Read njo 1 CHUBATEM 22 Bible Online

1 CHUBATEM 22 - njo bible

1 CHUBATEM 22

¹Siria o Israel na tsüngda nung rara makai küm asem süi.

²Saka küm asembuba nung Israel chuba dangi Yihuda chuba Yehoshafat alu.

³Israel chubai pa tenzükertem dang ashi, “Ramoth-Gileadji asenok meyong ta nenoki memetet no? Saka Siria chuba nungi aji agitsü asoshi asenoki kecha meinyak.”

⁴Aser pai Yihoshafat dang asüngdang, “Ramoth-Gilead anema raratsü nai kü den aotsü asü?” Yihoshafati Israel chuba dang langzü, “Nia na amaji dang, ne nüburji kü nübur aser ne kortemji kü kortem lir.”

⁵Yehoshafati Israel chuba dang ashi, “tamasa KIBUBA O nai asüngdangang ta ni ne dang mepishir.”

⁶Idangji Israel chubai ainkar noklang pezü shi külemi sentepdaktsü, aser parnok dang ashi, “Ramoth-Gilead anema ni raratsü asü mesüra aremzüktsü?” Parnoki ashi, “Oang, kechiaser KIBUBAi chuba teka nung aji bendanga agütsütsü.”

⁷Saka Yehoshafati ashi, “Asenoki asüngdangtsü asoshi idaki KIBUBA ainkar ka mali ama?”

⁸Aser Israel chubai Yehoshafat dang ashi, “KIBUBA dang asüngdangtsü Imlah chir Mikaia ano lir, saka ni pa sempar, kechiaser pai ni asoshi tamajung dak alema tajung meshin;’ aser Yehoshafati ashi, “Chubai yamai teshi.”

⁹Idangji Israel chubai ketdangpur ka jar ashi, “Yakta Imlah chir Mikaia anir arung.”

¹⁰Tang Israel chuba aser Yihuda chuba Yehoshafat chuba sobutsü sobur Samaria süngkhümi ailen moa nung pei pei chuba menden nung amen, aser ainkar ajaki parnok tsüngdang shina jembi.

¹¹Khenaana chir Zedekiai merang agi jangzü yanglur ashi, “Siria nunger mesama tashi ya agi ni parnok den raratsü, ta KIBUBAi ashir.”

¹²Ainkar ajaki yamaji jembia ashi, “Ramoth-Gileadi tuang aser takok ngua liang, kechiaser KIBUBAi aji chuba nem bendanga agütsütsü.”

¹³Osang abener Mikaia tajai oa pai pa dang ashi, “Tang ajiang, obang ka agi ainkartem oji chuba madang tajung lir, ne o-a parnok rongnung ka ama sang aser tajung jembiangma.”

¹⁴Aser Mikaiai ashi, “KIBUBA taküm ali tashi, KIBUBAi kü dang kechi ashir aji ni jembitsü.”

¹⁵Kodang pa chuba dangi aru, chubai pa dang ashi, ‘Mikaia, asenoki Ramoth-Gileadi raratsü aotsü asü, mesüra asenoki aremzüktsü?” Aser pai langzü, “Tuang aser takok nguang, chuba ket nung aji KIBUBAi bendanga agütsütsü.”

¹⁶Aser chubai pa dang ashi, “KIBUBA tenüng nung ochi dak alema kecha mejembitsüla ta ni ne dang kwiben ashitsü?”

¹⁷ Aser pai ashi, “Santem sannüker maliba ama, ni Israel nunger tenem nung prokshia angu, aser KIBUBAi ashi, Itemi tanüker mali, parnok nisung shia pei kidangi yimjung nung meyipa odakjang.”

¹⁸Israel chubai Yihoshafat dang ashi, “Ni ne dang pai ni asoshi tamajung dang ashi tajung meshintsü ta meshika ma?”

¹⁹ Aser Mikaiai langzü, “Anungji nai KIBUBA O angang: ni KIBUBAji pa menden nung mena angu, aser kotak nung telok tulu pa anasa tajichilen aser tabelen mena ni angu.

²⁰KIBUBAi ashi, “Ahabi Ramoth Gileadi tur pa tamakok aludaktsütsü asoshi shibai pa külakoktsütsü?” Aser kati balaka aser kati balaka ta tapu tapu ashi.

²¹Idangji tanela ka arua KIBUBA tsüngdang noktaka ashi, ‘Ni pa külakoktsütsü.”

²²Aser KIBUBAi pa dang ashi, “Kechi agi?” Aser pai ashi, “Ni aotsü aser ainkar ajak bang agi tiyazü jembidaktsütsü.” Aser pai ashi, “Nai pa külakoktsütsü aser yamaji akoktsü, oang aser yamaji inyakang.

²³Anungji tang ajiang, KIBUBAi item ne ainkar tebang nung tiyazü jembitsü agütsüogo, aser KIBUBAi na asoshi tamajung jembiogo.”

²⁴Idangji Khanaana chir Zedekia anasa arua Mikaia tenibung nung maokja ashi, “Ne den jembitsü KIBUBA tanela ni nungi ne dangi koma ao?”

²⁵Mikaiai ashi, “Ajiang, kodang na ne sasa atsüktsü asoshi taktang telungbai idir iba anogo nung nai angutsü.”

²⁶Aser Israel chubai langzü, “Yimti nung aliba governor Amon dangi Mikaia anir oang aser chuba chir Yoash dangi anir oa shiang:

²⁷Chubai yamai ashir, “Iba nisung tepuokdak nung yuang, aser ni yimjung nung maru tashi amtsük terara aser tzü agi pa mesüang.”

²⁸Mikaiai ashi, “Nai yimjung nung dang meyipa arura, KIBUBA ibo kü dang kecha mashi.” Aser pai ashi, “Oh nisungtem, nenok ajaki angang.”

²⁹Anungji Israel chuba aser Yihuda chuba Yehoshafat, Ramoth-Gileadi atu.

³⁰Israel chubai Yehoshafat dang ashi, “Ni kü sasa chuba-a ta memetetdaktsütsü asoshi kü süoshi melentsü aser raradaki aotsü, saka nabo ne süoshi agiang.” Israel chubai pei sasa majitetdaktsütsüsa sobutsü sobur tongbangi ao.

³¹Tang Siria chubai pa talungtsü temeranger walunir semerana dang ozüng agüja ashi, “Israel chuba dak alema tulu mesüra tila ka dena terara.”

³²Kodang temeranger temerangertemi Yehoshafat angu, parnoki ashi, “Atangji ibai Israel chuba” aser parnoki pa anema raratsü apuso. Aser Yehoshafati ayimten.

³³Kodang temeranger temerangertemi ibai Israel chuba masü ta meteta aru, parnoki pa aria moi meyipa aru.

³⁴Nisung kati züzüaka lijak bena arur yok, aser Israel chuba dak teku semoktsü teküboklen kashi, anungji pai kor talungtsü anisang dang ashi,” Ne teka meyipang aser telok rongnungi ni pila-a anir oang, kechiaser ni kanga mejungi yiruogo.”

³⁵Iba anogo nungji tongbang sashia aküm, aser pei kor talungtsü den Siria nunger anema ata-a liasü, aser talungtsü teküboklen ajak pa dak nungi adokba azü agi asüng aser chuba nikongtsütsü asü.

³⁶Anü talui temeranger telok alidak ajakleni osang yoka, “Chuba süogo, anungji nisung shia pei yimtaki aser pei yimti-i oang” ta osang agütsü.

³⁷Parnoki Samariai arua chuba tasü mang Samaria nungji arem.

³⁸Aser parnoki kor talungtsüji Samaria nung aliba tzütu nung shitok, aser iba tzütuji nüktapangtatsürtem temang shitokdak liasü; KIBUBAi ashiba ama azütemi pa zü menak.

³⁹Tang Ahab tanüngba mapa aser pai inyakba aser senti ki koba pai yanglu, aser yimti kobasa pai yanglu, Israel chubatem putipuyang kaket nung itemji zülua melika ma?

⁴⁰Anungji Ahab chuba pei tebutem den mejang aser pei chir Ahaziai pa melena chuba.

⁴¹Israel chuba Ahabi küm pezübuba chubaba mapa nung Asa chir Yehoshafati Yihuda madak chuba.

⁴²Yehoshafati kodang chubatsü tenzük pa küm semer pungu tain liasü, pai Yirusalem nung küm metsür pungu chuba. Pa tetsü tenüng Shilhi jala Azuba liasü.

⁴³Pai pei tebu Asa lenmang nung jaja, aser KIBUBA tsüngdang kechi tim lir aji inyaka pai iba nungi meyipa mao. Aji saka tokong tenem tekülemdak magieni liasü aser nisungtemi ano item tenem tekülemdak nungji tenla-a liangmesen ronga liasü.

⁴⁴Aser Yehoshafati Israel chuba den yimjung yanglu.

⁴⁵Tang Yehoshafat tanüngba mapa aser pai sayuba tashi, aser pai koda rara itemji Yihuda chubatem putipuyang kaket nung zülua melika ma?

⁴⁶Aser tebur jabujaritepertem tanüngba koba tebu Asa anogo nung liasü, itemji pai alinük nungi samadaktsü.

⁴⁷Edom nung chuba mali asü, teshimtet ka dang chuba liasü.

⁴⁸Ofiri hon abeni aotsü asoshi Yehoshafati Tarshis rong yanglu. Saka rongtem Eziongeber nung raksadok nung motet.

⁴⁹Idangji Ahab chir Ahaziai Yehoshafat dang ashi, “Kü tenzükertem ne tenzükertem den rong nung odakjang.”

⁵⁰Saka Yihoshafati memulung. Aser Yehoshafat tebutem den mejang, aser pei tebu Dawid yimti nung arem, aser pei chir Yeborami pa melena chuba.

⁵¹Yihuda chuba Yehoshafati küm tertenetbuba chubaba mapang nung Samaria nung Israel madak Ahab chir Ahaziai chubatsü tenzük aser pai Israel madak küm ana yimsü asü.

⁵²Aser KIBUBA jakdang kechi tamajung pai aji inyak, aser pei tebu aser tetsü Nebat chir Yeroboam lenmang nung jaja, aser pai Israel nungera tai benshidaktsü.

⁵³Pai Baal tenzük aser külem, aser tebui inyakba ajak agi Israel Tsüngrem KIBUBA ain adokdaktsü.