Read njo 1 CHUBATEM 8 Bible Online

1 CHUBATEM 8 - njo bible

1 CHUBATEM 8

¹ Idangji KIBUBA den tezüngzüktepba Ozüng Süngden Dawid yimti Zion nungi bener arutsü asoshi Solomoni Israel nunger tambur aser kin tanishir ajak, aser Israel chir rongnung tongtipur ajak Yirusalem nung Solomon kidang sentepdaktsü.

² Aser Israel nunger ajak Ethanim ita nung, aji ita tenetbuba, Solomon chuba kidangi sentep.

³Putirtemi ozüng süngdenji aben aser Israel tambur ajak aru

⁴Aser parnoki KIBUBA süngden, sentep süki, süki nung akaba temeshi marok ajak putirtem aser Levi nungeri bener aru.

⁵Ashitsü aser züngdangtsü mokoki nashi pungchi aser santem tenla agüja Solomon chuba aser Israel nunger ajak iba anasa sentep.

⁶KIBUBA den tezüngzüktepba temeshi süngdenji putirtemi temeshi daki oda cherubim tashikang küboki bener aru.

⁷Kechiyong cherubim tashikang kübok temeshi süngden aser idakji aliba süng ajak akhümbanga liasü.

⁸Aser süngji talang, asünung temeshi taktang nungi temeshidakji ngua liasü, saka tezülen nungibo süngji mangu, aser tanü tashi itemji idakji lir.

⁹ Israel nunger Ijip lima nungi adokdang, KIBUBAi kechi tezüngzüktepba Israel chirtem den yanglu, idangji Mosai idakji Horeb nung lung agi yangluba lungpak ana temeshi süngden nung enoktsüba dak alema idakji tanga kecha mali asü.

¹⁰ Kodang putirtem temeshi kidang nungi adok, mepet agi KIBUBA kiji sübang.

¹¹Aser putirtemi tenzüktsü menoktaktet kechiyong KIBUBA sentsüwangshi agi KIBUBA kiji asüng.

¹² Idangji Solomoni ashi, “KIBUBAi pa mepet temelem nung alitsü ta shiogo.”

¹³Na teti alitsü asoshi ne nem tamaren ki ka sütsüogo.

¹⁴Israel nunger sentepa alir ajak noktaka lia, chubai parnok tsütsü tejak shir nüburtem ajak moatsü.

¹⁵Idangji pai ashi, “Israel Tsüngrem KIBUBA temoatsüba sang, pai pei tebang agi kübu Dawid dang nangzükba pai pei teka agi aji atalokdaktsü ta ashi.

¹⁶ Kü nübur Israel nunger Ijip lima nungi anitetba anogo nungi ni kü tenüng alitsü asoshi Israel kidong nungi ki yanglutsü asoshi yimti kata meshimtet, saka kü nübur Israel madak Kibur asütsü asoshi ni Dawid shimtet.

¹⁷ Tang kübu Dawid mulung nung Israel Tsüngrem KIBUBA tenüng asoshi ki ka yanglutsü bilema liasü.

¹⁸Saka KIBUBAi kübu Dawid dang ashi, Ne mulungjang nung kü tenüng asoshi ki ka yanglutsü bilembaji junger;

¹⁹ saka nai kiji meyanglutsü, aji saka ne dak nungi jakzükba ne chiri kü tenüng asoshi kiji yanglutsü.”

²⁰“KIBUBAi jembiba ama, pai pei o akanga ayu, kechiyong kübu Dawid nungi ni jakzük, aser KIBUBAi nangzükba ama Israel chuba menden nung ni amen, aser Israel Tsüngrem, KIBUBA tenüng asoshi kiji yanglu.

²¹Ni idakji Ozüng Süngden asoshi taktang ka yanglu, aser asen tebutem den parnok Ijip lima nungi aniteta anir arudang, tezüngzüktepba süngden idakji yua lir.”

²²Israel nunger telok sentepa aliba tsüngdang Solomoni KIBUBA tekülemdak tenla sabang jakdang noktaker pei teka anüngleni mekanga ashi,

²³“Oh KIBUBA, Israel Tsüngrem, anüng temalen mesüra ali telunglen na ama tangar Tsüngrem mali; pei mulungsentsü ajak agi ne tsüngdang jajartem dang, nai tezüngzüktepba aser yimlibilem sayur.

²⁴Nai ne tenzüker Dawid kübu dang nangzükba yua aru, tanü anogo ama, nai ne bang agi jembi, aser ne teka agi aji atalokdaktsü.

²⁵ Tang anungji, Oh KIBUBA, Israel Tsüngrem, kübu Dawid dang ne tenzükeri nangzüka ashi, ne chirtemi dang pei mapa nung temulungjang tanga arua aser nai jajaba ama parnoki kü tsüngdang jajara, Israel yimli nung kü jakdang amentsü ni shinga tamakok maludaktsütsü.

²⁶Tang anungji, Oh Israel Tsüngrem, nai kübu Dawid ne tenzüker tsüngdang jembibaji atalokdakjang ta ni sarasademer.

²⁷ “Saka atangji Tsüngrem alima nung alitsü asü? Ajiang, anüng aser anüngma nung aliba osettemi na masemer, ni yangluba ki yabo toktsür!

²⁸Saka ne tenzüker sarasadem, aser pai mepishiba nai angashi. Oh KIBUBA, kü Tsüngrem, ne tsüngdang iba anogo nung ne tenzükeri ayimtenba aser sarasademba nai angang.

²⁹ Ne tenük iba ki tsütsüleni aonung aser anogo shia rangloktsü, iba tsütsüleni meyiptsü ta nai ashiba ama,“Kü tenüng idakji alitsü,” ne tenzüker sarasademba tsütsüji meyipa sarasademtsü ta nai ashi.

³⁰Kodang iba ki tsütsüleni shia ne tenzüker aser ne nübur Israel nungeri sarasademdir, nai angang; hau ne talidak kotak nungi nai angang, aser kodang nai angashidir, idangji tai tokang.

³¹“Nisung kati pei kiyonger anema tai menara, aser pai azüangashidaktsütsü atakatem o toktsüra, aser pai arur ne temeshi tenla sabang nung ne kidang azüngashira,

³²idangji nai kotak nungi angang aser inyakang, ne tenzüker tamajungba pei mapaji pei kolak nung abentsüsa, temeshi pur metenja pei temeshiba yari agütsütsü o bendangang.

³³“Parnoki na anema tai menaba yong, kodang ne nübur Israel nunger tsükchir tsüngdang tamakok aludir, parnoki ne dangi arur, ne tenüng nangzükra, aser iba kidang ne tenüng nung sarasademra,

³⁴idangji nai kotak nungi angang, aser ne nübur Israel nunger dang tai tokang aser parnok tsürabur dang nai nangzükba limai tanaben parnok anir arung.

³⁵“Parnoki na anema tai menaba yong, kodang kotak kishi shia tzünglu marulir, parnoki iba tsütsüleni meyiper sarasademra, nai kangshi dang parnok temenen nungi meyipa ne tenüng nung parnoki nangzükra,

³⁶idangji kotak nungi nai angang, ne tenzükertem, aser ne nübur Israel dang tai tokang, kechiaser parnoki jajatsü asoshi nai lenmang tajung sayur, aser nai parnok asoshi senmang agütsüba ne li jagi parnok dangi tzünglu yokang.

³⁷“Linük nungji ayawara lira, tekangshi timtem lira, temokong agi azüngtsü tera lara jangkok aser longpen lara, tsükchiri parnok pei yimtitem nung meketbangra, kechi warashira aser shilushira lidir,

³⁸kechi sarasademsa aser shibaisa kodang asüngdangdir, mesüra ne nübur Israel ajaki pei mulungjang nung timtem meteta pei teka mekanger iba ki tsütsülen shir sarasademdir,

³⁹idangji na alidak kotak nungi nai angang, aser tai tokang aser nai nisung shia mulungjang metet nungji, pei mapa yari nai nisung shia nem atajang.

⁴⁰Anungji onok tetsü-teboutem nem nai agütsüba lima nung parnok alidang, parnoki mapang ajak nung ne dang tsübutsü.

⁴¹“Ano ne nübur Israel masü, bendanger shiba ne tenüng nung linük talang nungi arudir,

⁴²kechiyong parnoki ne tenüng tulu aser ne tashi tait teka aser ne teka songtoker ataba angashitsü pai iba ki tsütsüleni sarasadema arudang, ne talidak kotak nungi nai angang.

⁴³Alima kin ajaki ne tenüng metettsü asoshi ne nübur Israeli na tsübuba ama na tsübutsü asoshi, aser iba ki koba ni yanglu, ya ne tenüng agi ajar ta metettsü asoshi bendangeri ajaba ama inyakang.

⁴⁴“Ne nüburi pei tsükchir anema raratsü ora koba lenmang agi nai parnok yoktsü, nai shimtetba ki tsütsülen shia parnoki ne dang sarasademer, aser ne tenüng asoshi ni koba ki yanglu, iba tsütsülen shia parnoki kodang sarasademdir

⁴⁵idangji parnoki sarasademba aser mepishiba nai kotak nungi angang, aser parnok kümzükang.

⁴⁶“Parnoki na anema tai menara kechiyong tai memenar nisung shinga mali, aser nai parnok dang jashira, aser tsükchir lima talangi mesüra anai pur aotsüsa parnok pei tsükchir ket nung bendanga agütsüra,

⁴⁷saka parnok pei tsükchir lima nung alidangji pei sasa bilemdanga ne tsütsüi meyipra, parnok tepuokdak lima nungji lia ne dang, onoki tai mena, aser aibelena inyak, onoki mejungi benshi ta mepishira,

⁴⁸tsükchir lima, aser parnok tepuoker lima nung lia parnoki parnok mulung ajak agi aser parnok tanela ajak agi ne dangi meyipra, aser ne dang parnoki pei li tsütsü koba nai parnok tetsü-teboutem nem agütsü, aser koba nai shimtet, aser koba ne tenüng nung ni yanglu, ibaji repranga sarasademra,

⁴⁹idangji parnoki sarasademba aser mepishiba nai kotak nungi angang aser parnok timi yuang.

⁵⁰Ne nübur shiri tai mena parnok dang tai tokang, aser na anema parnoki kechi nung tai mena aji tokang aser shirnoki parnok pur ao parnok tsüngdang taochi sayuang.

⁵¹Kechiyong parnok ne nübur aser ne senmangertem, parnok nai Ijip lima timtem tekangshi nungi aniteta anir aru.

⁵²“Ne tenzükeri mepishiba aser ne nübur Israeli mepishia kodang parnoki ne dang ayimtendir, nai ne tenük lapokang aser angang.

⁵³Kechiyong ne senmanger asütsü asoshi nai parnok alima kintem nungi piladaktsü, aser ne tenzüker Mosa teka ajanga nai jembi aser Oh KIBUBA Tsüngrem, nai ozü tetsü-tebuotem Ijip lima nungi anir aru.”

⁵⁴Kodang Solomoni KIBUBA dang sarasademba aser mepishiba tatem küma aru, temokok agi apudaka sarasademba aser anünglen teka mekanga sarasademba nungi aser KIBUBA tekülemdak nungi pa aramesoa aru.

⁵⁵Idangji ola tulu agi ayimokja adoka Israel nübur ajak pai noktaka moatsü.

⁵⁶ Aser pai ashi, “KIBUBA shibai pei tenzüker Mosa teka ajanga nangzük, pai nangzükba ka nung danga pai tamakok malu, aser pai nangzükba ama pei nübur Israel nem pai anisüngzük agütsü nung pa tenüng sangang.

⁵⁷KIBUBA Tsüngrem asen tetsü-teboutem den aliba ama asenok den liang, pai asenok tetoktsü mesüra asenok senzüka teyutsüma.

⁵⁸Asen mulungsentsü pa tsütsüi meyiptsü, aser pa lenmang nung jajatsü, pai asen tetsü-teboutem dang melaba ayutsü aser telemtet ozüngtem ayutsü asoshi pai yariangma.

⁵⁹Item o koba ni KIBUBA tsüngdang mepishir, item anogo shia asen Tsüngrem KIBUBA anasa liang, aser anogo shia nüngdakba ama, pei tenzüker aser nübur timi yuang.

⁶⁰Anungji KIBUBAji Tsüngrem aser pa mesükba shinga mali ta alima kintemi metettsü.

⁶¹Pa telatet ozüng nung jajatsü, aser pai melaba anogo shia yutettsü asoshi asen KIBUBA Tsüngrem ama nenok temulung tabensa liang.”

⁶²Chuba aser Israel nunger kwi pa den liasü, ajaki KIBUBA dang tenla agütsü.

⁶³Solomoni yimjung tenla KIBUBA dang nashi pungchi meyi metsür ana, san aser nabong meyi metsü noklang ka tenla. Anungji chuba aser Israel chirtemi KIBUBA ki meshitet.

⁶⁴Iba anogo nungjisa chubai KIBUBA ki jakdang aliba obendangdak kiji meshitet. Kechiyong idakji tarongba, chiyungba aser tejebketba yimjung tenla agütsü, kechiaser KIBUBA ki jakdang aliba tenla dakji tarongba, chiyungba aser tejebketba tenla agütsütsü kanga tila liasü.

⁶⁵Anungji Solomoni iba mapang nungji benjong yanglua pa den Israel nunger telok tulu ajak Hamath nungi Ijip ayong tashi, aser Tsüngrem KIBUBA jakdang anogo tenet benjong liasü.[3]

⁶⁶Aser tinübuba nung, pai telokji odaktsü, aser parnoki chubaji moatsü, aser KIBUBAi pa tenzüker Dawid aser Israel dang tajung inyakba asoshi pelashishia pei kidangi meyipa ao.