Read njo 2 CHUBATEM 2 Bible Online

2 CHUBATEM 2 - njo bible

2 CHUBATEM 2

¹Kodang KIBUBAi Elija Tsüngrem mopung agi bener aotsü atong, Elija o Elisha na Gilgal lenmang nung liasü.

²Elijai Elisha dang ashi, “Yangi ata-a liang kechiaser KIBUBAi ni Bethel tashi yoka lir.”

³Aser Bethel nung aliba ainkar chirtem Elisha dangi arua ashi, “KIBUBAi ne kibur ne madak nungi tanü bener aotsü ta nai meteter ma?” Aser pai ashi, “Hau, ni aji metet; nenok ajem ajema liang.”

⁴Elijai pa dang ashi, “Elisha, yimlibilema na yangi ata-a liang; kechiaser KIBUBAi ni Yerikoi yok.” Aser pai ashi, “KIBUBA taküm ali nungji, aser na taküm ali nungji, ni na metoktsütsü.” Anungji tena Yerikoi aru.

⁵Aser Yeriko nung aliba ainkar chirtem Elisha anasa arua ashi, “KIBUBAi ne kibur ne madak nungi tanü bener aotsü ta nai meteter ma?” Aser pai langzü, “Hau, ni metet; nenok ajem ajema liang.”

⁶Elijai pa dang ashi, “Yimlibilema na yangi ata-a liang; kechiyong KIBUBAi ni Yordani yok.” Aser pai ashi, “KIBUBA taküm ali nungji, aser na taküm ali nungji, ni na metoktsütsü.” Aser tenaprong ao.

⁷Aser ainkar chirtem nisung tenem ao aser parnok tsütsü shir oji ta noktak, aser tenaprong Yordan anasa noktak.

⁸Aser Elijai pei sobutsü bena aru aser aji lungtener tzü nung azük, aser tzüji külen küleni sadang, aji asünung tenaprongla ali takong manung ao.

⁹ Parnoki ajanger külen Elijai Elisha dang ashi, “Ni na nungi bener maodang ni na asoshi kechi inyaktsü asüngdangang.” Aser Elishai ashi, “Ni ne dang mepishir, ne tanela shilem anasü kü madak lidakjangma.”

¹⁰Aser pai ashi, “Nai tasak ka asüngdangogo; aji saka, na nungi ni bener maodang nai ni ngura, yamaji na asütsü.”

¹¹Aser parnok jembiyonga oa alidang ajiang mi talungtsü; aser mi kortem adoka tena balala piladaktsü, aser Elija Tsüngrem mopung agi kotaki bener atu.

¹² Aser Elishai aji angu aser pai ayimten, “Oba, Oba, Israel talungtsü aser kor nung amener nisungtem!” Aser pai joko mangu. Anungji pa pei süoshi nung sot, aser itemji ana küma shisa.

¹³Pai Elija sobutsü pa nungi tsükba bena aru, aser meyipa ao, aser Yordan ayongküm nung noktak.

¹⁴Elija nungi tsükba sobutsüji pai agi, aser tzü nung züka ashi, “KIBUBA, oda Elija Tsüngrem kong ali?” Aser pai tzü nung azükdang parnok külen küleni sadang, aser Elisha süia ao.

¹⁵Kodang pa jakdang Yeriko nung aliba ainkar chirtemi pa angu, parnoki ashi, “Elija tanela Elisha madak lir.” Aser parnok pa lenji aru, aser pa jakdang parnok sasa alilen apudak.

¹⁶Parnoki pa dang ashi, “Tang ajiang, ne tenzükertem den tashi tait nisung tenem lir; yimlibilema parnok odakjang aser ne kibur bushidakjang; aji mesüra ashiko Tsüngrem tanelai pa bener tur, tenem kar nung mesüra lenten kar nung tsükdakja alitsü.” Aser pai ashi, “Nenok meyoktsü.”

¹⁷Aser pa akseta maküm tashi parnoki pa mepishi, pai ashi, “Yokang.” Aji asünung parnoki nisung tenem yok, aser parnoki pa anogo asem bushi, saka pa mangu.

¹⁸Aser pa Yeriko nung alidang parnok pa dangi meyipa aru, aser pai parnok dang ashi, “Ni nenok dang tuo ta mashi no?”

¹⁹Yimti nisungtemi Elisha dang ashi, “Ajiang, onoki ne dang mepishir, kü kiburi anguba ama, yimti tesem ya tajung lir, saka tzübu majung, aser ali-i süngjang metangtsür.”

²⁰Pai ashi, “Kü dangi tzü mori tasen ka bener arung, aser iba nung metsü enokang.” Aser parnoki aji pa dangi bener arutsü.

²¹Aser pai tzübu jagi oa yangji metsüji enokja ashi, “Yamai KIBUBAi ashir, Ni item tzü anebtsüogo; joko iba mapang nungi tasüba mesüra tejang matangba malitsü.”

²²Anungji tanü tashi, Elishai jembiba o amato tzüji aneba liasü.

²³Idak nungjagi pai Betheli atu; aser pai lenmangi tuya alidang, tanurtem pa den ajuruteptsü aru, aser pa sensatsü, aser pa dang ashi, “Tuang, na lemtsüba, tuang, na lemtsüba.”

²⁴Aser pai pa sülen reprang aser parnok angu, aser KIBUBA tenüng nung parnok atakatem. Aser arem nungi shirem tetsü ana adok, aser parnok tanur lirana shisatsü.

²⁵Idak nungjagi pai Karmel tenemi ao, aser yang nungjagi pa Samariai meyip.