Read njo 2 CHUBATEM 1 Bible Online

2 CHUBATEM 1 - njo bible

2 CHUBATEM 1

¹Ahab sür külen Moabi Israel anema apuso.

²Aser Ahazia, Samaria nung pa taktang temaba ozü kirang ajanga tsük, aser shiranga liasü; aser pai osang benertem yoka pai parnok dang ashi, “Oang, Ekron tsüngrem Baal-zebub dang ni iba shirangba nungi anebtsü asü masü asüngdangang.”

³Saka KIBUBA tenyari Tishbi nunger Elija dang ashi, “Aramesoang, Samaria chubar osang benertem den ajuruteptsü tuang, aser parnok dang shiang, ‘Ya Israel nung Tsüngrem maliasü kechiba nenoki Ekron tsüngrem Baal-zebub dang asüngdanger?’

⁴Tang aji asünung KIBUBAi ashir, ‘Na yipten kobai tua ali iba nungi malutsü, saka atangji asütsü. Aser Elija aenshia ao.

⁵Osang benertem pa dangi meyipa aru, aser pai parnok dang ashi, “Kechiba nenok meyipa aru?”

⁶Aser parnoki pa dang ashi, “Nisung ka onok den ajuruteptsü atu, aser pai onok dang ashi,Oang, nenok yokba chuba dangi tanaben meyipang aser pa dang shiang, Yamai KIBUBAi ashir, Ya Israel nung Tsüngrem maliasü kechiba nenoki Ekron tsüngrem Baal-zebub dang asüngdanger?’ Aji asünung na yipten kobai tua ali iba nungi malutsü, saka atangji asütsü.”

⁷Pai parnok dang ashi, “Nenok den ajuruteptsü atua item o nenok dang ashiba nisungji kechi ama ka?”

⁸ Parnoki pa dang langzü, “Pa süoshiji tezüng agi yangluba,aser teperem nung shiküp peremsen agi nai.” Aser pai ashi, “Aji Tishbi nunger Elija.”

⁹Idangji chubai nisung tenem madak tanishir ka sülen tenemi anir yok. Aser pa Elija dangi aru; aser ajiang, pa tenem kolak nung mena lia, pai pa den jembi, “Oh Tsüngrem nisung, chubai ashi, Alung.”

¹⁰ Elijai tenem madak tanishir dangji ashi, “Ni Tsüngrem nisung ka süra, anüng nungi mi alua na aser ne den aliba tenemji samadakjang.” Aser anüng nungi mi alu, aser pa aser par tenemji samatsü.

¹¹Tanaben pai tenem madak tanishir tangar tenem anir yok. Aser pai pa dang ashi, “Oh Tsüngrem nisung, yamai chubai ashir, Yakta alung.”

¹²Aser Elijai parnok dang ashi, “Ni Tsüngrem nisung ka süra anüng nungi mi aludakjang, aser na aser tenemji samadakjang.” Aser Tsüngremer mi anüng nungi alu, aser pa aser tenemji samadaktsü

¹³Ano tenem madak tanishir tasembuba par tenem den anir yok. Aser tenem madak tanishir tasembubaji atu, aser arua Elija madang temokok agi apudaka pa dang mepishia ashi, “Oh Tsüngrem nisung, ni ne dang mepishir, kü taküm aser ne tenzüker item tenem taküm ne tsüngdang senti sangma.

¹⁴Ajiang, anüng nungi mi alu, aser nisung tenem madak mezüng tanishir ana parnok den tenem-nemjia dena samaogo; saka tangbo kü taküm ne tsüngdang apayuangma.”

¹⁵Aser KIBUBA tenyari Elija dang ashi, “Pa den luang, pa tsübua teli.” Aser pa aramesoa pa den chuba dangi alu.

¹⁶Aser Elijai chuba dang ashi, “Yamai KIBUBAi ashir, kechisü nung nai Ekron tsüngrem Baal-zebub dang asüngdangtsü osangbenertem yok? Ya asüngdangtsü Israel nung Tsüngrem maliba yong asü? Aji asünung na yipten kobai tua ali, iba nungi malutsü, saka asütsü.”

¹⁷Anungji Elijai jembiba KIBUBA o amato pa asü. Aser Yihuda chuba Yehoshafat jabaso Yehoram küm tanabuba nung pa melena Yeroboami chubatsü tenzük; kechiaser pa jabaso maliasü.

¹⁸Tang tanüngba Ahazia mapa koba pai inyak, Israel chubatem putipuyang kaket nung item zülua mali no?