Read njo 2 CHUBATEM 18 Bible Online

2 CHUBATEM 18 - njo bible

2 CHUBATEM 18

¹Israel chuba Ela jabaso Hoshea küm asembuba nung Yihuda chuba Ahaz jabaso Hezekia chubatsü tenzük.

²Pa chubatsü tenzükdang pa küm metsür pungu liasü; aser pai Yirusalem nung küm metsür tuku chuba. Tetsü tenüng Zakaria jala Abi liasü.

³Tebu Dawidi inyakba ajak amato, KIBUBA madang kechi shitak aji pai inyak.

⁴ Pai tenem tekülemdaktemji agien, aser temeshi tongshitem raksatsü, aser Ashera lepsatsü. Aser Mosai yangluba yongmenyin perji anüka raksatsü; kechiyong item anogo tashiji Israel chirtemi iba dang liangmesen arong. Aser pai iba dang Nehushtan ta aja.

⁵KIBUBA Israel Tsüngrem dak pai temulung alem; aji asünung pa sülen Yihuda chuba ajak rongnung, mesüra pa dang tama alir rongnung, pa mesüka shinga maliasü.

⁶Kechiyong pai KIBUBA dak azüit, pa sülen anidakba nungi pai mepila, saka KIBUBAi Mosa dang melaba, pa temelabatem pai benshi.

⁷Aser KIBUBA pa den liasü; kolenisa pa ao, pa azükaru. Aser pai Asiria chuba anema adok, aser pa metenzük.

⁸Filistia nunger Gaza aser iba litsü mitkar semtu nungi atsü atsüa aliba yimti tulutiba tashi oa pai atsüngtet.

⁹Hezekia chuba küm pezübuba nung, aji Israel chuba Ela jabaso Hoshea küm tenetbuba liasü, Asiria chuba Shalmaneseri Samaria anema atu, aser aji makbang.

¹⁰Kümsembuba tatem nung parnoki aji agi. Anungji Hezekia chubaba küm trokbuba koba Israel chuba Hoshea küm tukububa liasü.

¹¹Asiria chubai Israel Asiriai bener ao, aser Hala nung Gozan ayong Hobar nung, aser Media yimtitem nung parnok toktsü.

¹²Kechiaser parnoki KIBUBA parnok Tsüngrem ola manga, saka pa tezüngzüktepba ozüng raksa, oda KIBUBA tenzüker Mosai melaba ajak; aser aji manga, mesüra aji meinyak.

¹³Tang Hezekia chuba küm terpezübuba nung Asiria chuba Sennakeribi atsü atsüa aliba Yihuda yimtitem anema atu, aser itemji agi.

¹⁴Anungji Yihuda chuba Hezekiai Asiria chuba dangi Lakhish-i yoka ashi, “Ni tai inyakogo; kü dang nungi meyipa oang; oda nai kü dak kechi benloktsüdir aji ni abentsü.” Anungji Asiria chubai Yihuda chuba Hezekia nem taribi seret semermer ozükba noklang asem aser hon seret semermer ozükba semer agütsüdaktsü.

¹⁵Hezekia chubai KIBUBA kidang anguba taribi ajak aser chubar terizüngdak ki nung aliba pa nem agütsü.

¹⁶Iba mapang nung Hezekia chubai KIBUBA tenla ki kishitem nungi, aser Yihuda chuba Hezekiai yangloka aliba kiküm tongnü nungi hon agizükadok, aser aji Asiria chuba nem agütsü.

¹⁷Asiria chubai Tartan aser Rabsaris aser Rabshake Lakhish nungi Hezekia chuba dangi temeranger telok tulu den Yirusalemi yok. Kodang parnok atu, süshirtem moapu lenti nung aliba temaba tzübu tzüla anasai parnok aru aser noktak.

¹⁸Kodang parnoki chuba dang jaa liasü, parnok dangi Hilkia jabaso Eliakim, chuba kidang ketdangbuba, tezülur Shebna, aser putipuyang zülur Asaf chir Yoa, parnok dangi adok.

¹⁹Temeranger tanishiri parnok dang ashi, “Tang nenoki Hezekia dang shiang, Yamai chuba tulu, Asiria chubai ashir, Na ya kechi nung temulung lemer tamang akar?

²⁰Tebang o tesaji rara asoshi tasa tajung aser tashi ta nai bilemer asü? Tang nenoki ni anema adok nungji nenoki shiba dak temulung alemer?

²¹Tang, ajiang, nai iba teraksa tzütok meji, oda Ijip dak tamang akar; koba manung nai metalokra, aji ne keti aitsü aser aji tupoktsü. Pa dak temulung alemer ajak dang Ijip chuba Faraoi yamaji lir.

²²Saka nenoki kü dang, Onoki KIBUBA ozü Tsüngrem dak temulung alemer, ta shira, ibaji pa shiba tenem tekülemdak aser tenladak Hezekiai bener ao, aser Yihuda aser Yirusalem dang, Nenoki iba tenladak madang Yirusalem nung külemtsüla, ta shiogo, aji pa masü no?

²³Tang aji asünung, ni ne dang mepishir, kü kibur Asiria chuba nem tenangzüktepba agüjang, aser nai dang kor nung asangertem parnok madak mendaktsüdi süra ni ne nem kor meyi ana agütsüdi.

²⁴Ajangla kodaser kü kibur tilatiba tenzüker rongnung tanishir ka meyipa odaktsütettsü? Aji saka nai Ijip nunger talungtsütem aser kor temerangertem dak temulung alemer.

²⁵Tang ni KIBUBA medeni iba linük anema samatsütsü atu asü? KIBUBAi kü dang ashi, Iba linük anema tuang, aser aji samajang.”

²⁶Idangji Hilkia chir Eliakim, Shebna, aser Yoai temeranger tanishir dang ashi, “Yimlibilema ne tenzükertem dang nai Siria o agi jembiang; kechiyong onoki aji angateter: aser atsü nung aliba nübur tenarong agi angashitsüsa Yihuda oshi nung onok dang tejembi ma.”

²⁷Saka temeranger tanishiri parnok dang ashi, “Item o jembitsü kü kiburi ne kibur aser ne dangi ni yok asü? Atsü nung mena aliba tesamatsü nisungtem, shirnoki ne den pei scü achitsü, aser parnok pei natzü ajemtsü, parnok dangi pai ni meyok no?”

²⁸Idangji temeranger tanishir noktaka Yihuda oshi nung ola tulu agi ayimtena ashi, “Nenoki chuba tulu, Asiria chuba o angang;

²⁹yamai chubai ashir, Hezekiai nenok tekülakokdaktsü; aser pai nenok pa ket nung mekümzüktettsü.

³⁰Mesüra ‘KIBUBAi atangji asenok kümzüktsü, aser iba yimti Asiria chuba ket nung magütsütsü’ ta Hezekiai shia KIBUBA dak nenok tamangdaktsü.

³¹Hezekia dang tanga. Kechiyong yamai Asiria chubai ashir, Kü den yimjung yangluang, aser kü dangi adokang. Nisung shia pei tsükmenatzü, aser nenok nisung shia pei munguzünu chia liang, aser nenok nisung shia pei tzüpong nungi tzü jema liang;

³²nenok lima mesükba lima kati, tsük aser yi aliba lima, aser tsükmenatzü lu aliba lima, oliv totzü aser ninang mojitzü aliba lima, oda nenok mesüi taküm alitsüsa nenok ni arua anir mao tashi. Aser KIBUBAi asenok kümzüktsü, ta shia pai nenok mesüzük dang Hezekia dang tanga.

³³Asiria chuba ket nungi kintem tsüngrem kati danga kümzüktsü asü?

³⁴Hamath aser Arpad tsüngremtem kong ali? Safarvaim, Hena aser Ivva tsüngremtem kong ali? Kü ket nungi parnoki Samaria kümzük asü?

³⁵Ni nungi KIBUBAi Yirusalem kümzüktettsüsa, item linük tsüngrem rongnung shibai item linük ni nungi kümzük?”

³⁶Saka nisungtem ola madoki liasü, aser pa dang kecha melangzü; kechiaser chubai parnok dang kecha melangzütsü ozüng agütsü.

³⁷Idangji Hilkia jabaso Eliakim chuba kidang ketdangbuba, tezülur Shebna, aser putipuyang zülur Asaf chir Yoa, parnok süoshi shisar arua Hezekia dang temeranger tanishir otemji ashi.