Read njo 2 CHUBATEM 14 Bible Online

2 CHUBATEM 14 - njo bible

2 CHUBATEM 14

¹Israel chuba Yehoahaz jabaso Yehoas küm tanabuba nung Yihuda chuba Yehoas jabaso Amaziai chubatsü tenzük,

²Pa chubatsü tenzükdang pa küm metsür pungu liasü; aser pai Yirusalem nung küm metsür tuku chuba, aser tetsü tenüngji Yehoadin, Yirusalem nungi liasü.

³KIBUBA nükdang koba shitak aji pai inyak, aji saka tebou Dawidbo memesüki liasü; tebu Yehoasi inyakba ama pai ajak inyak.

⁴Aji saka tenem tekülemdakjibo magieni liasü; nisungtemi ano tetepsetba tenla agütsü aser tenem tekülemdak liangmesen arong.

⁵Chuba yimliji pa ket nung akang akanga yangluli, tebu tepsetba pa kilirtem pai tepset;

⁶ saka nisung tepsetertem chirnurbo pai metepset. KIBUBAi melaba ama, Mosa ozüng kaket nung zülua aliba amato; chirnur atema tsürabur metepsettsü, mesüra tsürabur asoshi chirnur metepsettsü, saka nisung shia pei temenen asoshi asütsü.

⁷Pai Edom nunger Metsü Lenten nung meyi ter tepset aser khenyongi Sela maktet, aser iba anogo tashi iba tenüng Yoktheel ta ajar.

⁸Idangji Israel chuba Yehu chir Yehoahaz jabaso Yehoas dangi Amaziai osang abenertem yoka ashi, “Arung, asenok tejak o tejak na reprangtepdi.”

⁹Israel chuba Yehoasi Yihuda chuba Amazia dangi yoka ashi, “Lebanon nung aliba ayidong kati, Lebanon nung aliba cedar süngdong dangi yoka ashir, ‘Ne jala ozü jabaso nem kinungtsü asütsü agüjang,’ aser yangji arem shiruru ka anasa süia ayidongji ajemsatsü.

¹⁰Atangji nai Edom akok, aser ne mulungjang ulua aküm: ne sentsüwangshi agi temulung süa kidang liang; kechiyong nai na aser ne den Yihuda laotsüsa kechiba nai timtem adokdaktsütsü?”

¹¹Saka Amaziai manga, anungji Israel chuba Yehoas atu; aser pa aser Yihuda chuba, tejak o tejak na chitepa Yihuda meyong Beth-shemes nung ajurutep.

¹²Aser Israel tsüngdang Yihuda tamakok angu; aser nisung shia pei süki-i jena ao.

¹³Aser Israel chuba Yehoasi Beth-shemes nung Ahazia jabaso Yehoahaz chir Yihuda chuba Amazia apu, aser Yirusalemi arua Yirusalem jara Efraim kikümbang nungi kinük kikümbang tashi, süklep noklang ka raksatsü.

¹⁴Hon aser taribi ajak, chubar terizüngdak kidang anguba, KIBUBA kidang anguba aser tapurtem dena pai aben aser Samariai meyipa ao.

¹⁵Tang Yehoas tanüngba mapa koba pai inyak, pa tashi aser pai koma Yihuda chuba Amazia den rara; itemji Israel chubatem putipuyang kaket nung zülua melika ma?

¹⁶Yehoas tebu nunger den mejang aser Israel chubatem den Samaria nung arem; aser par chir Yeroboam pa melen chuba.

¹⁷Yihuda chuba Yehoas jabaso Amazia, Israel chuba Yehoahaz jabaso Yehoas sür külen küm terpungu taküm ali.

¹⁸Tang Amazia tanüngba mapa Yihuda chubatem putipuyang kaket nung zülua melika ma?

¹⁹Parnoki pa anema Yirusalem nung tasa asa; aser pa Lakhishi jena ao; saka parnoki pa bushia Lakhishi yok, aser yangji pa tepset.

²⁰Parnoki pa kor nung anir aru, aser Dawid yimti nung pa tebu nunger den Yirusalem nung arem.

²¹Idangji Yihuda nunger ajaki küm tertrok tain aliba Uzzia agi, aser tebu Amazia menden nung chuba kümdaktsü.

²²Pai Elath yanglu aser aji Yihuda nem meyipa agütsü, iba sülenji chuba pei tebu nunger den mejang.

²³Yihuda chuba Yehoas chir Amazia küm terpungububa nung Israel chuba Yehoas jabaso Yeroboam Samaria nung chubatsü tenzük aser küm lirka chuba.

²⁴KIBUBA tsüngdang kechi majung aji pai inyak. Nebat jabaso Yeroboam temenen koba agi pai Israel temenen benshidaktsü, ya ajak nungi mepila.

²⁵ Pai Israel litsü Hamath lenmang nungi Araba tzüyim tonga, KIBUBA, Israel Tsüngrem O, Gathhefer Yehoahaz ainkar Amittai jabaso Yona ajanga pai jembiba amato, pai Israel litsü meyipa agütsü.

²⁶Kechiyong KIBUBAi Israel timtem tekangshi kanga tulu ta ajitet; kechiyong alar mesüra nüji shinga tokja mali, Israel asoshi teyarir shinga mali.

²⁷Saka KIBUBAi anüng kübok nungi Israel tenüng maidoktsütsü ta ashi: saka pai Yehoas chir Yeroboam ket agi parnok kümzük.

²⁸Tang Yeroboam tanüngba mapa, aser pai inyakba ajak, pa tashi, pai koma rara, aser pai koma Yihuda meyong Damaska aser Hamath Israel asoshi agütsü, item Israel chubatem putipuyang kaket nung zülua mali no?

²⁹Yeroboam tebu nunger den, oda Israel chubatem den mejang, aser par chir Zekaria pa melen chuba.