Read njo 1 CHUBATEM 9 Bible Online

1 CHUBATEM 9 - njo bible

1 CHUBATEM 9

¹Kodang Solomoni KIBUBA ki, aser chuba ki aser pai inyaknüa aliba ajak tema aru,

² KIBUBAi Solomon tsüngdangi Gibeon nung adokba ama tanaben adok.

³Aser KIBUBAi pa dang ashi, “Kü tsüngdang nai mepishiba aser sarasademba ni angashiogo; kü tenüng teti alitsü asoshi ni nai yangluba ki meshitettsüogo. Aser kü tenük aser kü temulungjang teti tatem makai idakji alitsü.

⁴Aser nebu Dawidi jajaba ama nai kü tsüngdang temeshiba nung ochi mulungjang agi jajara, aser ni ne dang melaba ama inyakra, aser kü ozüngtem aser o bendangbatem yura,

⁵ ni nebu Dawid dang nangzükba ama, ne yimli Israel madak ni na teti chubadaktsütsü, aser shingai na Israel yimli madak tamakok maludaktsütsü.

⁶Saka nenoki aser nenok chirnuri ni nungi pilara, aser ni melaba aser kü ozüng meyura, aser pila or tangar tsüngremtem tenzüka parnok külemra,

⁷ni parnok nem agütsüba lima nungi Israel leptoktsü, aser iba ki koba kü tenüng asoshi ni meshitet, ni endoktsü, aser tangar kin tsüngdang Israel tansütsü kin ka alitsü.

⁸ Iba ki koba talang, süisübonger ajaki ngua süngmangtsü, aser parnoki süngmangtepa jembitsü, ‘Kechiba KIBUBAi iba li nung aser iba ki dak yamai inyak?’

⁹Aser parnoki langzütsü, Kechiaser parnoki pei tetsü-teboutem Ijip lima nungi anir aruba Tsüngrem amadoker, tangar tsüngrem dak amanga külem aser tenzük; anungji KIBUBAi parnok dangi iba tai bener aru.”

¹⁰Solomoni KIBUBA aser chuba ki, anaji küm metsü tashi nung renem.

¹¹Tair chuba Hirami Solomon nem cedar aser fir süng, aser pai aginüba ama hon agütsü nung Solomon chubai Hiram nem Galil lima nungi yimti metsü agütsü.

¹²Saka kodang Solomoni pa nem agütsüba yimtitemji reprangtsü asoshi Hirami Tair nungi aru, item dakji pai temulung mesüi liasü.

¹³Anungji pai ashi,“Kü adianu, nai kü nem agütsüba yimtitem ya kechi?” Aser pai iba linük dangji Kabul[4] ta aja, aji oda tanü tashi ajar.

¹⁴Hirami Solomon nem hon seret touzük mori noklang ka metsü bener yok.

¹⁵Solomon chubai KIBUBA aser par ki; Millo aser Yirusalem jara Hazar, Megiddo aser Gezer yanglutsü asoshi mapa inyakertem aniten.

¹⁶Ijip chuba Faraoi tua Gezer agi, aser aji rongtoktsür idakji alir Kanan nunger tepset aser aji pei jala, Solomon kinungtsü nem zük agütsü.

¹⁷Solomoni Gezer aser Beth-horon yanglushi.

¹⁸Lisem lima nung Baalath aser Tamar,

¹⁹chiyungtsü rizüngdak yimtitem, kor talungtsü, kor anishirtem asoshi oda pai Yirusalem aser Lebanon nung aser pa yimli ajak nung pai kechisa yanglunü item ajakji yanglu.

²⁰Amor, Het, Periz, Hiv, aser Yebus shir Israel nunger masü,

²¹parnok chirtem shir Israel purtemi meshimeshia mesamatsütet parnokji tanü tashi Solomoni alar tia nung ayu.

²²Saka Israel nunger rongnungbo Solomoni shinga alar tia nung meyutsü, saka parnok rarartem, par kilirtem, par chuba jabasotem, par walunirtem aser par kor temerangertem madak yimsüsür liasü.

²³Solomon mapa nung tongtipurtemji noklang pungu ser tenem liasü, mapa nung alirtem anishitsü parnok dak tashi liasü.

²⁴Saka Farao jala Dawid yimti nungi adoker, la nem Solomoni yanglutsüba ki jagi aru, idangji pai Millo yanglu.

²⁵ Küm nung asemben tashi Solomoni tarongba aser yimjung tenla KIBUBA asoshi yangluba tenla sabang manung agüja aru, KIBUBA tsüngdang aliba tenladak liangmesen ronga tenla. Yamaji pai kiji renem.

²⁶Edom li koba Temerem Tzüyim Eloth anasa lir, idakji Eziongeber nung Solomon chubai rong yanglu.

²⁷Hirami pei kilirtem, rong anishirtem shirnoki tzüyim meteta liasü, parnokji Solomoner kilirtem den yok.

²⁸Aser parnoki Ofiri arua hon touzük mori noklang pezü ser metsü idak nungjagi Solomon dangi bener aru.