Read njo 1 CHUBATEM 21 Bible Online

1 CHUBATEM 21 - njo bible

1 CHUBATEM 21

¹Tang Samaria chuba Ahab chuba ki anasa Yezreel nung Yezreel nunger Nabot ket nung tsükmenatzü lu ka liasü.

²Aser Ahabi Nabot dang asüngdang, “Atsüki ka yanglua tsünüsembongtsü adokdaktsütsü asoshi ne tsükmenatzü luji kü nem kua, kechiaser ibai kü ki anasa aser iba dangi tajungba tsükmenatzü lu ka mesüra ni ne nem sen agütsüdi.”

³Naboti Ahab dang ashi, “Kübu senmang ne nem agütsütsüji KIBUBAi nungtemer.”

⁴Ahab pei kidangi temulung kanga mepelai meyipa aru, kechiaser Yezreel nunger Naboti kü lu senmangtem ni ne nem magütsütsü ta pa dang ashi; aser pai pei yipten nung metaloker pei tejak nembanger kecha machi.

⁵Saka pei kinungtsü Yezebel arua pa dang ashi, “Kechi agi ne tanela jashidaktsür, aser kechiba nai mechiyunger?”

⁶Pai la dang ashi, “Yezreel nunger Nabot dang ne tsükmenatzü lu sen agi alidi ta ni asüngdang, mesüra nai mulungra tanga tsükmenatzü lu ka agütsüdi ta ni ashi, saka pai ni ne nem kü tsükmenatzü lu magütsütsü” ta ashi.

⁷Pa kinungtsü Yezebeli pa dang ashi, “Nai Israel yimli madak tang yimsü masür ama? Aramesoang, arung, chia-jema aser na pela-a liang. Yezreel nunger tsükmenatzü luji ni ne nem agütsütsü.”

⁸Anungji lai Ahab tenüng nung Nabot aliba yimti nung alir tamburtem aser tamarenertem dangi shiti zülur kanga junga pa nüng zülu aser kanga junga nembanger yok.

⁹Lai shiti nungji yamai zülu, “Nübur ajak telumiba anogo ka sangdongang aser Nabot tenem ka nung jokteta mendakjang.

¹⁰Pa anasaji samesa nisung ana mendakjang aser pai Tsüngrem aser chuba anema atakatemogo ta tena nem kuli südakjang. Iba sülenji pa lung agi onseta südakjang.”

¹¹Yimti nung alir teloki, tamburtemi aser temerangertemi Yezebeli shiti nung zülua parnok dang ashiba ama parnoki inyak.

¹²Aser parnoki nübur ajak ayongten aser nisung ajak madang Nabot tenem nung mendaktsü.

¹³Aser samesa nisung ana pa anasa amen, aser Nabot anema nisungtemi angashia noktaka kuli ashi, “Naboti Tsüngrem aser chuba atakatemer.” Idangji parnoki pa yimti nungi atsür adoka pa dak lung agi ona pa onseta südaktsü.

¹⁴Idangji parnoki Yezebel dangi osang yoka ashi, “Nabot lung agi onseta südaktsüogo.”

¹⁵Kodang Yezebeli Nabot lung agi onseta südakogo ta angashia, Yezebeli Ahab dang ashi, “Aramesoang aser Yezreel nunger Nabot tsükmenatzü lu koba pai sen yong magütsüli ta ashi aji agiang; kechiaser Nabot taküm mali, pa süogo.”

¹⁶Kodang Ahabi Nabot süogo ta angashi, Yezreel nunger Nabot tsükmenatzü lui pai oa aser aji pai agi.

¹⁷KIBUBA o Tishbi nunger Elija dangi arua ashi,

¹⁸“Samaria nung aliba Israel nunger chuba Ahab den ajuruteptsü na aramesoa oang; ajiang Nabot tsükmenatzü lu agitsü asoshi pa oa lir.”

¹⁹KIBUBAi yamai ashir ta nai pa dang shiang, “Pai tepseter tangar meyong agi nungji Nabot zü koba azüi menak iba azü jagi ne züa menaktsü ta KIBUBAi ashir.”

²⁰Ahabi Elija dang ashi, “Oh kü tsükchir, nai ni angur na?” Pai langzü, “Ni na angur kechiaser KIBUBA tsüngdang kechi tamajung lir aji benshia nai ne sasa na ayok.

²¹Ajiang, ne madang ni tamajung bener arutsü aser ni na nungi meshimeshia oktokadoktsü, aser Ahab nungi tebur chanu ajak leptokadoktsü, alar saka nüji saka Israel nung anünga aliba ajak samatsütsü.

²²Aser Nebat chir Yeroboam kibong aser Ahija chir Baasha kibong ama ne kibong kümdaktsütsü, kechiaser nai ni jashidaktsü aser Israel nunger nem temenen mendaktsü.”

²³ Aser Yezebel asoshia KIBUBAi yamai jembia ashi, “Yezreel jara kübok azütemi Yezebel achitsü.”

²⁴‘Shiba Ahab yimti nung südir azütemi achitsü aser shiba alu nung südir anüng ozütemi achitsü.’

²⁵KIBUBA tsüngdang kechi tamajung lir aji pa kinungtsü Yezebeli ajungmeso nung yamaji inyaktsü pei sasa yoka achiba Ahab ama tangar shinga mali.

²⁶Aser pai Amor nungeri inyakba ama süngyanglu külema tesempatsü inyak, kechiaser shirnok KIBUBAi Israel nunger nungi parnok aridok.”

²⁷Kodang Ahabi ya angashi, pai pei süoshi shisa, aser pei temang nung anemsü abener lumia kanga dang timtem tulu agi.

²⁸Idangji Tishbe nunger Elija dangi KIBUBA O arua ashi, “Ahabi kechi koda pei sasa ajemalur aji nai nguali ma?

²⁹Ni pa mapang nung tamajung kecha magütsütsü, saka pa chir mapang nung par kibong nem ni timtem agütsütsü.”