Read njo 1 CHUBATEM 5 Bible Online

1 CHUBATEM 5 - njo bible

1 CHUBATEM 5

¹Kodang Tair chuba Hirami Solomonji tebu Dawid melen chuba asütsü shimtetogo ta angashi, pai Solomon dangi pei otongdartem yok; kechiaser pa Dawid den tembar liasü.

²Solomoni iba osang Hiram dangi yok:

³“Pei tsükchirtem KIBUBAi pa tetsüng kübok mayu tashi rara aika pa meketa aliba yong kübu Dawidi pa Tsüngrem KIBUBA tenüng asoshi ki ka meyanglutet, aji nai metet.

⁴Saka kü Tsüngrem KIBUBAi kü nem ajaklen anisüngzük agütsü; idaki tsükchira mali mesüra tamajunga mataloker.

⁵ Ajiang, kü Tsüngrem KIBUBA tenüng asoshi ni ki ka yanglutsü nükjidong ayur, kechiyong kübu Dawid dang KIBUBAi ashir, Ne chir, shiba ne kidang ne chuba menden nung ni mendaktsütsü, kü tenüng asoshi pai kiji yanglutsü.

⁶Anungji tang Lebanon nungi cedar süng parnoki kü nem leptsütsü nai mela-ang, aser kü tenzükertem ne tenzükertem den alitsü, aser nai meshiba ama ne tenzükertem asoshi ni taa teperi agütsütsü, kechiyong Sidon nunger ama süng arangtsü onok rongnung tajung mali ta nai metet.”

⁷Hirami Solomon o angashia, pa kanga pela ashi, “Tanü KIBUBA tenüng sangang; pai iba kin tulu madak Dawid nem shisa taka jabaso ka agütsüogo.”

⁸Aser Hirami Solomon dangi yoka ashi, “Nai kü dangi yokba osang ni angashiogo; cedar aser fir süngpak indang nai ashiba ni ajak inyaktsü.”

⁹Kodang tenzükertemi itemji Lebanon nungi tzüyimi bener alutsü, aser ni itemji alenteper tzüyim nung aotsüsa nai ashiba tesem jagi yoktsü, aser nai itemji bener aotsü asoshi ni saladaktsütsü, aser kü kibong asoshi chiyungtsü agütsütsü ni aginüba ama nai renemjangma.

¹⁰Anungji Hirami Solomon nem pai aginüba ajak ama cedar aser fir süngpak agütsü.

¹¹Solomonia Hiram nemji wheat tsük tatakzük meyi metsü par kibong chiyungtsü asoshi aser totzü temeja tatakzük metsü agütsü: yamaji küm shia Solomoni Hiram nem agütsü.

¹²KIBUBAi Solomon nem pai pa dang nangzükba ama shisatsü agütsü, aser Hiram o Solomon na tsüngda nung yimjung liasü, aser parnoki külemi telungjem yanglu.

¹³Solomon chubai Israel ajak nungi mapa inyakertem aniten, aser parnok telokji nisung meyi semer liasü.

¹⁴Pai parnok ita ka ka asoshi Lebanoni meyi ter yok, aser parnok idakji ita ka liasü, aser ita ana kidang liasü; Adoniram parnok telok madak liasü.

¹⁵Solomon khu abener meyi neter ayu, aser tenem nung lung angenteter meyi tir liasü.

¹⁶Solomoner tongtibang ketdangpurtem mapa nung alir dak alaka, mapa inyaker madak ozüng agütsür meyi asem ser noklang asem liasü.

¹⁷Chubai ozüng agütsü, aser parnoki lung tulu aser sen jenti alangba tatsüngba lung agi ki noktakdaktsütsü asoshi lungji atsüng.

¹⁸Aser Solomon o Hiram na ki yanglurtem aser Gebal nunger ki yanglurtemi itemji inyak, aser süngpak aser lung parnoki ki yanglutsü asoshi renem.