Read njo 1 CHUBATEM 4 Bible Online

1 CHUBATEM 4 - njo bible

1 CHUBATEM 4

¹Solomon chubai Israel ajak madak yimsü asü,

²aser itemi pa tongtipurtemji liasü: Zadok chir Azaria putir;

³Shisha chirtem, Elihoref aser Ahija tezülurtem; Ahilud chir Yehoshafat tezüluba bendanga ayusang;

⁴Yehoiada chir Benaia temerangertem arkotong; Zadok aser Abiathar putirtem liasü;

⁵Nathan chir Azaria linük yimsüsürtem madak ketdangbuba; Nathan chir Zabud putir: aser chuba tembar;

⁶Ahishar chuba ki madak tanishir, Abda chir Adoniram: mapa inyakertem rongnung tanishir.

⁷Solomoni ano Israel ajak nung chiyungtsü madak, aser chuba kidang ketdangsür terana ayu. Parnok nisung shiai ita ka ka atema chiyungtsü anebaludaktsü.

⁸Parnok tenüng yamai liasü: Efraim tenem linük nung Ben-hur;

⁹Makaz, Shaalbim, Beth-shemes, Elon aser Beth-Hanan, Ben-Deku;

¹⁰Arubboth nung Ben-hesed jabaso, pa linükji Sokoth nungi Hefer arrtsü tashi.

¹¹Dor linük ajonga nung Ben-abinadod jabaso, Solomoner jala Tafat pa kinungtsü liasü,

¹²Taanak aser Megiddo, Zarethan anasa aliba Beth-shean ajak Yezreel kübok Beth-shean nungi Abel-mehola aser Yokmeam tashi nung Ahilud chir Baana liasü;

¹³Ramoth-Gilead nung Bengeber (pa den Yiar yimtem Manase chir Gilead nung aliba ano Argob linük koba Bashan nung lir, iba jara aser yongmenyin tasüdangtsüba yokba yimti tulu roker);

¹⁴Mahanaim linük nung Iddo chir Ahinabad;

¹⁵Naftali linük nung Ahimaz, pai Solomon jala Basemat agi;

¹⁶Asher aser Aloth nung Hushai chir Baaona;

¹⁷Issakar linük nung Parua chir Yihoshafat;

¹⁸Benjamin linük nung Ela chir Shimei;

¹⁹Gilead nung Amor chuba linük Sihon (aser Bashan chuba Og nung Uri chir Geber). Item madak paji dang yimsüsür liasü.

²⁰Yihuda aser Israel nüburtemji tzüyimkhüm lisem ama mezüngdangtettsüsa liasü, parnokji chia-jema aser pelatepa liasü.

²¹ Solomoni Filistia lima Eufrata ayong nungi Ijip arrtsü tashi yimli ajak madak yimsü asü. Parnoki pa nem sempettem agütsü aser Solomon taküm piyong pa tenzük.

²²Anogo ka asoshi Solomoner chiyungtsü renembaji: amzü tajung tatakzük semer jang tatakzük roker,

²³nashi tejebket ter, chiyima senzüba nashi metsü, san noklang ka, shitsü, mesü, shio aser an teshimtet, itemji liasü.

²⁴Solomoni Eufrata ayong anüolen nungi Tifsa aser Gaza yimti anüolen tashi yimsü asü, aser meketa aliba kin ajak den pa yimjung liasü.

²⁵Pa yimsüsüba mapang Yihuda aser Israel nungertem Dan nungi Beersheba tashi kümzüka liasü, aser nisung shia pei tsükmenatzü aser mungudong liasü.

²⁶ Solomon kor talungtsü meyi lir, aser kor temeranger meyi terana liasü.

²⁷Aser ketdangpurtemi Solomon chuba asoshi aser Solomon chubar langbangi aruba pur ajak asoshi chiyungtsü pei ataba ita nung agütsü, parnoki kecha agia anünga metoktsü.

²⁸Barley tsük aser kortem asoshi monü raraba kor tekara parnoki ketdangpurtem dangi nisung shia melaba ama bener aru.

²⁹Tsüngremi Solomon nem shisatsü, tangatetba aser temulung tulu, molu lisem ama agütsü.

³⁰Solomon shisatsü anüdoklen alir chirtem aser Ijip shisatsü ajak dang nungi taoba liasü.

³¹ Kechiaser pa nisung ajak dang nungi shisa takaba liasü, Ezrahit nungi Ethan, Heman, Kalkol, aser Darda, Mahol chirtem dang nungi alaka, aser kin ajak madak pa tenüngsang liasü.

³² Aser pai apijemtsü meyi asem jembi aser pa ken meyi ka ser pungu liasü.

³³Aser pai süngdong taküm indang Lebanon nung aliba cedar süngdong nungi oda jara nung meyiba esop indang tashi jembi: pai shiruru indang, ozü indang aser jua aoba shiruru aser angotem indang jembi.

³⁴Aser Solomon shisatsü angatsü asoshi nisung ajak aser alima chubatem shirnoki pa shisatsü indang angashi parnok ajak aru.