Read njo 2 CHUBATEM 11 Bible Online

2 CHUBATEM 11 - njo bible

2 CHUBATEM 11

¹Tang Ahazia tetsü Athaliai lar jabaso süogo ta meteta akümdang, lai aramesoa chubar kinunger ajak samatsü.

²Saka Yoram chuba jala, Ahazia adianu Yehoshebai Ahazia jabaso Yoas agi aser chubar jabasotem tetepsetba rongnungi miima bener oa pa anebaluri yipten taktang nung ayu; aser parnoki Athalia nungi pa miima ayu, anungji pa metepseti liasü.

³Aser pai la den miima KIBUBA kidang küm trok liasü: aser Athalia linük madak chuba.

⁴Küm tenetbuba nung Yehoiadai Karia arkotong aser tanükertem tajai yok, aser parnok KIBUBA tenla kidangi anir aru; aser pai parnok den tezüngzüktepba ka yanglu, aser KIBUBA kidang parnok nem azüngashidaktsü, aser parnok dang chubar jabaso sayu.

⁵Pai parnok dang mela-a ashi, “Nenoki ya inyakang: nenok shilem asembuba, shirnok amungnü chuba ki anüktsüba aor, chubar ki anüker asütsü,

⁶aser shilem asembuba Sur Süngkhüm nung alitsü, aser asembuba tanüker sülen süngkhüm nung alitsü, yamaji nenoki kiji anüktsü, aser tenoktangtsü ka asütsü.

⁷Nenok telok ana, oda amungnü aortem, chuba meketa KIBUBA ki nüka alitsü.

⁸Nisung shia pei ket nung nok o nü bener, nenoki chuba meketa lungbangtsü; aser shibai tarenji atena aitdir pa tepsetdakjang. Kodang chuba adokdir mesüra aitdir, nenok pa den liang.”

⁹Yehoiada putiri melaba ajak amato arkotongtemi inyak, parnok nisung shiai, nisungtem shirnok amungnü aitsü liasü, aser shirnok amungnü tugutsü liasü parnok aniten, aser Yehoiada putir dangi aru.

¹⁰Putir jagi arkotong nem nü aser jong koba Dawid meyong KIBUBA kidang liasü itemji agütsü.

¹¹Tanükertemji nisung shia nok-onü bener, ki tajichi tsütsülen nungi ki tabelen tsütsü tashi tenladak aser ki tsütsü chuba anasa meketa noktak.

¹²Idangji pai chuba jabasoji anir adoka pa dak chuba korangji semoktsü, aser ozüng kaket pa nem agütsü; aser parnoki pa chuba ta sangoktsü, aser pa dak totzü mezütsü; aser parnoki parnok teka matena ashi, “Tsüngremi chubaji kümzükang.”

¹³Kodang Athaliai tanüker aser nisungtem ola angashi, lai nisungtem dangi KIBUBA kidangi aru.

¹⁴ Aser lai reprang, aser ajiang, yimsü amato, chubaji sabang manung noktak, aser arkotongtem aser jangzü apurtem chuba anasa liasü; aser linük nisung ajaki pelatep aser jangzü apu. Idangji Athaliai pei süoshi shisa, aser ayimten. “Ashioktsüba! ashioktsüba!”

¹⁵Idangji putir Yehoiadai temeranger telok shimteta aliba noklang madak tanishir nem ozüng agüja parnok dang ashi, “Tareni aliba tetsüngdai la bener arung; aser shibaisa la sülen anidakdir nok agi tepsetang.” Kechiyong putiri shiogo, “La KIBUBA kidang tetepsetdaktsü.”

¹⁶Anungji parnoki la dak teka ai, aser chubar kidangi kor aiba lenmangi la anir oa yangji la tepset.

¹⁷Yehoiadai KIBUBA aser chuba o nisungtem tsüngda nung, oda parnok KIBUBA nübur asütsü ta tezüngzükba ka yanglu.

¹⁸Linük nung nisung ajak Baal kidangi oa aji raksatsü; tenladak aser süngyanglu parnoki meshimeshia raksatsü aser Baal putir Mattan tenladak madang tepset. Aser putiri KIBUBA ki madak tanükertem shimtet.

¹⁹Arkotong aser Karia nunger tanükertem, aser linük ajak pai agi; aser parnoki KIBUBA ki nungi chuba anir alu, aser tanüker kikümbang lenmang agi chuba dangi aru. Aser pai chuba menden nung amen.

²⁰Anungji linük nung nisung ajak pelatep aser yimti tiptema liasü, aser chuba kidang parnoki Athalia tepset.

²¹Yoas chubatsü tenzükdang küm tenet liasü.