Read njo 2 CHUBATEM 20 Bible Online

2 CHUBATEM 20 - njo bible

2 CHUBATEM 20

¹Iba tensa nung Hezekia tasütsüsa shiranga liasü. Amoz jabaso Isaia ainkar pa dangi arua pa dang ashi, “Yamai KIBUBAi ashir, Ner ki tiptema yuang; kechiyong na asütsü, aser na manebtsü.”

²Idangji pai pei tejak jaraleni meyip aser KIBUBA dang sarasadema ashi,

³“Oh KIBUBA, koma ni ne madang atangji nung aser temulungjang ochi nung jaja, aser ne tsüngdang koba tajung aji inyakogo, tang bilemtetangma.” Aser Hezekia kanga ajeb.

⁴Aser Isaiai kima atena maodang KIBUBA O pa dangi arua ashi,

⁵“Tanaben meyipang, aser kü nübur tanishir Hezekia dang shiang, Yamai KIBUBA, nebou Dawid Tsüngremi ashir, ‘Ni ne sarasadem angashiogo, ni ne nüktzü nguogo; ajiang, ni na anebtsütsü. Tasemnübuba nung na KIBUBA kidangi atutsü.

⁶Ni ne arishi küm terpungu enloktsütsü, aser ni na aser iba yimti Asiria chuba ket nungi kümzüktsü; aser ni iba yimti pei atema, aser kü tenzüker Dawid atema kümzüktsü.’ ”

⁷Isaiai ashi, “Mungozünu amtsük ka bener arung.” Aser parnoki aji bena arua pa anebdaktsütsü asoshi tepzünu manung ataloka yujang.”

⁸Hezekiai Isaia dang ashi, “KIBUBAi ni anebtsütsü aser tasemnübuba nung ni KIBUBA kidangi atutsü ta ashiba temaitsüji kechi alitsü?”

⁹Isaiai ashi, “Na asoshi KIBUBA nungi iba temaitsü alitsü, oda KIBUBAi pai nangzükba inyaktsü; akhümji tejakleni jenjang ter aotsü asü mesüra tesüleni jenjang ter aotsü?”

¹⁰Hezekiai langzü, “Akhüm asoshibo tejakleni atsülangtsü temela; saka akhümji tesüleni-ang jenjang ter meyipa odakjang.”

¹¹Isaia ainkari KIBUBA dang ayimten; aser pai akhüm koba Ahaz anü takzüba nung luadoker liasü, aji jenjang ter tesüleni meyipa bener aru.

¹²Iba tensa nung Babilon chuba Baladan jabaso Merodak Baladani Hezekia dangi shiti aser sempet bener yok; kechiaser Hezekia shiranga lir ta pai angashi.

¹³Hezekiai parnok pela-a agizük, aser parnok dang pai senti oset terizüngdak ki ajak taribi, hon, teronem menemtsü aser senti totzü, aser pa sobutsü rizüngdak ki, aser pa rongsen akaba ajak sayu. Hezekiai parnok dang par kidang mesüra pa yimli ajak nung mesayuba kecha mali asü.

¹⁴Idangji Isaia ainkar Hezekia chuba dangi arua ashi, “Item nisungtemi kechi ashi? Aser kong nungi parnok ne dangi aru?” Hezekiai langzü, “Parnok alima talang, Babilon nungi arua lir.”

¹⁵Pai ashi, “Parnoki ne kidang kechi angu?” Hezekiai langzü, “Kü kidang aliba ajak parnoki nguogo, ni parnok dang kü rongsen mesayuba kecha maka.”

¹⁶Idangji Isaiai Hezekia dang ashi, “KIBUBA O angang.

¹⁷Ajiang, ne kidang akaba ajak aser nebou nungeri tanü tashi rizünga akaba ajak Babiloni bener aotsü anogotem arudagi; kecha anünga malitsü, ta KIBUBAi ashir.

¹⁸Aser na nungi adokba ne jabasotem koba na nungi jakzükdir, parnoki bener aotsü; aser Babilon chuba kidang teyangluba nisungtem akümtsü.”

¹⁹Idangji Hezekiai Isaia dang ashi, “Nai jembiba KIBUBA oji tajung lir.” Pai ano bilem, “Yimjung dang kü tensa nung lira, yamaji masütsü no?”

²⁰Tang Hezekia tanüngba mapa aser pa tashi ajak, aser pa koda tzütu aser tzüla yanglu, aser yimti-i tzü mesüa aru, itemji Yihuda chubatem putipuyang kaket nung zülua mali no?

²¹Hezekia tebu nunger den mejang; aser par chir Manase pa melen chuba.