Read njo 2 CHUBATEM 13 Bible Online

2 CHUBATEM 13 - njo bible

2 CHUBATEM 13

¹Yihuda chuba Ahazia jabaso Yoas küm metsür asembuba nung, Yehu jabaso Yehoahazi Samaria nung Israel nunger madak chubatsü tenzük, aser küm tertenet chuba.

²Aser KIBUBA madang kechi majung, aji pai inyak, aser Nebat jabaso Yeroboam temenen koba agi pai Israel temenen benshidaktsü, iba sülen anitak; iba nungi pai mepila.

³Israel anema KIBUBA ain adok, aser pai parnok Siria chuba Hazael ket nung, aser Hazael jabaso Ben-hadad ket nung maneni bendanga agütsü.

⁴Idangji Yehoahazi KIBUBA dang mepishi, aser KIBUBAi pa dang anga, kechiaser Siria chubai Israel koda rishikangshi pai angu.

⁵KIBUBAi Israel nem kümtetdakba ka agütsü; anungji parnok Siria nunger ket nungi adok; aser Israel chirtem akhidang ama parnok süki nung ali.

⁶Aji saka Yeroboam temenen koba agi pai Israel temenen menadaktsü, parnoki iba nungi mepila. Saka iba nung jaja aser Samaria nung Ashera ano liasü.

⁷Kechiyong nisungtem nungi kor temeranger tenem aser talungtsü ter, aser ali temeranger meyi ter dak alema pai Yehoahaz nem kecha metoktsü; kechiaser Siria chubai parnok samatsü, motsüngnem nung auyi mesüka parnok kümdaktsü.

⁸Tang Yehoahaz tanüngba mapa aser pai inyakba ajak aser pa tashi itemji Israel chubatem putipuyang kaket nung zülua mali no?

⁹Yehoahaz tebu nunger den mejang; aser parnoki pa Samaria nung arem, aser pa jabaso Yehoas pa melen chuba.

¹⁰Yihuda chuba Yoash küm semer tenetbuba nung Yehoahaz jabaso Yehoasi Israel madak Samaria nung chubatsü tenzük, aser küm tertrok chuba.

¹¹Aser KIBUBA madang kechi majung aji pai inyaka Nebat jabaso Yeroboam temenen, kechi agi pai Israel temenen benshidaktsü, pai iba nungi mepila; saka pai iba nung jaja.

¹²Tang Yehoas tanüngba mapa, aser pai inyakba ajak, aser pa tashi agi pai Yihuda chuba Amazia anema raraba; itemji Israel chubatem putipuyang kaket nung zülua mali no?

¹³Yehoas pa tebu nunger den mejang; aser Yeroboam pa chuba menden nung amen, aser Samaria nung Israel chubatem den Yehoas arem.

¹⁴ Tang kodang Elisha pa tasütsüba tashitak agi shiranga liasü, Israel chuba Yehoas pa dangi alu, aser pa madak jeba ashi, “Oba, oba, Israel talungtsü aser iba kor temerangertem!”

¹⁵Elishai pa dang ashi, “Lijak aser lijakjang am-ang; aser pai pa lijak aser lijakjang am.”

¹⁶Pai Israel chuba dang ashi, “Ne lijak atemlokang.” Aser pai aji atemlok. Aser Elisha pei tekaji chuba ket nung ataloka ayu.

¹⁷Pai ashi, “Anüdoklen kichiba lapokang,” aser pai aji lapok. Idangji Elishai ashi, “Yokang,” idangji pai yok. Pai ashi, “Takokba KIBUBAr lijakjang aser Siria madak takokba lijakjang; kechiaser nai Siria nunger Afek nung parnok mesamatsü tashi raratsü.”

¹⁸Pai ashi, “Lijakjangji bena arung.” Kodang pai itemji bena aru, pai Israel chuba dang ashi, “Ali nung zükang.” Pai asemben azük aser anen.

¹⁹Idangji Tsüngrem nisung jagi pa madak ain adoka ashi, “Nai punguben mesüra trokben azüktsü liasü; idangjibo nai Siria mesamatsü tashi rarala; saka tangbo nai Siria asemben dang akoktsü.”

²⁰Elisha asü, aser parnoki pa arem. Tang Moab nunger teloki küm shia metsü mapang yim amaki aru.

²¹Parnok nisung ka remya alidang, ajiang, parnoki tsükchir telok ka rishi, aser parnoki nisungji Elisha leper nungji mereptoker jenshi. Kodang tasümang jagi Elisha teret nung kongshi, idangji pa tanaben shia aru, aser pa tetsüng agi noktak.

²²Siria chuba Hazaeli Yehoahaz anogo tepiyong Israel rishikangshi.

²³Saka parnok dang KIBUBAi yimli sayu, aser parnok dak taochi aka, aser parnok dangi meyip, kechiaser Abraham, Isak, aser Yakob dang tezüngzüktepba ayu; aser itemji meraksatsütsü mesüra pai tang tashi pa tsüngdang nungi meindoktsüi lir.

²⁴Siria chuba Hazael asü: aser par jabaso Ben-hadad pa melen chuba.

²⁵Idangji Yehoasi Hazael jabaso Ben-hadad ket nungi tebu Yehoahaz nungi rara nung agiba yimtitem tanaben agi. Asemben Yehoahazi pa akok aser Israel yimtitem meyipa angu.