Read njo 2 CHUBATEM 12 Bible Online

2 CHUBATEM 12 - njo bible

2 CHUBATEM 12

¹Yehu küm tenetbuba nung Yoas chubatsü tenzük; aser pai Yirusalem nung küm lir chuba. Pa tetsü tenüng Beersheba yimtsür Zibia liasü.

²Yoas putir Yehoiadai pa dang sayuba nung pa arishi tepiyong KIBUBA nükdang kechi shitak aji inyak.

³Aji saka tokong külemba tesemji bener moi liasü: nisungtemi ano tetepsetba tenla agütsü aser tenem nung tarongba tenla agütsü.

⁴ Yoasi putirtem dang ashi, “Temeshi sempet sen ajak koba KIBUBA kidangi bener arua lir, nisung shiai tagütsütsü aliba sen, aser KIBUBA dangi bener arutsü pei mulungjangi aitba sen ajak,

⁵putirtem nem aji parnok asoshi agidakjang, putir shiai temetettep nisung nungi, aser parnoki kongsa teraksa ngudir, ki teraksatemji yanglushitsü.”

⁶Saka Yoas chuba pa küm metsür asem tonga liaka, putirtemi ki teraksaji meyanglushi-i liasü.

⁷Idangji Yoas chubai putir Yehoiada aser tangar putirtem aja aser parnok dang ashi, “Kechiba nenoki ki teraksaji meyanglushi? Tang aji asünung nenoki metetba nisung nungi sen tagi, saka aji ki teraksa yanglushitsü agüjang.”

⁸Aser putirtemi joko nisungtem nungi sena magitsü aser ki teraksatema meyanglushitsü ta nangzük.

⁹Idangji putir Yehoiadai süngden ka bena aru, aser iba tenembangtsü nung tapok ka prepbok, aser aji tenladak anasa KIBUBA kidangi aitdang tajichilen yutsü: aser ki nüka aliba putirtemi KIBUBA kidangi bener aruba sen ajak iba nung enoktsü.

¹⁰Aser süngden nung sen aika parnoki angudang chubar tezüluba aser temaba putir atu aser züngdang aser KIBUBA kidang anguba senji juli nung asep.

¹¹Parnoki sen ozüka alibaji mapa inyaker KIBUBA ki repranger ket nung agütsü; aser parnoki aji mistri aser kisürtem shirnoki KIBUBA ki yanglu parnok nem,

¹²aser lung mistritem aser lung angentetertem nem, aser KIBUBA ki teraksa yanglushitsü süngtsük aser lung tetsüksa alitsü asoshi, aser ki asoshi teyanglutsü aliba ajak asoshi taa agütsü.

¹³Aji saka KIBUBA kidangi bener aruba sen nungi KIBUBA ki asoshi taribi maroktem misü mejepba, chipo, jangzü, mesüra hon aser taribi marok-aosu meyanglui liasü:

¹⁴saka parnoki aji mapa inyaker nem agütsü, aser aji agi KIBUBA ki yanglushitsü tenzük.

¹⁵ Talisa, mapa inyaker nem taa agütsütsü shir ket nung senji bendanga agütsü, parnoki item nisung den sen mezüngdangtep, kechiyong parnoki ochishia inyak.

¹⁶ Tai tenla asoshi sen aser temenen tenla asoshi sen KIBUBA kidangi bener mait: aji putirtem meyong liasü.

¹⁷Idangji Siria chuba Hazael atu, aser Gath anema rara, aser aji agi, aser Hazaeli Yirusalemi aotsü pa tejak shia ali.

¹⁸Yihuda chuba Yoasi tebou nunger aser Yihuda chubatem, Yehoshafat, aser Yehoram aser Ahaziai, bendanga agüja aliba temeshi osettem, aser KIBUBA kidang terizüngdak anguba hon ajak, aser chubar kidang aliba, ajak Siria chuba Hazael dangi yok: aser pa Yirusalem nungi oadok.

¹⁹Tang Yoas tanüngba mapa, aser pai inyakba ajak, Yihuda chubatem putipuyang kaket nung itemji zülua mali no?

²⁰Pa tenzükertem arameso aser tamajung tasa asa, aser Silia leni aluba lenmang nung Millo kidang Yoas tepset.

²¹Kechiyong Shimeat jabaso Yozahar, aser Shomer jabaso Yehozabad pa tenzükertemi pa südaktsü: aser Dawid yimti nung parnoki pa pei tebu nunger den rema yutsü; aser par jabaso Amaziai pa melen chuba.