Read njo 1 CHUBATEM 7 Bible Online

1 CHUBATEM 7 - njo bible

1 CHUBATEM 7

¹Solomoni pei asoshi chuba ki yanglu, aser pai ibaji küm terasem nung renem.

²Pai chuba kiji Lebanon süng agi yanglu, metong nung süklep noklang ka, lenten nung süklep tenem aser ali nungi ajungketba nung süklep semer, aji cedar tongshi taren pezü manung yanglu.

³Aser sanen lir-pungu manungji cedar süng agi nembanga yanglu, itemji nüktang taren ka nung terpungu manung liasü.

⁴Taren asem nung sanen liasü, aser kichiba indangtepa tatongtep asem liasü.

⁵Kishi aser kichiba ajakji tasazük kasa, itemji taren asem-sem kati ka den jitepa liasü.

⁶Pai tongnü taktang yanglu; metong nung süklep tenem, aser lenten süklep semer; item jakdang kilempok tongnütem aser sanentem liasü.

⁷Pai ki yanglulokba nungji obendangba menden yanglu, oda kilempokji obendangdak, aser itemji cedar süng agi nembanga yanglu.

⁸ Aser pa alitsü ki, kilempok külen aliba taktangjia ibaji mesüka yanglu. Pai ano iba kilempok mesüka Farao jala shiba pai agi la jala asoshi ki ka yanglu.

⁹Item ajakji sen aika alangba lung liasü, tatsüngba lunga dena, tasazükba ama süngrangtsü agi arangba süng temalen aser telunglen liasü, kimung apusoba nungi tatem tashi temalen nungi telungba taktang ajak liasü.

¹⁰Kimung nungji sen aika alangba lung liasü, lung tulua dena, lungji süklep ter aser süklep ti liasü.

¹¹Aser temalen sen aika alangba lung liasü, tasazükba ama tangentetba lung aser cedar süng liasü.

¹²Telungba taktangji meketa tangentetba lung taren asem, aser cedar süng agi sanen taren ka. KIBUBA ki telungba taktang aser ki yanglulokba mesüka liasü.

¹³Solomon chubai Tairi yoka Hiram anir aru,

¹⁴Pa tebuji Tair yimti nung yongmenyin atsünger tajung ka liasü, pa tetsüji Naftali kidong nungi amitsür ka liasü. Paji yongmenyin mapa inyaktsü asoshi tesangra aser tangatetba nisung ka liasü. Pai Solomon chuba dangi arua par mapa ajakji inyak.

¹⁵Hirami yongmenyin agi tongshi ana menoka süklep terti aser süngtsüng nung süklep terana ta yanglu.

¹⁶Aser pai tongshitem kolak nungji ayutsü temuluba yongmenyin agi tongnübang noksa ana yanglu: tongnübang noksaji ka süklep pungu aser kajia süklep pungu ta yanglu.

¹⁷Tongnütem manung aliba tongnübang noksa asoshiji lisü aser yinzü agi yangluba dena liasü; tongnübang noksa ka asoshi tenet, aser tongnübang noksa ka asoshijia tenet liasü.

¹⁸Anungji pai jarem noksa yanglua tongshibangtem temalen tongshibang noksa nembangtsü asoshi mechitepa yangluba meketaji taren ana liasü aser yamaji pai tanga tongshibang noksa asoshia yanglu.

¹⁹Kilempok nung aliba tongshitem temalen aliba tongshibang noksatemji labu naro yangluba, süklep pezü liasü.

²⁰Aser temechitepba tezülen tepok anasaji tongshi ana manungji ano tongshibang noksa liasü, aser tanga tongshibang kaji meketa temalen tareni jarem naro noklang ana liasü.

²¹Tenla ki kilempok nungji pai tongshi azüng, aser pai tajichi tongshiji azüng, aser iba tenüngji Yakin aja, pai tabelen tongshiji azüng aser iba tenüngji Boaz aja.

²²Aser tongshi manungji labu naro ama tobur junga yanglua liasü, yamaji tongshi mapaji renem.

²³Pai tatem külen nungi tatem külen tashi meketa temolutetba yongmenyin tzüyim ka, süklep ter yanglu, aser tajungketba nung ibaji süklep pungu liasü, aser aji meketa süklep semer taren ka nung yanglu.

²⁴Iba kübok süklep semer tashi tzüyim meketa liasü; aji merang agi yangluba meso taren ana küma liasü.

²⁵Aji nashi pungchi terana manung noktak, aser nashi pungchi asem anüdoklentip shia, asem anüolen shia, asem anüolentip shia aser asem anüdoklen shia yanglu; aser item manungji tzüyimji yanglu, aser item ajak techimilenbo telunglen liasü.

²⁶Aser ibaji süngtsüng nung teka ka lema liasü; aser ayongbangji labu naro noksa enoka ali agi yangluba marok amai yanglu, aser idakji mori tatakzük meyi ana liasü.

²⁷Pai yongmenyin agi nüktang ter yanglu, nüktang shia metong nung süklep pezü, lenten nung süklep pezü, aser ali nungi ajongketba nung süklep asem liasü.

²⁸Aser nüktangji yamai liasü, nüktang tatembangji lung o lung na tsüngda nung jungjunga tiptema yanglua liasü.

²⁹Aser nüktang tatembang nungji molusongzü, nashi pungchi aser cherubim noksa yanglua liasü, aser molusongzü aser nashi pungchi noksa nungji tanga sangra-a yangluba mapa tajung enoksema liasü.

³⁰Nüktang shia yongmenyin talungtsü pezü aser yongmenyin talungtsü lungtepdak liasü; aser kinük pezüsülen susa ka ayudak tetsüng liasü. Item tetsüngji narozük agi yangluka liasü.

³¹Aser tongnübang tebanglen aser temalen süklep ka liasü; aser iba tebanglen tongshi tamentakdak ama longlonga süklep ka ser tesadang; ano iba tebanglenji nok agi jiteta yangluba noksa liasü; aser item meketbaji telonglong masü, kinük pezüsü adoka liasü.

³²Temeketba kübok talungtsü pezü liasü; talungtsü lungtepdakji tamentakdak liasü; aser talungtsü temalen atuba süklep ka ser tesadang.

³³Talungtsüji kor talungtsü ama liasü; item talungtsü lungtepdak, tezülen, temalen aser metentepdak ajak temuluba yin liasü.

³⁴Tamentakdak shia kinük pezüsülen nüktang pezü liasü; nüktangji tamentakdak den ka küma liasü.

³⁵Tamentakdak temalen süklep tesadang ka longlonga meketzüka liasü, aser tamentakdak tema nung item metentepba aser temeketbaji iba den ka küma liasü.

³⁶Aser iba metentepba aser temeketba tiplen pai cherubim, molusongzü, aser asangdong tawa agi melaba tashi narozük yangluka renem.

³⁷Iba amaji pai tamentakdak ter yanglu; ajakji ka ama kasasa yin agi mulu, tasazük aser tereprangtsüji kasa liasü.

³⁸ Pai yongmenyin susa ter yanglu; susaji shia bath lir[2] aiba, susa süklep pezüzü, aser tamentakdak ter shia susaji kaka liasü.

³⁹Tamentakdaktemji ki tajichilen pungu aser ki tabelen pungu pai toktsü; aser tzüyimji pai ki anüdoklen kinüklen toktsü.

⁴⁰Pai po tateptsü aser susatemjia yanglu. Anungji Hirami KIBUBA ki nung Solomon chuba asoshi mapa ajakji renem:

⁴¹Tongshi ana; Tongshibang nung susa mesüka yangluba tongshi ana; Tongshibang noksa yokba nembangtsü temechiba ana;

⁴²Taren ana asoshiji jaremjang noklang pezü; taren shia jaremjang noklang ka ka tongshibang noksa aser susaji nembangtsü asoshi;

⁴³Nüktang ter den susa ter;

⁴⁴Tzüyim aser iba kübok nashi pungchi terana;

⁴⁵Po, tateptsü aser susatem. KIBUBA ki asoshi Hirami Solomon chuba nem yanglutsüba item oset ajakji yongmenyin agi yanglua liasü.

⁴⁶Yordan lenten nung chubai itemji, Sukot aser Zarethan tsüngda nung ajongli nung mulua yanglu.

⁴⁷Yongmenyin osetji onsara asü nung itemji odangtsü asoshi mebushiteti liasü.

⁴⁸ Anungji Solomoni KIBUBA kidang aliba oset ajak yanglu: hon tenladak, tenla kidang ayuba amtsük asoshi hon langbang,

⁴⁹hon temeja agi milendongtem, tenlaki telungba madang, tajichilen pungu, aser tabelen pungu; naro milen, aser mi mijepru, itemji hon temeja agi;

⁵⁰marok, misü endokba, susa, liangmesen asoshi sütem, aser meso item ajakji hon temeja agi; aser temeshitiba taktangi aiba telungba kishitem asoshi hon küpja, aser tenlaki kishitem asoshi, hon agi yanglu.

⁵¹ Yamaji KIBUBA ki asoshi mapa ajak Solomon chubai renem. Aser Solomon tebu Dawidi meshiteta ayuba osettem, taribi, hon, aser chipo-anpo bener aita KIBUBA kidang terizüngdak ayu.