Read njo 1 CHUBATEM 6 Bible Online

1 CHUBATEM 6 - njo bible

1 CHUBATEM 6

¹Israel chirtem Ijip lima nungi adoker küm noklang pezü tirbuba; Solomoni Israel ajak madak chubaba küm pezübuba, ita tanabuba Ziv ita nung, pai KIBUBA kiji yanglutsü tenzük.

²Aser KIBUBA ki koba Solomoni yanglu, metong nung süklep roker, lenten nung süklep metsü aser ali nungi ajungketba nung süklep semer liasü.

³Temeshi tenla ki jakdang ki tila ka or metenloka yanglubaji lenten aser metong nung süklep metsütsü, aser ki jakdang lenten nung süklep ter liasü.

⁴Ki asoshi pai kichiba telunglen ulua aser temalen ilaa yanglu.

⁵Ki jara dak tsükloka pai taktang meketa yanglu, aser ki jara dak tsükloka temeshi aser temeshitiba ki anaji meketa tezülen ki taktang yanglulok.

⁶Tekübokba taktangji lenten nung süklep pungu liasü, aser tiyongba taktangji lenten nung süklep trok liasü, aser asembuba taktangji süklep tenet liasü, ki jara meketa tezülen asoshi pai lung temerang agi sanen manungji ki jara metaloktsüsa yanglu.

⁷Ki yangludang lung atsüngdak renema akaba lung agi aser kiji asüdang yintem mesüra pu mesüra merang oset akoshiba kecha mangashi-i dang yanglu.

⁸Ki tajichilen tiyongba taktang asoshi kishi liasü, aser tiyongba taktang jagi parnoki apu agi atu: aser tiyongba nungi tasembubai atu.

⁹Yamaji pai kiji yanglu aser renem, aser kiji sanen aser cedar süngpak agi yanglu.

¹⁰Pai ki dakji tsükloka taktang süklep pungu-ngu talang yanglu aser kiji cedar süngpak agi tashi ita angentepa yanglu.

¹¹KIBUBA o Solomon dangi arua ashi,

¹²“Koba ki nai yanglua ali nai kü telatet ozüngtem nung jajara aser kü ozüngtem tashi angara aser ni melabatem yura, ni nebu Dawid dang ashiba kü o ni ayutsü.

¹³Ni Israel chir rongnung alitsü, aser kü nübur Israel mesendoktsü.”

¹⁴Anungji Solomoni kiji yanglu aser aji renem.

¹⁵Pai telunglen jaraji cedar süng agi yanglu, atem nungi tsüngbang tashi pai süng agi renem aser pai atemji mitsüktsü süng agi nembang.

¹⁶ Atem nungi jara tashi pai süklep metsü ki tezülenji cedar süng agi sülok, pai aji telunglen Temeshitiba taktang asoshi yanglu.

¹⁷Kiji temeshitiba tenla ki jakdang, süklep lir talang liasü.

¹⁸Ki telunglenji naro aser noksa enoker cedar süng agi yanglu, ajakji cedar süng dak alaka lung kata mamshi.

¹⁹KIBUBA den nangzüktepba temeshi süngden ayutsü asoshi, pai ki telunglen tiyong nung taktang ka yanglu.

²⁰Telungba taktangji metong nung süklep metsü, lenten nunga süklep metsü aser ali nungi ajongketba nungjia süklep metsü liasü, aser idakji pai hon temeja enoka yanglu, aser pai tenladakji cedar süng agi yanglu.

²¹Solomoni ki telunglenji hon temeja agi yanglu, aser temeshitiba taktang temalenji ajanga hon agi lisü ama yanglur mesanga ayu; aser idakjia pai honsa enok.

²² Pai ki ajakji hon enoka yanglu aser temeshitiba taktang nung aliba tenladak ajongaji hon agi yanglu.

²³ Temeshitiba taktang nungji pai oliv süng agi cherubim noksa ana yanglu, talang nung süklep ter-er liasü.

²⁴Cherub ka tashikangji süklep pungu liasü, tashikang ka tatembang nungi tashikang ka tatembang tashi nungji süklep ter.

²⁵Tangaba cherubji süklep ter liasü, cherub anapronglaji tasazük aser tereprangtsüjia kasadang liasü.

²⁶Cherub ka ali nungi talang nung süklep ter liasü, aser kajia yamaji liasü.

²⁷Aser pai cherub noksaji ki telunglen enok, aser cherub tashikangtemji salar tashikang ka agi jara dak kongshia aser tashikang ka agi jara ka dak kongshia enok, aser ki tiyong nung parnok tashikangji kongshitepa liasü.

²⁸Aser pai cherub noksaji hon agi mezübang.

²⁹Pai ki nungji jara ajakji meketa cherub aser asangdong aser naro noksa agi telunglen aser temalen ajak nung yanglu.

³⁰Aser ki atemji telunglen aser temalen hon agi yanglu.

³¹Temeshitiba taktangi aitsü asoshi pai oliv süng agi kishi tapu ana yanglua tongnü, aser kishi tongnütemji jara shilem pungu nung ka yanglu.

³²Anungji pai oliv süng agi kishi ana yanglu; aser pai iba manungji cherubim noksa, asangdong aser naro noksa hon enoka yanglu; aser pai cherubim aser asangdong noksa nungji hon enoka yanglu.

³³Yamaji pai tenla ki telungi aitsü asoshia oliv süng agi kishi yanglu, jara shilem pezü nung ka,

³⁴aser mitsüktsü süng agi kishi ana; kishi ka anasü koleptsüsa aser kishi kaji anasü koleptsüsa yanglu.

³⁵Aser iba manungji pai cherubim, asangdong, aser naro noksa enoka yanglu, aser pai item mapa manungji hon enoka yanglu.

³⁶Tatsüngba lung taren asem enoka aser cedar agi sanen taren ka enoka telunglen taktangji yanglu.

³⁷KIBUBA ki kimungji küm pezübuba Ziv ita nung renem.

³⁸Aser küm terkabuba nung, Bal ita koba ita ti buba lir, iba ita nung ki shilem ajak aser noksa taginüba ajak renem. Aji yangludang pai küm tenet agi.