Read njo 2 CHUBATEM 19 Bible Online

2 CHUBATEM 19 - njo bible

2 CHUBATEM 19

¹Kodang Hezekiai aji angashi, pai pei süoshi shisa, aser pei sasa anem sü agi meyir KIBUBA kidangi ao.

²Aser pai chuba kidang ketdangbuba Eliakim, tezüluba Shebna, aser putir tamburtem anem sü agi meyibanger, Amoz jabaso Isaia ainkar dangi yok.

³Parnoki pa dang ashi, “Yamai Hezekiai ashir, Ibai tejashitsü, tarütsüba aser maksü anogo lir. Kechiaser tanurtem asotsü anogo abensa, aser parnok asotsü tashi maka.

⁴Ashiko temeranger tanishir shiba pa kibur Asiria chubai taküm Tsüngrem sensatsütsü yoka lir, pa o ajak KIBUBA ne Tsüngremi angatsüa kar, aser KIBUBA ne Tsüngremi angashiba otemji arütsütsü südi; aji asünung tokja aliba tanüngba asoshi ne sarasadem yokang.”

⁵Anungji Hezekia chuba tenzükertem Isaia dangi aru.

⁶Isaiai parnok dang ashi, Yamai nenoki nenok kibur dang ashitsüla, “Yamai KIBUBAi ashir, Nai angashiba otem koba agi Asiria chuba tenzükertemi KIBUBA atalatsü, aji nai tsübua teli.

⁷Atangji, ni pa dak tanela ka enoktsütsü, aser pai olulu ka angashitsü aser pai pei limai meyipa aotsü, aser par lima nung nok agi ni pa laodaktsütsü.”

⁸Anungji temeranger tanishir meyipa oa Asiria chubai Libna anema rara-a angu; kechiyong Lakhish nungi pai pila-a liasü ta pai angashi.

⁹Pai kodang Kush chuba Tirhaka-i ya oda ashiba angashi, ajiang, pa na anema raratsü adoka lir, idangji pai tanaben osang abenertem Hezekia dangi yoka ashi,

¹⁰“Yamai nenoki Yihuda chuba Hezekia dangi jembia shiang, Nai temulung alemba ne Tsüngremi Asiria chuba ket nung Yirusalem magütsütsü ta shia na tashiokdaktsü.

¹¹Ajiang, Asiria chubai linük raksadakja linük ajak dang inyakba nai angashia lir, aser na kümzüktsü no?

¹²Gozan, Haron, Hezef aser Telessar nung aliba Eden nunger kintem koba kübu nungeri samatsü, kintem tsüngremi parnok kümzük asü?

¹³Hamath chuba, Arpad chuba, aser Safarvaim yimti nung chuba, Hena aser Ivva chuba kong ali.”

¹⁴Osang abenertem ket nungi Hezekiai shitiji agizük, aser aji azüng, aser KIBUBA dangi Hezekia atu, aser aji KIBUBA madang sala.

¹⁵ KIBUBA dang Hezekiai sarasadem, “Oh, KIBUBA Israel Tsüngrem, cherubim manung mena aliba, alima chuba yimli ajak rongnung, oda na dang Tsüngremji lir; nai anüng aser ali yanglu.

¹⁶Oh KIBUBA, ne tenarong tenjang, aser angangma; ne tenük lapokjang, Oh KIBUBA aser ajiang, taküm Tsüngrem sensatsütsü Sennakeribi yokba otem angangma.

¹⁷Atangji Asiria chubatemi kintem aser parnok linük samadaktsüogo,

¹⁸aser parnok tsüngremtem mi nung enoktsüogo; kechiyong itemji tsüngrem masü, saka nisunger teka mapa, süng aser lung; aji asünung parnoki item samatsüogo.

¹⁹Tang aji asünung, Oh KIBUBA ozü Tsüngrem, pa ket nungi onok kümzükang, aser ne dang mepishir, oda alima chuba yimli ajaki na KIBUBA Tsüngrem oda na dang, ta metettsü.”

²⁰Idangji Amoz jabaso Isaiai Hezekia dangi yoka ashi, “Yamai KIBUBA Israel Tsüngremi ashir, Nai Asiria chuba Sennakerib anema kü dang sarasademba ni angashiogo.

²¹KIBUBAi pa indang jembiba ya lir. Zion tasüngtet jalai na sensatsü aser na menüja atalatsü. Yirusalem jalai ne sülen tekolak angemloktsütsü.

²²Shiba dang nai sensatsü aser atalatsü? Aser shiba anema nai ne ola temaleni yok aser ne tenük temaleni rangloka yok? Israel Temeshisang anema!

²³Ne osang abenertem agi nai KIBUBA sensaja ashi, Kü talungtsütem jenti den ne tenem kolak tashi, Lebanon talangtiba tonga atur; aser iba nung cedar süngdong talang, aser iba nung tajungtiba saipres süngdongtem ni lendoktsü: aser ni alidak talangtiba pa tejang tangtsüba moapu arem tonga aitsü.

²⁴Ni tzübu atu aser bendanger tzü jemogo, aser kü tsüng temepu agi Ijip ayong ajak kongdaktsü.

²⁵Talangka ogo ni aji koma renem, akhidang ni aji koma kümdaktsü nai mangashi no? Ne mitsa yangluba yimtitem teraksa telong tena toktsütsü ni tang aji atalokdaktsü.

²⁶Aji asünung item nübur tashi ila-a liasü; parnok aoksa aser bangka-a liasü; parnok moapu ai amai süngolio tanep ama, kilem nung ai adok ama, aser anojungi adokba mendi amai liasü.

²⁷Saka na amenba, aser na aoba aser na aitba aser ni anema na ain adokba ni metet.

²⁸Ni anema nai ain adokbayong, aser ne mezümekümba kü narong tonga atu nungji, ni kü poroki ne teni nung enoktsütsü, aser ne tebang mechi nung lakem enoktsütsü aser na aruba lenmangi ni na meyipdaktsütsü.”

²⁹“Ne madang temaitsü ya alitsü. Iba küm nenoki pa sasa meiba achitsü, aser tanabuba küm nung kasa adokba nungi; aser kümsembuba nung nenoki metsü prokang, aser alu ruang, aser tsükmenatzü atsüki nung temang, aser iba süngjang chiang.

³⁰Yihuda kidong nungi jentetba tanüngbai tanaben tera alilen ayangtsü aser temalen süngjang atangtsü.

³¹Kechiyong Yirusalem nungi tanüngba ka aotsü, aser Zion tenem nungi parnoki jentettsü; KIBUBA tejangraba tulu agi ibai inyaktsü.”

³²Aji asünung Asiria chuba indang KIBUBAi yamaji ashir, “Pa iba yimti-i marutsü, mesüra yangji lijakjang kata meyoktsü mesüra iba madangi pai jong bener marutsü mesüra iba nung ali mejungketa meyanglutsü.

³³Pa aruba lenmang ilen jagisa pa meyipa aotsü, aser pa iba yimti-i marutsü ta KIBUBAi ashir,

³⁴kechiaser pei atema aser kü tenzüker Dawid atema, ibai kümzüktsüba ni iba yimti noktangtsü.”

³⁵Paonungji KIBUBA tenyar oa Asiria nunger tanendak meyi noklang ka ser terpungu tepset; aser anepdang nisungtem shishidang, ajiang, parnok ajak tasü liasü.

³⁶Anungji Asiria chuba Sennakeribi tanendak nungi meyipa Nineve-i shilang aser idakji ali.

³⁷Kenü anogo pai pei tsüngrem Nisrok ki nung külema alidang, pei chir Adrammelek aser Sharezer nati pa tepset, aser parnok Ararat linüki jena ao. Aser par jabaso Esar-haddoni pa melen chuba.