Read njo 2 CHUBATEM 15 Bible Online

2 CHUBATEM 15 - njo bible

2 CHUBATEM 15

¹Israel chuba Yeroboam küm metsür tenetbuba küm nung Yihuda chuba Amazia jabaso Uzzia chubatsü tenzük.

²Pa chubatsü tenzükdang pa küm tertrok tain liasü: aser pai Yirusalem nung küm tenemer ana chuba aser tetsü tenüng Yekonia Yirusalem tsür liasü.

³Tebu Amaziai inyakba ajak ama pai KIBUBA madang kechi tajung aji inyak.

⁴Aji saka tenem tekülemdak bener moi liasü; nisungtemi ano tetepsetba tenla agütsü, aser item tenem tekülemdak nung liangmesen arong.

⁵KIBUBAi chuba dak azük, anungji pa asüba anogo tashi pa zütsüra aketba nisung liasü, aser ki balaka nung ali. Aser chubar chir Yothami linük nübur aser kibong madak o bendanga liasü.

⁶Tang Uzzia tanüngba mapa, aser pai inyakba ajak itemji Yihuda chubatem putipuyang kaket nung zülua mali no?

⁷Uzzia tebu nunger den mejang, aser parnoki pa tebu nunger den Dawid yimti nung arem aser par chir Yothami pa melen chuba.

⁸Yihuda chuba Uzzia küm semer tibuba nung Yeroboam chir Zekariai Israel madak Samaria nung ita trok chuba.

⁹Tebui inyakba ama KIBUBA madang kechi majung aji pai inyak: Nebat chir Yeroboam temenen koba agi pai Israel temenen benshidaktsü, iba nungi pai mepila.

¹⁰Yabesh jabaso Shallumi pa anema tasa asa, aser nisungtem madang pa dak alep aser tepset aser pa melen chuba.

¹¹Tang Zekaria tanüngba mapa Israel chubatem putipuyang kaket nung zülua lir.

¹² Ibai KIBUBA O, koba pai Yehu dang, “Ne jabasotem Israel chuba menden nung putu pezübuba tashi amentsü,” ta shia liasü aser aji oda atalok.

¹³Yabesh chir Shallumi Yihuda chuba Uzzia küm semer tibuba nung chubatsü tenzük; aser pai Samaria nung ita ka chuba.

¹⁴Gadi chir Menahem Tirza nungi atu, aser Samariai aru, kong Yabesh chir Shallum Samaria nung akok, pa yangji tepset, aser pa melen chuba.

¹⁵Tang Shallum tanüngba, aser pai tamajung tasa asaba, ajiang itemji Israel chubatem kaket nung zülua lir.

¹⁶Idangji Menahemi Tirza aser iba nung alir ajak, aser Tirza nungi, arrtsü nung alir samatsü kechiaser parnoki aji pa nem melapoktsü, aji asünung pai aji samatsü: aser iba nung mashisa aliba tetsürtem ajak pai rangpoktsü.

¹⁷Yihuda chuba Uzzia küm semer tukububa nung Gadi chir Menahemi Israel madak chubatsü tenzük, aser Samaria nung küm ter chuba.

¹⁸KIBUBA madang kechi majung aji pai inyak; Nebat chir Yeroboam temenen koba agi pai Israel temenen menadaktsü, iba nungi pai pa arishi tepiyong mepila.

¹⁹Linük anema Asiria chuba Pul aru; aser Menahemi pa ket nung chuba yimli akanga kümdaktsütsü pa teyari pa den alitsü atema Pul nem taribi meyi ka agütsü.

²⁰Menahemi Israel sen, oda rongsen akar tulur nisung ajak nungi, nisung shia nungi taribi shekel tenemnem, Asiria chuba nem agütsütsü agi. Anungji Asiria chubai linükji magi-i meyipa ao.

²¹Tang Menahem tanüngba mapa, aser pai inyakba ajak, itemji Israel chubatem putipuyang kaket nung zülua mali no?

²²Menahem tebu nunger den mejang; aser pa chir Pekahia pa melen chuba.

²³Yihuda chuba Uzzia küm tenembuba nung Menahem chir Pekahiai Israel madak Samaria nung chubatsü tenzük, aser pai küm ana chuba.

²⁴Aser pai KIBUBA madang kechi majung aji inyak; Nebat chir Yeroboam temenen, koba agi pai Israel temenen benshidaktsü iba nungi mepila.

²⁵Aser Remalia chir Peka pa arkotongi pa anema tasa asa; aser Samaria nung chubar lungki nung, Argob aser Arie den tepset; aser pa den Gilead nunger tenem liasü; aser pai pa tepset aser pa melen chuba.

²⁶Tang tanüngba Pekahia mapa, aser pai inyakba ajak, ajiang, itemji Israel chubatem putipuyang kaket nung zülua lir.

²⁷Yihuda chuba Uzzia küm tenemer ana buba nung Remalia chir Pekai Israel madak Samaria nung chubatsü tenzük aser küm metsü chuba.

²⁸Pai KIBUBA madang kechi majung aji inyak. Nebat chir Yeroboam temenen koba agi pai Israel temenen benshidaktsü, iba nungi mepila.

²⁹Israel chuba Peka anogo nung Asiria chuba Tiglath-pileser arua Iyon, Abel-beth-maka, Yano, Kedesh, Hazor, Gilead, Galil aser Naftali lima ajak agi; aser pai nisungtemji Asiriai pur ao.

³⁰Ela jabaso Hoseai Remalia jabaso Peka anema tasa asa aser Uzzia jabaso Yotham küm metsü buba nung pa melen chuba.

³¹Tang Peka tanüngba mapa aser pai inyakba ajak, ajiang itemji Israel chubatem putipuyang kaket nung zülua melika ma?

³²Israel chuba Remalia jabaso Peka küm tanabuba nung Yihuda chuba Uzzia jabaso Yothami chubatsü tenzük.

³³Pai chubatsü tenzükdang pa küm metsür pungu liasü, aser pai Yirusalem nung küm tertrok chuba. Pa tetsü tenüng Zadoker jala Yerusha liasü.

³⁴Pai KIBUBA madang kechi tajung aji inyak, tebu Uzziai inyakba ajak amato pai inyak.

³⁵Aji saka tenem tekülemdak bener moi liasü, nisungtemi ano tetepsetba tenla agütsü aser item tenem tekülemdak liangmesen arong. KIBUBA ki temaba süngkhüm pai yanglu.

³⁶Tang Yotham tanüngba mapa aser pai inyakba ajak, itemji Yihuda chubatem putipuyang kaket nung zülua melika ma?

³⁷Item anogo nungji KIBUBAi Yihuda anema Siria chuba Rezin, aser Remalia jabaso Peka yoktsü tenzük.

³⁸Yotham tebu nunger den mejang, aser Dawid yimti nung tebu nunger den arem, aser par chir Ahazi pa melen chuba.