Read njo 2 CHUBATEM 17 Bible Online

2 CHUBATEM 17 - njo bible

2 CHUBATEM 17

¹Yihuda chuba Ahaz küm teranabuba nung Ela jabaso Hoshea Samaria nung Israel madak chubatsü tenzük, aser pai küm tuku chuba.

²KIBUBA madang kechi majung aji pai inyak, aji saka pa dang tamalen aliba Israel chubatem ama masü.

³Pa anema Asiria chuba Shalmanezer atu; aser Hoshea pa tenzüker aküm, aser pa dangi sempet bener arutsü.

⁴Asiria chubai Hoshea dak tasa tamajung asaba angu; kechiaser pai Ijip chuba So dangi osang abenertem yok, aser pai küm shia inyakba ama Asiria chuba dangi sempet meyok; anungji Asiria chubai pa tsüngden chiokdak shibanga ayu.

⁵Idangji Asiria chubai linük ajak anema atu, aser Samariai arua küm asem aji makbang.

⁶Hoshea küm tukububa nung Asiria chubai[3] Samaria agi, aser Asiriai Israel bener oa Hala aser Gozan ayong Habor nung, aser Media nunger yimtitem nung parnok toktsü.

⁷Aser aji yamai atalok, kechiaser Israel chirtemi KIBUBA parnok Tsüngrem shibai parnok Ijip chuba Farao ket nungi anitet, pa anema temenen benshi aser tangar tsüngremtem külem.

⁸KIBUBAi Israel chirtem aser parnoki atadaktsüba chubatem madang nungi endoktsüba kintem yimsüyimpong nung jaja.

⁹Israel chirtemi miima KIBUBA parnok Tsüngrem anema shitak masüba mapa inyak, aser parnok yimti ajak nung parnoki parnok asoshi mitkar semtu nungi atsübanga aliba yimti tashi tenem tekülemdak yanglu.

¹⁰ Parnoki tenem tekülemdak, aser süngsang sanga aliba kübok temeshi tongshi aser Asherim parnok asoshi ayu;

¹¹aser parnok dang temalen KIBUBAi bener aoba kintemi inyakba ama, parnoki yangji tenem tekülemdak ajak nung liangmesen arong;

¹²aser yamaji parnoki süngyanglutem tenzük, koba indang KIBUBAi parnok dang ashi, “Nenoki iba mapa meinyaktsüla.”

¹³Aji saka KIBUBAi pei ainkar aser tangur ajak ajanga Israel aser Yihuda dang tekümdangtsü agüja ashi, “Ni nenok tebou nunger dang melaba aser koba ni nenok dangi kü tenzüker ainkartem ajanga yok, ozüng ajak amato, nenok tamajung lenmang nungi meyipang aser kü temelaba aser kü telatet ozüng benshiang.”

¹⁴Yongjia parnoki manga, aser tebou nunger, shirnoki KIBUBA parnok Tsüngrem dak mamang, parnok temulung meranga akümba mesüka, parnok temulung meranga aküm.

¹⁵Pa telatet ozüng aser tebou nunger den pai yangluba tezüngzüktepba, aser pa kulitem koba agi parnok dang kuli agütsü,itemji parnoki magizük; yamaji parnoki amajok sülen anidak aser amajok aküm; aser parnok meketa aliba kintem sülen oa parnok indang KIBUBAi parnok mesüka parnoki meinyaktsüla ta mela, aji magizük

¹⁶ Parnoki KIBUBA parnok Tsüngrem temelaba ajak senzüka toktsü, aser parnok asoshi temulusaba süngyanglu noksa yanglu, oda nashi chanu ana aser Ashera ka yanglua anüng petinu külem aser Baal tenzük.

¹⁷ Parnoki parnok jabaso aser jalatem tenla atema rongseta purapuji aser temezünger mapa inyak, aser pa ain adokdaktsütsüsa KIBUBA madang koba tamajung liasü parnoki aji inyaktsü parnok sasa ayok.

¹⁸Aji asünung Israel dang KIBUBAi kanga ain adok, aser pa tsüngdang nungi parnok agien. Yihuda kin dak alema shinga anünga mali asü.

¹⁹Ano Yihudai KIBUBA parnok Tsüngrem temelaba mebenshi, saka Israeli tenteta yutsüba parnok yimsüyimpong benshi.

²⁰KIBUBAi Israel kin ajak magizük, aser parnok timtemdaktsü, aser parnok pa tsüngdang nungi pai mejendok tashi parnok yim maker ket nung bendanga agütsü.

²¹Kechiyong Dawid kidong nungi pai Israel shisatsü; aser parnoki Nebat chir Yeroboam chuba kümdaktsü. Israeli KIBUBA sülen anitakba nungi Yeroboami aridoktsü, aser parnok nem temenen tulu menadaktsü.

²²Israel chirtemi Yeroboami inyakba pa temenen ajak nung jaja; aser item nungi mepila.

²³KIBUBAi pa tsüngdang nungi parnok magien tashi, pai pa tenzüker ainkartem ajanga jembiba ama, parnoki item nungi mepila. Anungji Israel pei lima nungi Asiriai bener ao, yangji tanü tashi parnok lir.

²⁴Asiria chubai Babilon aser Kuta nungi, Hamath aser Safarvaim nungi nisungtem anir aru, aser Samaria yimtitem nung Israel chirtem melena yutsü; aser parnoki Samaria agi, aser iba yimtitem nung ali.

²⁵Yangji parnok aliba tetenzük nungi KIBUBA metsübu, anungji KIBUBAi parnok rongnung molusongzü yok, koba agi parnok kar tepset.

²⁶Anungji parnoki Asiria chuba dang jembia ashi, “Nai bener aoba, aser Samaria yimtitem nung toktsüba kintemi linük madak aliba Tsüngremer yimsüyimpong memetet; aji asünung pai parnok rongnung molusongzü yok, aser ajiang, parnoki parnok tepseter, kechiaser parnoki linük madak aliba Tsüngremer yimsüyimpong memetet.”

²⁷Idangji Asiria chubai mela-a ashi, “Ni yang nungjagi bener aoba putir rongnung ka ilenji yokang;” aser pai parnok odaktsü aser idakji lidaktsü, aser linük madak aliba Tsüngremer yimsüyimpong parnok dang pai sayudaktsü.

²⁸Anungji parnoki Samaria nungi bener aoba putir rongnung ka arua Bethel nung ali, aser parnok dang koma Tsüngrem tsübutsü aji sayu.

²⁹Aji saka kin shiai parnok tsüngremtem yanglu, aser Samaria nungeri yangluba tenla ki nung tenem tekülemdak, aser kin shia parnok aliba yimtitem nung itemji ayu.

³⁰Babilon nisungtemi Sukkot-benoth, aser Kuta nisungtemi Nergal yanglu, aser Hamath nisungtemi Ashima yanglu,

³¹aser Avva nungeri Nibhaz aser Tartak yanglu, aser Safarvaim nungeri parnok chirtem Adrammelek aser Anammelek, Safarvaim tsüngremtem atema mi nung arong.

³²Anungji parnoki KIBUBA tsübu, aser parnok asoshi parnok rongnungi tenem tekülemdak atema putirtem shim, aser tenla ki nung tenem tekülemdak parnok asoshi parnoki tetepsetba tenla agütsü.

³³Parnoki KIBUBA tsübu, aser parnok kin rongnungi parnok bener ao, parnok yimsüyimpong amato, parnok tsüngremtem tenzük.

³⁴ Tanü tashi parnoki akhi yimsüyimpong amato inyaker: parnoki KIBUBA metsübur, mesüra parnok telatet ozüng ama, mesüra parnok yimsü ozüng ama mesüra ozüng amato, mesüra temelaba koba KIBUBAi Yakob, shiba dang pai Israel aja, par chirnur dang mela,

³⁵ “Shirnok den KIBUBAi tezüngzüktepba yanglu, aser mela-a parnok dang ashi, nenoki tangar tsüngremtem metsübutsüla, mesüra nenok sasa parnok dang tapudak mesüra parnok tetenzük, mesüra parnok dang shiruru tenla tetepset.

³⁶ Saka KIBUBA, shibai nenok Ijip lima nungi tashi tulu agi aser tepen songtoka anitet, pa dang nenoki nenok sasa apudaktsüla aser pa dang nenoki tenlatsüla;

³⁷aser nenok asoshi pai züluba telatet ozüng, yimsü ozüngtem, aser ozüng aser temelaba nenoki teti asoshi inyaktsü benshitsüla; aser nenoki tangar tsüngrem metsübutsüla;

³⁸aser ni nenok den yangluba tezüngzüktepba nenoki mamatsüla; mesüra tangar tsüngrem nenoki metsübutsüla:

³⁹saka KIBUBA nenok Tsüngrem nenoki tsübutsüla; aser nenok tsükchir ket nungi pai nenok kümzüktsü.

⁴⁰Aji saka parnoki manga, saka parnoki akhi yimsü ama inyak.”

⁴¹Anungji item kintemi KIBUBA metsübu, aser süngyanglu noksatem tenzük; iba amaji parnok chirtemi aser parnok semchirtemi, parnok tebu nungeri inyakba ama, yamaji parnoki tanü tashi inyaker.