Read njo 2 CHUBATEM 16 Bible Online

2 CHUBATEM 16 - njo bible

2 CHUBATEM 16

¹Remalia jabaso Peka küm tertenetbuba küm nung, Yihuda chuba Yotham jabaso Ahazi chubatsü tenzük.

²Pa chubatsü tenzükdang Ahaz küm metsü liasü, aser pai Yirusalem nung küm tertrok chuba; aser tebou Dawid memesük KIBUBA pa Tsüngrem madang kechi majung aji pai inyak.

³ Saka pai Israel chubatem lenmang nung jaja aser KIBUBAi Israel chirtem madang aridokba kintem tesempatsü mapa amato pai pei chir tenla ama rongsetdaktsü.

⁴Tenem tekülemdak aser tenem manung aser kongsang sangshia aliba süngdong kübok shia pai tetepsetba tenla agütsü aser liangmesen arong.

⁵ Idangji Siria chuba Rezin aser Israel chuba Remalia jabaso Peka raratsü Yirusalemi atu: aser parnoki Ahaz makbang, saka pa makok

⁶Iba mapang nungji Siria chuba Rezini Siria asoshi Elath meyipa angu, aser Elath nungi Yihuda nunger aridok, aser Edom nunger Elathi aru, aser tanü tashi yangji alir.

⁷Anungji Ahazi Asiria chuba Tiglath-pileser dangi osang yoka ashi, “Ni ne tenzüker aser ne chir lir, atungma, aser ni anema adokba Siria chuba ket nungi aser Israel chuba ket nungi ni kümzükangma.”

⁸Ahazi KIBUBA kidang anguba taribi aser hon, aser chubar ki terizüngdak nung anguba agi, aser aji Asiria chuba dangi sempet asoshi yok.

⁹Asiria chubai pa dang anga, aser pai Damaska anema atua aji agi, aser yangji aliba nüburtem pur Kiri bener ao aser Rezin tepset.

¹⁰Ahaz chubai Asiria chuba Tiglath-pileser lenji Damaskai atu aser Damaska nung aliba tenladakji angu. Anungji pai idakji aliba tenladak mesükba noksa ka yanglur putir Uria dangi yok.

¹¹Ahaz chubai Damaska nungi yokba amaji, aser ibaji pa Damaska nungi aludang sayutsüsa putir Uriai tenladak ka yanglu.

¹²Kodang chuba Damaska nungi aru, chubai tenladakji ngua, pai tenladak anasai arua iba manung tenla.

¹³Pai tarongba tenla ronga chiyungtsü aser tajemtsü tenla shioktsü aser tenla manungji pai yimjung tenla azü rükloktsü.

¹⁴ KIBUBA madang aliba yongmenyin tenladak, tenla ki tejaklen nungi KIBUBA ki aser pa tenladak tetsüngda nungi pai bener aru, aser aji pa tenladak anüdoklen tiplen ayu.

¹⁵Ahaz chubai Uria putir dang mela-a ashi, “Tenladak tulu manungji anepdang tarongba tenla rongang, aser aonung chiyungtsü aser chubar tarongba tenla aser pa chiyungtsü tenla linük nung tarongba tenla dena, aser parnok chiyungtsü tenla, aser tajemtsü tenlatem aser iba manung tarongba tenla zü aser tetepsetba tenla zü ajak, rüklokang, saka yongmenyin tenladakjibo ni atema asüngdangyatsü asoshi lir.”

¹⁶Yamaji Ahaz chubai melaba ajak amato Uria putiri inyak.

¹⁷ Ahaz chubai yongmenyin kikümbang tamentakdak leptoktsü, aser iba nungi tzü susa agien, aser yongmenyin Tzüyim koba kübok nashi pungchi liasü iba nungi agizüka aji lung alaba manung yutsü.

¹⁸Aser amungnü asoshi parnoki tenla kidang yangluba aser kimalen chuba aitba lenmang, Asiria chuba mechi, tenla ki meketa alibaji pai agienadok.

¹⁹Tang Ahaz tanüngba mapa, Yihuda chubatem putipuyang kaket nung zülua melika ma?

²⁰ Ahaz tebu nunger den mejang, aser Dawid yimti nung tebu nunger den arem, aser par chir Hezekiai pa melen chuba.