Read njo 1 CHUBATEM 3 Bible Online

1 CHUBATEM 3 - njo bible

1 CHUBATEM 3

¹Solomoni Ijip chuba Farao den temba ayim, aser pa jala agi, aser chuba ki, KIBUBA ki aser Yirusalem jara meketa Dawid yimtiji merenem tashi pai la anir arua ali.

²Iba mapang tashi nungji KIBUBA tenüng nung ki yanglua maliasü, anungji nüburtemi tenem aser tesem balala nung tetepsetba tenla agütsüya liasü.

³Solomoni KIBUBA meim aser pa tebu Dawidi lateta yutsüba ozüng nung jaja, aji saka paia tesem balala nung tarongba tenlatem tepseta tenla.

⁴Chubai külemtsü asoshi Gibeoni ao, kechiyong ibaji tenem talang liasü, aser iba tenla dakji Solomoni tarongba tenla meyirijang ben tashi tenlar liasü.

⁵Gibeon nung aonung pungmang ka nung Solomon dangi KIBUBA adoka ashi, “Ni ne nem kechi agütsütsü aji meshiang.”

⁶Solomoni ashi, “Dawidi ne jakdang ochiba aser temeshiba nung, aser ne den temulungsentsü temerük agi jajaba yari, nai ne tenzüker Dawid, kübu dang temeim tulu sayu, aser tanü anogo ama, nai pa nem jabaso ka pa chuba menden nung amentsü agütsü.

⁷Tang Oh KIBUBA kü Tsüngrem, kübu Dawid melena nai ne tenzüker chuba kümdaktsü; ni tanur ka dang asünung, koda oli aruli ta senzütsü ni memetet.

⁸Aser nai shimtetba kin tulu koba nisung jenti asüba yong züngdangtsü makok, parnok rongnung ne tenzüker lir.

⁹Anungji ne nübur telok tulu o bendangdang tajung-tamajung metettsü asoshi tangatetba mulungsentsü ne tenzüker nem kua, kechiyong ne nübur telok tulu ya shibai o bendangtsü akoktsü?”

¹⁰Solomoni iba asüngdangba nung KIBUBA temulung achi.

¹¹Tsüngremi pa dang ashi, “Kechiaser nai ya-ang asüngdang aser nai ne arishi talang asoshi mesüra na takar asütsü asoshi mesüra ne tsükchir taküm asoshi masüngdang, saka nai ochi obendangba angatettsüang asüngdang;

¹²ajiang, ne o ama ni inyakogo, oda ne jakdang na mesüka tangar shinga malitsü mesüra ne sülen na ama shinga madoktsü asoshi, ajiang, ni ne nem shisatsü aser tangatettsü mulungsentsü agütsüogo.

¹³Nai koba masüngdang ajia ne nem agütsüogo, oda chuba rongnung ne mapang nung na mesüka shinga malitsü asoshi ni rongsen aser tenüngsang ne nem agütsüogo.

¹⁴Aser nai nebu Dawidi jajaba ama kü telatet ozüng aser kü temelaba amshia jajara, idangji ni ne arishi talang kümdaktsütsü.”

¹⁵Aser Solomon sak, aser ajiang, ibai pungmang ka liasü, aser pai Yirusalemi arua KIBUBA temeshi süngden tsüngdang noktak aser tarongba tenla aser yimjung tenla agüja pa kilirtem asoshi benjong tulu ka yanglu.

¹⁶Idangji nüktapangtatsür ana arua chuba tsüngdang noktak.

¹⁷Tetsür kati ashi, “Oh kü Kibuba, iba tetsür aser ni ki ka nung külemi alir, aser lai ngua ni tanur ka aso.

¹⁸Aser ya adok, ni tanur ka sor anogo asem lir, iba tetsüria tanur ka aso, aser onok külemi liasü, aser iba kidang küna dak alema tangar shinga maliasü.

¹⁹Iba tetsüri asoba tanurji aonung lai nenset.

²⁰La ayatrem nung sak, aser ni mejanga lia lai ni nungi ozü chir tanur mangji bener oa pei teku manung yur, lar chir tasübaji kü teku manung yutsü.

²¹Kodang kü chir nem mama yongdaktsütsü ni sak, ajiang, tanurji tasü liasü, saka kodang ni anepdang iba indang bilem, ajiang, kü den aliba tanurji kü chir masü.”

²²Tangar tetsür jagi ashi, “Masü, taküm alibaji kü chir aser tasübaji ne chir.” Aser laia ashi, “Masü, tasübaji ne chir aser taküm alibaji kü chir;” yamaji chuba tsüngdang parnoki jembi.

²³Idangji chubai ashi, “Katia ashir, Taküm alibaji kü chir, aser tasübaji ne chir; ano katia ashir, Masü, saka tasübaji ne chir, aser taküm alibaji kü chir.”

²⁴Chubai ashi, “Kü nem nok ka kua.” Aser parnoki chuba tsüngdangi nok ka bener aru.

²⁵Aser chubai ashi, “Taküm aliba tanurji ana küma lepdanger, tesadang ka ka nem, aser tesadang ka la nem ta agüjang.”

²⁶Idangji tetsürla shiba taküm aliba tanur tetsü liasü, lai chuba dang ashi, kechiyong lai tanur asoshi pei shi agi shia bilema lai ayimten, “Oh kü kibuba, taküm aliba tanurji la nem agüjang, kodakang aji melepsetka.” Saka tangar tetsürjagi ashi, “Iba tanurji la indanga masütsü mesüra kü indanga masütsü, ibaji lepdangang.”

²⁷Idangji chubai langzüa ashi, “Taküm aliba tanurji la nem agüjang, tanurji tetepset ta ashilaji tanur tetsüji lir.”

²⁸Israel nunger ajaki chubai obendangbaji angashia parnoki süngmang, kechiaser obendangtsü, Tsüngrem shisatsü pa dak lir ta parnoki angu.