung lisü nair, Israel chuba dangi oa mepishidi ta ne dang mepishir; ashiko pai ne taküm kümzüktsü.”

³²Anungji parnoki anemsü abener aser tekolak nung lisü nair Israel chuba dangi arua ashi, “Ne tenzüker Ben-hadadi ashir, Ni taküm lidakjang ta mepishir.” Aser pai ashi, “Pa kü adianu, tanga pa taküm lir ma” ta pai asüngdang.

³³Tang nisungtemi kümdanga reprang aser pai mulungba asü masü aji aritepa asüngdang, aser parnoki “Ne adianu Ben-hadad” ta ashi. Idangji pai, “Nenoki oa pa anir arung,” ta ashi. Yamaji Ben-hadad pa dangi anir aru, aser pai pa kor talungtsü nung arudaktsü.

³⁴Aser Ben-hadadi pa dang ashi, “Yimtitem koba kübui nebu nungi agi, aji ni meyipa agütsütsü, aser kübui Samaria nung inyakba ama, nai Damaska nung na asoshi shishilembadak yanglutsü.” Ni ne den iba tezüngzüktepba yanglua na yoktsü ta Ahabi ashi. Anungji pai pa den tezüngzüngtepba ka yanglur pa odaktsü.

³⁵Ainkartem chir rongnung kati KIBUBAi melaba ama pa medemer dang ashi, “Kü dak zükang ta ni ne dang mepishir;” saka nisungbajagi pa dak azüktsü memulung.

³⁶ Idangji pai pa dang ashi, “KIBUBA ola dang nai tashi manga nungji, ajiang, na ni nungi pilali molusongzü kati ngusettsü.” Aser pai pa nungi pilali dang molusongzü kati pa tepset.

³⁷Idangji pai tangar ka ngua pa dang ashi, “Kü dak zükang ta ni ne dang mepishir.” Aser nisungbajagi pa dak züka pa yirutsü.

³⁸Anungji ainkarji pila aser tangar nem majitetdaktsüi lenmang nung chuba ata-a liasü.

³⁹Chubaji süia arudang, pai chuba dang ayimtena ashi, “Ne tenzüker rara tiyongi ogo, aser ajiang, nisung kati kü dangi meyipa nisung ka bener arua ashi, ‘Iba nisungi yuang, kodakirnaka sür pa taküm samara, pa taküm asoshi ne taküm agitsü, mesüra taribi touzük mori ka nai agütsütsüla.’

⁴⁰Aser ne tenzüker kangara mazüngi ali nungji pa oa adok; aser Israel chubai pa dang ashi, Nai mulungtetba amaji ne o bendangba alitsü.”

⁴¹Pai ilunga or pa tekolak nungi süji agien aser Israel chubai paji ainkar rongnungi ta ajitet.

⁴²Aser pai pa dang ashi, “Nai koba taküm tepsettsü asoshi ne ket nung agütsü paji jena yok nungji, pa taküm melena na, aser par temeranger melen ne temeranger taküm agitsü ta KIBUBAi ashir.”

⁴³Aser Israel chuba pei kidangi jashiseta meyipa ao aser Samariai aru.