Read njo 2 CHUBATEM 10 Bible Online

2 CHUBATEM 10 - njo bible

2 CHUBATEM 10

¹Tang Samaria nung Ahab jabaso neter liasü. Anungji Yehui yimsüsürtem, tamburtem aser Ahab chirtem repranger dangi shiti zülu,

²Tang iba shiti nenok dangi aruli-i nenok kibur chirtemi aser nenok den talungtsü aser kortem, atsü agi lungbanga aliba yimti aser raraba nok o nü, nenok den ali nungji;

³nenok kibur jabaso tajungtiba aser tetemsütiba shimtetang, aser tebu chuba menden nung pa mendakjang, aser nenok kibur kibong asoshi rara-ang.

⁴Saka parnok kanga tsübua ashi, “Ajiang chuba anati pa madang menoktaktet, ajangla asenoki koda noktaktsü?”

⁵Aser ki madak ketdangbuba, yimti madak bangdakbuba, tamburtem aser shirnoki tanurtem reprang parnoki Yehu dangi yoka ashi, “Onok ne tenzükertem lir, aser onok dang melaba ajak inyaktsü; onoki shinga chuba mekümdaktsüli: ne nükdang ajungba nai inyakangma.”

⁶Idangji pai parnok dangi tanaben shiti zülu, “Nenok kü tsütsü lira, aser nenoki kü ola angadi süra, nenoki nenok kibur jabasotem kolak agiang, aser iba mapang kü dangi Yezreeli asüng arung.” Tang chubar jabasotem nisung neter asünung, yimti nung nisung tulurtem, shiri parnok mesütet parnok den liasü.

⁷Kodang shiti jagi parnok atong, parnoki chubar jabasotem neter tepset aser parnok tekolak melok nung ayu, aser pa dangi osang bener Yezreeli parnok yok.

⁸Pa dangi osang bener ka arua ashi, “Parnoki chubar jabasotem kolak bener aruogo.” Pai ashi, “Nenoki itemji anepdang tashi süngkhümbongi ailen anasü nangtena yujang.”

⁹Aser anepdang pa oa noktak aser nisung ajak dang ashi, “Nenok ochishir lir, ajiang ni kü kibur anema tamajung tasa asa, aser pa tepset, saka item ajak shibai tepset?

¹⁰Tang metetang, Ahab kibong indang KIBUBAi jembiba KIBUBA O kecha ali nung metsüktsü; kechiaser KIBUBAi pa tenzüker Elija ajanga jembiba inyakogo.”

¹¹ Anungji Yezreel nung Ahab kibong anünga aliba ajak, aser par nisung tulur aser par temetettep tembar ajak, aser par putirtem pai shinga anünga meyutsü tashi Yehui tepset.

¹²Pa apusoa Samariai ao. Aser pa lenmang nung sannüker tezüng mejepdak ki nung alidang,

¹³Yehui Yihuda chuba Ahazia adianutem den ajurutepa ashi, “Nenok shir?” Parnoki langzü, “Onok Ahazia adianutem lir, aser chubar chirtem aser chubatsür chirtem nem salem agütsütsü alur.”

¹⁴Pai ashi, “Parnok taküm agiang.” Aser parnoki parnok taküm agi, aser tzüto anasa tezüng mejepdak ki nung parnok nisung lir ana tepset; pai parnok shinga metoktsü.

¹⁵Kodang pai idak nungjagi pila, pa lenji aruba Rekab jabaso Yehonadab den pai ajurutep; aser pai pa nem salem agütsü, aser pa dang ashi, “Kü mulungjang ne den aliba ama, ne mulungjang shitak lir ma?” Aser Yehonadabi langzü, “Aji oda lir.” Aji oda lira, “Ne ket kü nem kua.” Aser pai pa ket pa nem agütsü; aser pai pa talungtsü jagi aniket.

¹⁶Pai ashi, “Kü den arung, aser KIBUBA asoshi kü tejangraba ajiang.” Anungji parnoki pa talungtsü nung pa mendaktsü.

¹⁷Kodang pa Samariai aru, KIBUBAi Elija dang jembiba KIBUBA O amato Samaria nung Ahab dang anünga aliba, pai pa mesamatsü tashi ajak tepset.

¹⁸Yehui nisung ajak külemi sentepdaktsü; aser parnok dang ashi, “Ahabi Baal tera tenzük; saka Yehui pa kanga tenzüktsü.

¹⁹Aji asünung tang kü dangi Baal ainker ajak pa külemer ajak, aser pa putir ajak jatenang; shinga marui telidaktsü, kechiaser ni Baal dang tetepsetba tenla tulu tenlatsü lir; shibasa meteni lidir, pa taküm malitsü.” Saka Baal külemertem samatsütsü bilemer Yehui tekülak agi aji inyak.

²⁰Yehui ashi, “Baal asoshi akhümtsübua mungdang ka meshiteta liang.” Aser parnoki aji sangdonga yok.

²¹Yehui Israel ajak dangi yok; aser Baal külemer ajak aru, marur nisung kata maliasü. Aser parnok Baal kidangi ait; aser Baal kiji külen tatem nungi külen tatem tashi sünga liasü.

²²Aser sobutsü madak ketdangsüa aliba dangji ashi, “Baal külemer ajak asoshi sobutsü bener arung.” Aser pai parnok dangi sobutsü bener arutsü.

²³Yehu aser Rekab jabaso Yehonadab Baal kidangi ai aser Baal külemertem dang pai ashi, “Baal külemer dak alema, yangi nenok den KIBUBA tenzüker shinga malitsü bushiang, aser ajiang.”

²⁴Aser parnoki tetepsetba tenla aser tarongba tenla agütsütsü ai. Tang Yehui nisung lir kimalen shimteta yuja liasü aser ashi, “Nenok ket nungi ni anir arutsüba nisungtem kar danga jena odaktsüra, shibai pa odaktsür pa takümji pa taküm melen alitsü.”

²⁵Pai tarongba tenla agütsüba temli dang, Yehui tanüker aser tanishirtem dang ashi, “Iang, aser parnok tepsetang; shinga tadokdaktsü.” Parnoki nok agi parnok tepset; aser tanüker aser tanishirtemi parnok endok, aser Baal ki taktang telungba jagi ai.

²⁶Baal kidang aliba temeshi tongshi bener adok, aser itemji rongtok.

²⁷Aser parnoki Baal tongshi aser ki raksatsü, aser tanü tashi aji metsümeshidak ka kümdaktsü.

²⁸Yamaji Yehui Israel nungi Baal samatsü.

²⁹ Aji saka Nebat chir Yeroboam temenen koba agi pai Israel temenen menadaktsü, Bethel aser Dan nung aliba hon nashi chanu, koba pai yanglu, iba temenenji Yehui metoktsü.

³⁰KIBUBAi Yehu dang ashi, “Kü nükdang kechi shitak lir aji nai inyak, aser kü mulungjang nung aliba amato Ahab kibong dang inyak nungji, putu pezübuba tashi ne chirtemi Israel chuba menden nung amentsü.”

³¹Saka Yehui pei mulungjang ajak agi Israel Tsüngrem KIBUBA ozüng nung jajatsü mekümdangi ali; pai Yeroboam temenen koba agi pai Israel temenen benshidaktsü iba nungi mepila.

³²Item anogo nung KIBUBAi Israel leptoktsü tenzük, aser Israel litsü ajak nung Hazaeli parnok akok;

³³Yordan anüdoklen tsütsü, Gilead lima ajak, Gad, Reuben aser Manase nunger lima ajak nung, Aroer nungi, koba Arnon lenten anasa lir, oda Gilead aser Bashan tashi.

³⁴Tang anünga aliba Yehu mapa, pai inyakba ajak aser pa tashi ajak, Israel chubatem putipuyang kaket nung zülua melika ma?

³⁵Aser Yehu tebu nunger den mejang: aser parnoki pa Samaria nung rema yutsü. Aser par jabaso Yehoahazi pa melen chuba.

³⁶Aser Samaria nung Yehu chubaba mapangji küm metsür ti liasü.